Skessuhorn - 19.10.2016, Blaðsíða 20

MIÐVIKUDAGUR 19. OKTÓBER 201620
SPECTRA - Ljósahátíð Aberdeen
var valin hátíð ársins í Skotlandi nú á
dögunum. Akurnesingurinn Heiðrún
Þráinsdóttir Kelly er einn skipuleggj-
enda hátíðarinnar en hún starfar hjá
lista- og viðburðarframleiðslufyrir-
tæki sem heitir Curated Place. „Síð-
ustu tvö ár höfum ég og Andy Bry-
don séð um alla skipulagningu á há-
tíðinni undir nafninu Curated Place
í samstarfi við viðburðar- og menn-
ingateymi borgarinnar. Hann er list-
rænn stjórnandi og ég er markaðs-
og framleiðslustjóri,“ segir Heiðrún
í samtali við Skessuhorn. SPECTRA
hátíðin er haldin árlega í Aberdeen
og er nú orðin stærsta menningar-
og listahátíðin í borginni. „Aberdeen
eða Granítborgin eins og hún er köll-
uð, er þekktust fyrir olíuvinnslu og
tækniþróun í þeim geira. SPECTRA
var búin til með því markmiði að búa
til ljósa- og menningarviðburð fyr-
ir alla fjölskylduna á dimmum og
löngum vetrardögum með áherslu
á að kynna sterka menningararfleifð
borgarinnar, hönnun og tækni,“ út-
skýrir Heiðrún.
Stærsta viðurkenningin
í geiranum
Að sögn Heiðrúnar er hátíðin haldin
yfir fjóra daga í febrúarmánuði, sam-
hliða miðannarfríum í grunnskólum
Skotlands. Þar er unnið með myrkrið,
þar sem ljósalistaverk og gagnvirkir
ljósaskúlptúrar lýsa upp skammdegið
á ævintýralegan hátt. Lögð er áhersla
á að hefðbundnir og óhefðbundn-
ir listunnendur geti fundið eitthvað
við sitt hæfi og notið góðrar samveru
yfir hátíðina. „Á þessu ári sýndum
við yfir 20 verk sem mörg hver voru
mjög stór í sniðum og sýnd á þremur
hátíðarsvæðum. Alls sóttu 35 þúsund
manns hátíðina yfir þessa fjóra daga,
sem var mikil aukning frá árinu áður.
Flestir voru frá Aberdeen og norður-
hluta Skotlands en markmiðið fyr-
ir næsta ár er að draga fleiri erlenda
ferðamenn að og er nokkuð víst að
þessi viðurkenning mun hjálpa við
það, enda er skipulagning núna í full-
um gangi og dagskráin enn metnað-
arfyllri en áður.“ Viðurkenningin há-
tíð ársins í Skotlandi (Scottish Festi-
val of the Year) hefur verið veitt níu
sinnum innan viðburðageirans þar í
landi. Verðlaunin eru veitt í samstarfi
við Event Scotland og Visit Scot-
land með það að markmiði að vekja
athygli á metnaðarfullum skoskum
viðburðum og veita viðurkenningu
fyrir störf þeirra sem vinna að þeim.
SPECTRA var valin hátíð ársins í
Skotlandi 2016 og voru verðlaun-
in veitt til Curated Place sem skipu-
leggjenda hátíðarinnar í samstarfi við
menningar- og viðburðarteymi borg-
arinnar. „Hátíðin var samtals tilnefnd
til fimm mismunandi verðlauna í ár
og er þetta stærsta viðurkenningin
sem veitt er í viðburðargeiranum í
Skotlandi. Þetta er í fyrsta sinn sem
hátíðin hefur verið tilnefnd til verð-
launa og í fyrsta skipti sem hátíð frá
Aberdeen hefur hlotið svona stóra
viðurkenningu að mér vitandi,“ út-
skýrir Heiðrún.
Mikil fjölgun milli ára
Heiðrún er búsett í Manchester í
Englandi, ásamt Martin Stuart Kelly
eiginmanni sínum og tveimur börn-
um, Keiran Þráni og Freyju Caitlin.
Þangað fluttust þau þegar þau voru í
fæðingarorlofi og hóf Heiðrún mast-
ersnám í alþjóðamarkaðsfræði við
Lancaster háskóla árið 2012. „Ég flýg
reglulega til Aberdeen til að sinna
skipulagningu hátíðarinnar en einnig
vinnum við mikið í fjarvinnu,“ segir
hún. Líkt og fyrr segir starfar Heið-
rún hjá fyrirtækinu Curated Place,
sem hefur séð um skipulagningu
SPECTRA hátíðarinnar síðastlið-
in tvö ár. „Þegar við tókum við verk-
efninu hafði hátíðin verið haldin einu
sinni áður og var mjög smá í sniðum.
Við stóðum tvö að þessu fyrsta árið
en erum núna orðin fimm manna
viðburðarteymi og erum við raun-
ar allt í öllu - en teymið sem kem-
ur að hátíðinni nær næstum hundr-
að manns þegar skipulagning stendur
sem hæst nokkrum dögum fyrir opn-
un.“ Fyrsta hátíðin sem þau komu að
fór fram í febrúar í fyrra og stóð yfir
í fjóra daga í almenningsgarði í mið-
borginni. Hátíðin vakti mikla lukku
meðal borgarbúa og mættu tíu þús-
und manns í garðinn yfir þessa fjóra
daga. „Í ár stækkuðum við hátíðina
og hún náði yfir þrjú hátíðarsvæði
í miðborginni. Við settum okkur
markmið um að fjölga gestum í ár en
okkur grunaði ekki hve mikil fjölg-
unin yrði, en 35 þúsund gestir sóttu
hátíðina,“ segir Heiðrún.
