Skessuhorn - 23.11.2011, Side 70

70 MIÐVIKUDAGUR 23. NÓVEMBER
Eyðibýli á Íslandi er heiti á bók
sem nýlega kom út. Þar er að finna
rannsókn á eyðibýlum og yfirgefnum
húsum í Austur­Skaftafellssýslu,
Vestur­Skaftafellssýslu og
Rangárvallasýslu, sem gerð var
sumarið 2011. Félagið Eyðibýli ­
áhugamannafélag, gefur bókina út
en verkefnið er unnið fyrir styrki
frá Nýsköpunarsjóði námsmanna,
Húsfriðunarnefnd, Kvískerjasjóði
og sveitarfélögum á Suðurlandi.
Margir koma við sögu þessa verks,
sem er áhugavert og um margt
fróðlegt. Í inngangi bókar segir frá
tilurð hennar og markmiðum með
útgáfunni. Þar segir að sumarið
2011 hafi rannsóknarverkefnið
Eyðibýli á Íslandi hafist. Í því felist
að rannsaka fjölda og ástand eyðibýla
og yfirgefinna húsa á Íslandi. Þetta
sumar hafi hús í fyrrgreindum sýslum
verið rannsökuð. Þetta voru 103
hús sem skráð voru og ljósmynduð.
Hugtakið eyðibýli er notað á nokkuð
viðtækan hátt í þessu verkefni. Það
er ekki aðeins látið ná yfir yfirgefin
hús í sveitum landsins, heldur einnig
þau sem standa innan um önnur
íbúðarhús eða á jörð sem enn er
nytjuð. Fimm háskólanemar unnu
þessa rannsóknarvinnu en þeir eru:
Arnþór Tryggvason, Árni Gíslason,
Birkir Ingibjartsson, Steinunn
Eik Egilsdóttir og Yngvi Karl
Sigrjónsson. Þessir háskólanemar
fengu styrk frá Nýsköpunarsjóði
námsmanna til verksins. Umsjón
með verkefninu höfðu Sigbjörn
Kjartansson arkitekt hjá Glámu­
Kím arkitektum, Gísli Sverrir
Árnason menningarráðgjafi hjá R3­
Ráðgjöf og Ómar Bjarki Smárason,
jarðfræðingur hjá Jarðfræðistofunni
Stapa.
Eyðibýli á Íslandi er fróðleg
lesning og myndskreytingin
skemmtileg enda ekki alltaf verið að
taka myndir í sól og blíðu. Þannig er
ákveðin dulúð yfir ýmsum myndum
í bókinni og þær sýna íslenskan
raunveruleika en ekki dæmigerðan
ferðabækling. Ljósmyndarar hafa
greinilega ekki alltaf verið heppnir
með veður. Áform eru uppi um að
taka fleiri landshluta fyrir á þennan
hátt og ljóst er að þarna er verið
að vinna brautryðjendastarf sem
vert er að styðja og sjá til þess að
svona nokkuð verði gert í öllum
landshlutum.
Bókin er skemmtileg og fróðleg
lesning og þar kannast margir
núlifandi Íslendingar við lýsingar
á húsakosti og landkostum ásamt
myndum.
hb
Haustið 2010 byrjaði Kristilegt
félag ungra manna og kvenna,
KFUM og K, með starf í
Borgarnesi, en þar hefur ekki verið
starfandi deild um árabil á vegum
samtakanna. Þór Binó Friðriksson
þáverandi æskulýðsfulltrúi KFUM
fékk til liðs við sig Benedikt Snæ
Magnússon sem sá um starfið
ásamt Þór síðasta vetur. Þessir
æskulýðsfundir byrjuðu svo að nýju
í Borgarnesi í haust og nú er það ung
stúlka Hlín Guðný Valgarðsdóttir
sem annast starfið ásamt Benedikt,
en bæði eru þau búsett á Akranesi.
