Fjölrit RALA - 20.03.1995, Qupperneq 6

10. í skýrslunni er fjallað um markmið og aðferðir við uppgræðslu á heiðunum.
Varað er við áburðargjöf á gróið land, en hún gerbreytir gróðurfari. Ráðlegra er
talið að bera á rofjaðra og blásið land í nágrenni þeirra. Mikil og stopul
áburðargjöf á uppgræðslur er talin óráðleg þar sem hún getur valdið miklum
sveiflum og álagi á vistkerfið, einkum vegna þess að næringarástand jarðvegs og
beitarálag sveiflast þá mikið frá einu ári til annars. Bent er á að ef dregið er úr
áburðargjöf en áburði dreift víðar og jafnar megi búast við að beitarálag minnki
og gróður þróist þá frekar í átt til þess gróðurfars sem nú er að finna á
gamalgrónum svæðum á heiðunum. Ekki er talið ráðlegt að hætta áburðargjöf á
eldri uppgræðslur að svo stöddu þar sem þá er hætta á að gróðurþekja rofni og
uppskera minnki verulega.
4