Borgarbúar
taka virkan þátt
Heiðrún segir fyrirtækið Curated
Place líklega ekki teljast til hefðbund-
ins viðburðarfyrirtækis, þar sem sér-
staða þeirra felist í að færa samtímalist
út úr galleríum og yfir í óhefðbundn-
ari staðsetningar og almenningsrými.
„Við erum ekki mikið í því að kaupa
inn tilbúin verk heldur leggjum við
frekar áherslu á það að skapa tækifæri
fyrir listafólk, ljósahönnuði, tónskáld
og forritara til að vinna saman og
skapa ný verk, sérstaklega fyrir hátíð-
ina og önnur verkefni sem við erum
í.“ Hún segir flest verkanna sem sýnd
hafi verið í Aberdeen vera stór í snið-
um. Það feli í sér mikla hugmynda-
vinnu og samstarf með listafólki
alls staðar að úr heiminum. „Einnig
leggjum við mikla áherslu á að borg-
arbúar taki virkan þátt í hátíðinni. Til
dæmis höfum við bæði árin haldið
námskeið í grunnskólum borgarinn-
ar, þar sem nemendur fengu leiðsögn
og bjuggu til sín eigin verk sem voru
svo sýnd á hátíðinni. Við erum einn-
ig í samstarfi við háskólana og veitum
starfsþjálfun til nemenda í viðburðar-
stjórnun sem þeir fá svo metið inn í
námið.“
Umkringd Akrafjalli
í Skotlandi
Heiðrún segir starf sitt hjá Curated
Place vera mjög fjölbreytt og eng-
inn dagur eins, sem geri það einstak-
lega skemmtilegt. „Á skipulagsstig-
inu sem stendur yfir frá maí fram í
desember kem ég markaðssetningu,
framleiðslu- og fjármögnun ásamt
skipulagningu á dagskrá hátíðarinnar
með samstarfsfélögum mínum. Um
tveimur vikum fyrir hátíðina fer allt
á fullt og þá skiptum við okkur upp
í teymi eftir hátíðarsvæðum. Núna í
febrúar sá ég um viðburðastjórnun á
stærsta hátíðarsvæðinu, það fól með-
al annars í sér að stýra allri uppsetn-
ingu á ljósalistaverkum með lista-
fólki, tæknifólki, sjálfboðaliðum og
viðburðarteymi Aberdeenborgar. Þá
kemur sér vel að vera sjóaður Íslend-
ingur, því þessi vinna fer að mestu
leyti fram utandyra og veðuraðstæð-
ur þær sömu og heima á Íslandi.“
Aberdeen liggur mjög norðarlega í
Skotlandi og segir Heiðrún að mikil
áhersla sé lögð á landfræðilega teng-
ingu borgarinnar við Norðurlönd-
in sem hefur endurspeglast í dagskrá
hátíðarinnar. Sem dæmi megi nefna
að í fyrra hafi þema hátíðarinnar ver-
ið ís, eldur og vatn. „Þá kom ég með
ljósmyndarann og kvikmyndagerðar-
manninn Andrew Brooks til Íslands
og naut aðstoðar Eiríks Þórs Eiríks-
sonar við skipulagningu ferðarinn-
ar. Við tókum upp efni í panorama af
landslagi Íslands, jöklum og eldgos-
inu í Holuhrauni. Við heimsóttum
einnig Akranesvita í brjáluðu veðri,
þar sem Akranes var myndað í bak og
fyrir,“ segir hún. Á hátíðinni var kvik-
myndinni svo varpað á sérútbúinn
320 gráðu skjá sem áhorfendur stigu
inn í og voru því umkringdir lands-
lagi Íslands. „Ég skal viðurkenna að
það var einstök tilfinning fyrir mig að
stíga þar inn og vera umkringd Akra-
fjallinu mínu, stödd í almennings-
garði í Skotlandi,“ segir Heiðrún að
endingu. grþ
Skipuleggur ljósahátíð í Skotlandi á hverju ári
Rætt við Skagakonuna Heiðrúnu Þráinsdóttur Kelly, eina af skipuleggjendum
ljósahátíðar Aberdeen sem valin var hátíð ársins í Skotlandi 2016.
Heiðrún Þráinsdóttir Kelly er markaðs- og framleiðslustjóri hjá fyrirtækinu
Curated Place, sem sér um skipulagningu SPECTRA, ljósahátíðar Aberdeen.
Frá afhendingu verðlaunanna. Frá vinstri Dawn Schultz frá viðburðarteymi
Aberdeen, Heiðrún Þráinsdóttir Kelly markaðs- og framleiðstjóri og Andy Brydon
listrænn stjórnandi, ásamt þeim sem veitti verðlaunin í skotapilsinu.
Þessi bygging var ein af þeim sem lýst var upp á ljósahátíðinni í febrúar síðastliðnum.
Á ljósahátíðinni er unnið með myrkrið, þar sem ljósalistaverk og gagnvirkir
ljósaskúlptúrar lýsa upp skammdegið á ævintýralegan hátt.