Skessuhorn ræddi við Benedikt
um barna­ og æskulýðsstarfið, sem
hann segir að sé mjög gefandi, og
hafi verið tekið einstaklega vel
bæði af börnum og foreldrum.
Um 120 börn taka þátt í starfinu í
Borgarnesi í vetur og í síðustu viku
var efnt til foreldrafundar. Þá um
leið var haldið svokallað Pálínuboð,
þar sem allir komu með sitthvað á
hlaðborð og borðað var saman,
ásamt því sem farið var í leiki og
gert sér glaðan dag.
Vel mætt á fundina
Benedikt er úr Breiðholtinu
í Reykjavík, en fluttist ásamt
fjölskyldu sinni fermingarvorið 2004
í Nýhöfn í Melasveit. „Ég fermdist
í Hallgrímskirkju í Saurbæ, var eini
strákurinn og með mér fermdust 11
stelpur. Mér sýndist jafnvel að séra
Kristinn Jens væri óvenjustressaður
að ferma svona fjölmennan hóp,“
sagði Benedikt sem svo fluttist á
Akranes árið 2008.
Æskulýðsstarfið hjá KFUM og K
fer fram í Félagsbæ, safnaðarheimili
Borgarneskirkju, síðdegis á
fimmtudögum. Benedikt segir að
í fyrra hafi starfið náð til 5.­10.
bekkjar og þá sótt fundina 80­100
börn. Í haust bættist við svokallaður
kirkjuskóli sem er fyrir börn frá 4.
bekk, það er níu ára aldri, og niður
úr. Að viðbættum þessum hópi er
skráð þátttaka í æskulýðsstarfið hátt
í 120 börn í vetur. Langfjölmennasti
hópurinn er hjá þeim yngri í eldri
hópnum, 5.­7. bekk á miðstiginu,
sem Benedikt kallar, en úr þeim
hópi mætir reglulega um 40 börn í
viku hverri, en mörg barnanna eru
í annarri afþreyingu sem skarast á
við þessar stundir og mæta því ekki
alltaf, mörg í annað hvert skipti.
Höfðað til hvers
aldurshóps
Benedikt segir að viðfangsefnin
séu mismunandi milli hópa og
dagskrá fundanna byggð upp
þannig að hún höfði til hvers
hóps. Þannig sé í kirkjuskólanum,
hjá yngstu börnunum, mikið
um föndur, leik og söng. Hjá
miðstiginu mikið um hópavinnu
og ýmsa leiki. Lesið sé upp úr
Biblíunni í byrjun hvers tíma og til
að mynda fái fermingarárgangurinn
í elsta hópnum þátttökuna metna
inn í fermingarundirbúninginn.
Benedikt segir að ekki síst sé þörf
fyrir að leita inn á áhugasvið þessa
elsta hóps sem m.a. muni á næstunni
taka þátt í miðnæturíþróttamóti
í Vatnaskógi, sem KFUM og K
stendur fyrir.
Þorbjörn Hlynur Árnason
prófastur og prestur í Borgarnesi
er meðal þeirra sem lýst hafa yfir
mikilli ánægju með starf KFUM
og K í safnaðarheimilinu Félagsbæ
á fimmtudögum eins og áður segir.
Starfið fer fram kl. 16:45­17:45
fyrir þau yngstu; kirkjuskólann, kl.
18­19 fyrir 5.­7. bekk og 20­21:30
fyrir 8.­10. bekk.
þá
Suðurhús í sveitarfélaginu Hornafirði.
Bók um eyðibýli á Íslandi
„Fyrr var oft í koti kátt...“ Hlíðarendakot í Fljótshlíð.
Einn af hópunum sem tekur virkan þátt í æskulýðsstarfi KFUM og K í Borgarnesi.
Öflugt kristilegt æskulýðsstarf í Borgarnesi
Benedikt Magnússon annast starfið í Borgarnesi ásamt öðrum bæði í vetur og
síðasta vetur.