Morgunblaðið - Sunnudagur - 08.09.2019, Blaðsíða 15

8.9. 2019 MORGUNBLAÐIÐ SUNNUDAGUR 15
hann tilboð um hlutverk og segist hann oft
hafa hafnað þeim.
„Mjög oft ákveða umboðsmennirnir það fyr-
ir mann því þeir vita hvað maður vill. Stundum
er þetta eitthvert drasl. Maður er aldrei betri
en bíómyndin sem maður leikur í. Ef maður
leikur í lélegri bíómynd er maður bara lélegur.
Ég hef alveg leikið í fullt af lélegum bíómynd-
um,“ segir hann og hlær.
„Maður er alltaf að taka áhættu, í hvert
skipti sem maður segir já við einhverju hlut-
verki.“
Það var ekki erfitt að segja já þegar Ingvar
var beðinn um að leika í stórmyndinni Fantas-
tic Beasts 2 en í henni eru ekki minni stjörnur
en Johnny Depp og Eddie Redmayne. „Ég er
búinn að þekkja Eddie frá því löngu áður en
hann varð frægur. Ég kynntist honum í Bret-
landi en hann var mikill aðdáandi Vesturports
og var mikið í kringum okkur þegar við vorum
að leika í London. Ég leik ekki stórt hlutverk í
myndinni; það var reyndar pínulítið á prenti
en stækkaði aðeins. Ég er að vona að ég verði í
næstu mynd, þeir hættu nefnilega við að drepa
mig,“ segir Ingvar en tökur á þriðju myndinni
eru ekki hafnar.
„J.K. Rowling og hennar teymi eru ennþá að
skrifa og hugsa sig um,“ segir Ingvar og segir
þetta hafa verið afar skemmtilegt verkefni.
Hvernig er Johnny Depp?
„Mjög fínn.“
Eruð þið vinir?
„Nei. Ég er ekki með númerið hjá honum,“
segir hann og hlær.
„Við hittumst og áttum að gera eina senu
saman sem var mjög náin og traustið mynd-
aðist strax. Hann var búinn að heyra um mig
frá leikstjóranum, að ég væri frábær gaur frá
Íslandi, þannig að við mynduðum strax þetta
bræðralag.“
Dreymir þig um heimsfrægð?
„Nei, alls ekki. Ég vil að mín verði minnst
fyrir góð störf. Það er allt svo forgengilegt
hvort sem er, við lifum þessu lífi og ef við verð-
um fræg þá fennir yfir það að lokum.“
Skáldaði fortíð Ásgeirs
Hvítur, hvítur dagur var sýnd í Cannes nýlega
og var Ingvar valinn besti leikarinn á Critics’
Week, einni af hliðardagskrám Cannes-
kvikmyndahátíðarinnar. „Það kom mér
kannski ekki á óvart að ég ynni verðlaun fyrir
myndina því ég er svo mikið í henni og hún er
góð. Það er enginn vafi á því; það er vandað til
verks og hún er líka djörf. Þetta er fersk list og
það vill svo til að ég er þarna í aðalhlutverki og
því ekkert óeðlilegt að ég fái verðlaun. En
þetta kom mér að einu leyti á óvart því þessi
verðlaun eru yfirleitt veitt ungum nýjum leik-
urum en formaður dómnefndar sagði að þau
hefðu ekki getað litið fram hjá þessari mynd.
Svo var hann svo sætur að segja við mig: „það
getur verið að þú sért of gamall fyrir Ísland en
ekki fyrir heiminn“,“ segir Ingvar og hlær.
Blaðamaður fullyrðir að hann sé ekkert of
gamall fyrir Íslendinga; hann hafi skapað
eftirminnilegar persónur sem allir elska eins
og Ásgeir í Ófærð sem því miður lét lífið í síð-
ustu seríu og skildi þjóðina eftir í sjokki.
Hvernig var að leika Ásgeir?
„Það var svolítið skemmtilegt því hann er
dulur karakter af því að hann er svo mikið á
bak við skrifborðið að þú færð ekki mikið að
kynnast honum. Hver hann er í rauninni. Fólk
fær að kynnast persónulega lífi Andra og Hin-
rikku en þetta þriðja hjól er alltaf á bak við
skrifborð á löggustöðinni. Þá þurfti ég sjálfur
að skálda upp fortíðina; hver væri hans bak-
grunnur, hans fjölskyldumynstur. Ég þarf
ekkert að tala um það heldur bara að vita það.“
Þannig að þú bjóst til fortíð fyrir Ásgeir sem
við hin fáum ekki að vita.
„Já. Meira að segja handritshöfundurinn
veit það ekki,“ segir hann sposkur.
„Ég er oft spurður að því hvort hægt sé að
gera eitthvað meira með þennan karakter og
það er verið að ræða hugmyndina að kynnast
þessum manni betur. Ég get ekkert sagt neitt
meira,“ segir Ingvar dularfullur og bætir við:
„Mér þykir vænt um það að fólk sakni hans.
Það er svona með þetta líf, við deyjum öll og
stundum áður en okkur finnst tíminn kominn
og þannig var það með Ásgeir. Hann bara dó,“
segir hann og brosir.
„En Ásgeir býr ennþá í mér og mér þætti
það ekki leiðinlegt að takast aftur á við hann.“
Ekki bara um mann í krísu
Við hverfum aftur til nútímans því kvikmyndin
Hvítur, hvítur dagur er Ingvari efst í huga
þessa dagana. Ingvar leikur sem fyrr segir að-
alhlutverkið í þessari nýju íslensku kvikmynd
eftir Hlyn Pálmason.
