Litli Bergþór - jul 2018, Side 51

Litli-Bergþór 51
L-B: Segðu mér af systkinum þínum.
Hreinn bróðir minn bjó um tíma heima með
pabba, en vann svo á Selfossi og hóf þar nám
í öldungadeild FSu með fullri vinnu og tók
stúdentspróf 1988, þá rúmlega fimmtugur. Lærði
síðan sagnfræði í Háskólanum til BA-prófs og
síðan til meistaraprófs. Hann vann á bókasafni
FSu frá 1992 þar til hann lést 1997. Hann var
ókvæntur og barnlaus.
Eyvindur fór ungur að heiman í Héraðs-
og Menntaskólann að Laugarvatni, lærði
húsgagnasmíði á verkstæði KÁ. Leiddist þaðan
í leiklistina þegar hann varð leikmyndasmiður
á verkstæði Þjóðleikhússins. Hann hefur þjónað
listagyðjunni á ýmsan hátt, í myndlist, tónlist,
ritlist og leiklist en býr nú á hjúkrunarheimilinu
Ási. Kona hans er Sjöfn Halldórsdóttir. Þau
bjuggu lengst af í Hátúni við Selfoss og eignuðust
fimm börn.
Sigrún fór í Héraðsskólann á Skógum, bjó á
Selfossi, í Búðardal og í Reykjavík. Hún er gift
Einari Þorbjörnssyni bifvélvirkja, en hann er
hálfbróðir Guðmundar á Reykhól á Skeiðum. Þau
eiga þrjú börn.
Edda vann sem tryggingafulltrúi í Reykjavík
en þau hjónin hafa síðustu ár verið suður á
Ítalíu, þar sem Erlendur sonur hennar og Jóna
Fanney Svavarsdóttir kona hans, búa og reka
ferðaskrifstofu ásamt því að syngja. Edda er gift
Ágústi Jónssyni og á fjögur börn.
L-B: En hver eru áhugamálin
- svona fyrir utan smíðarnar?
Ætli það sé ekki músíkin og svo félagsmálin, bæði
innan verkalýðshreyfingarinnar og félaga eins og
Lions og Oddfellow. Við Gígja tókum þátt í að
stofna Samkór Trésmiðafélags Reykjavíkur, eða
Trékórinn eins og hann var kallaður. Við vorum
lengi í kórnum og hann skipti mjög miklu máli í lífi
okkar í fjölmörg ár. Kórinn var gríðarlega öflugur
á sínum tíma en er nú hættur. Jakob Hallgrímsson
fiðluleikari var fyrsti stjórnandi kórsins, sonur
Hallgríms Jakobssonar tónskálds. Næstur kom
Guðjón Böðvar Jónsson tónlistarkennari, ég
tengdist honum örlítið af því að hann var sonur
ljósmóðurinnar, sem tók á móti okkur bræðrum í
Grindavík.
Ég hef gert tilraunir til að læra hitt og þetta í
tónlist, en alltaf skort þá þrautseigju sem þarf
til að ná einhverjum árangri. Ætli mesti frami
minn á tónlistarsviðinu hafi ekki verið þegar ég
var eitt sinn flettari hjá Carli Billich á tónleikum
í Gamla bíói – já, og svo rótari hjá Sinfóníunni,
bar pákurnar neðan úr kjallara upp á sviðið í
Háskólabíói!
Við Gígja höfum farið margar ferðir til Ítalíu,
bæði fyrir og eftir að Edda systir mín flutti út til
Verona. Eitt haustið fórum við á ítölskunámskeið
fyrir útlendinga og bjuggum þá hjá ítalskri
fjölskyldu. Úr því varð hinn besti kunningsskapur
og var okkur boðið í brúðkaup yngsta sonarins
fyrir tveimur árum.
Þá er komið að Gígju að segja frá sinni
ætt og uppruna
Ég er fædd á Kópaskeri árið 1939. Faðir minn var
Friðgeir Steingrímsson frá Hóli á Melrakkasléttu,
en hann bjó síðar á Raufarhöfn. Móðir mín var
Anna Árnadóttir frá Bakka á Kópaskeri. Þau
foreldrar mínir bjuggu ekki saman og ég átti ekkert
alsystkini. En mamma giftist Oddgeiri Péturssyni
og átti með honum fimm börn og fósturson og
pabbi eignaðist átta börn með sinni konu, svo
hálfsystkinahópurinn var stór. Svo voru systkini
mömmu ellefu, svo það er mikill ættbogi fyrir
norðan. Þau mamma og Oddgeir bjuggu fyrst á
Kópaskeri, en þegar ég var um 12 ára byggðu þau
nýbýli út úr landi Oddsstaða á Melrakkasléttu,
sem var æskuheimili Oddgeirs. Nýbýlið hét
Vatnsendi og voru þau þar með blandaðan búskap,
um 250 kindur, tvær kýr og tvö hross, þar til þau
fluttu til Reykjavíkur með allt krakkastóðið um
1958. Ég fór í húsmæðraskólann á Varmalandi
´58 -´59 og hafði áður verið á Héraðsskólanum að
Laugum í Reykjadal í þrjá vetur. Eftir að ég kom
suður vann ég í verslunum í Reykjavík á veturna
en fór á síldina á Raufarhöfn á sumrin. Haustið
1960 fór ég að vinna í Hampiðjunni og þar hitti ég
Örn, sem var líka að vinna þar, og þar með voru
örlögin ráðin!
Ég lærði síðan nudd og starfaði við það í
ein 20 ár, eða þar til hendurnar biluðu. Ég
var með nuddstofuna Heilsubrunninn í Húsi
Fjölskyldu-jólakammertónleikar í Lindatungu árið 2016.
Þrjár fiðlur, tveir gítarar og pianó.