Ingvar segir hann frábæran leikstjóra. „Ég
er búinn að nota stór orð um hann og stend við
þau. Hlynur er svo skapandi. Hann er að búa
til myndlist, taka ljósmyndir og skrifa handrit
meðfram leikstjórninni og ég skoðaði verk
hans á sama tíma og ég var að byggja upp kar-
akterinn sem ég var að fara að leika hjá hon-
um. Það er frábært að fá svona menn sem
leggja svona mikið til, svona sterkt og litríkt
og ekkert kjaftæði,“ segir Ingvar.
Í myndinni leikur hann Ingimund, mann
sem misst hefur konuna sína og er myndin um
ást, hefnd og þráhyggju. Ingvar segir hlut-
verkið hafa verið í senn erfitt og ánægjulegt.
„Það var svo gaman að finna það eftir tök-
urnar að maður var að gera eitthvað virkilega
vel. Þetta er eins og að byggja hús sem aldrei
hefur verið byggt áður; búa til eitthvað nýtt.
Þér finnst þú vera að setja merkilegan stein í
vörðuna. Ég er búinn að hlakka svo til að Ís-
lendingar sjái myndina. Við sýndum hana á
Hornafirði og þá byrjaði maginn að ólga en
þegar hún var sýnd erlendis var ég alveg slak-
ur. Það skiptir mann miklu meira máli að sýna
þessa mynd hér heldur en úti í heimi,“ segir
hann og segir frá myndinni sem er dramatísk
en fyndin á köflum.
„Það má segja að myndin hafi hæga opnun
og svo smátt og smátt gerist það að hún tekur
fólk. Það er allt mögulegt í þessari mynd og
hún fær fólk til að hugsa. Hún er um mann
sem er með þráhyggju fyrir ákveðnum hlutum
og fer í sjálfspíningarferð með sig. Þetta er
líka mynd um fyrirgefningu,“ segir hann.
Er þetta um mann í krísu sem er að vinna í
sjálfum sér?
„Já, en það hljómar samt svo klisjukennt og
þessi mynd er ekki klisja. Hún er ekki um
mann sem er í krísu þó að hún sé um mann
sem er í krísu. Hún er um tvenns konar ást;
skilyrðislausa ást milli barns og afa og rosa-
lega tilfinningaþrungna ást milli manns og
konu sem er dáin,“ segir hann og nefnir að
sumir tökudagar hafi tekið á.
„Þetta voru erfiðir og kaldir dagar og Ída
Mekkín sem leikur afastelpuna mína þurfti að
setja sig í alls konar aðstæður sem hún hefur
ekki sett sig í áður. Rosalega stór þáttur í
myndinni er samband mitt og stelpunnar og
það samband sem myndaðist á milli okkar var
sent af himnum ofan og skiptir höfuðmáli fyrir
minn karakter.“
Hefði geta orðið prestur
Kaffið er löngu búið úr bollunum og Ingvar
orðinn allt of seinn á næsta fund en hann lætur
það ekki trufla samtal okkar. Það er nóg að
gerast hjá leikaranum. Næsta kvikmynda-
verkefni bíður handan við hornið og tjáir hann
blaðamanni að hann þurfi að fara út á land
daginn eftir.
„Ég er að fara í tökur á mynd sem heitir
Dýrið, alla vega gengur hún undir því nafni
núna. Þetta er mynd eftir Valdimar Jóhanns-
son en þetta er fyrsta mynd hans í fullri lengd.
Hann skrifaði handritið ásamt Sjón en í henni
leika Noomi Rapace, Hilmir Snær og Björn
Hlynur. Ég leik þarna lítið en mikilvægt hlut-
verk,“ segir hann og býst hann við að hún verði
frumsýnd á næsta ári.
Ingvar þarf svo að leggja land undir fót með
myndina Hvítur, hvítur dagur í farteskinu og
kynna hana fyrir heimsbyggðinni. Eftir ára-
mót stígur svo Ingvar á svið í verkinu Útsend-
ingin í Þjóðleikhúsinu. Það er mikið annríki en
Ingvar segist þó finna tíma til að slaka á.
„Ég eyði miklum tíma með Eddu og börn-
unum, þó að þau séu stálpuð. Ég fer í ræktina,
æfi mig á harmonikkuna mína og fer út í garð
að vinna garðverkin. Svo sinni ég foreldrum
mínum og les fyrir þau nánast á hverjum degi.
Ég fer líka mikið í leikhús, bíó og á tónleika.“
Hvað værir þú að gera í dag ef þú hefðir ekki
verið lokkaður út á leiklistarbrautina?
„Ég væri mögulega í tónlist því hún hefur
alltaf fylgt mér, bæði söngur og hljóðfæra-
leikur. Nú ef ekki það hefði ég farið í guðfræði.
Mér finnst svo skemmtilegt við lífið hvað það
er dularfullt og eitt af því dularfulla er þessi
spurning um Guð eða eitthvað sem er handan
skynfæranna okkar. Ég er samt sáttur við mitt
hlutskipti sem leikari. En ég hefði getað orðið
séra Ingvar.“
Ingvar segir sig ekki
dreyma um heims-
frægð, þrátt fyrir að
hafa leikið í Holly-
wood. Hann velur
vel þau hlutverk sem
hann kýs að leika og
hafnar þeim slæmu.
Morgunblaðið/Ásdís
Í Ófærð 2 lék Ingvar hinn dula lögreglumann Ásgeir sem þjóðin nú saknar. Ingvar segir mögulegt að
persónan Ásgeir fái nýtt líf í framtíðinni þótt ekkert sé enn ákveðið í þeim efnum.