Lögmannablaðið - 2020, Blaðsíða 26

26 LÖGMANNABLAÐIÐ TBL 02/20
Mér fannst ég svolítið berskjaldaður, að kenna sænskum
nemendum á þeirra heimavelli og þurfti að undirbúa mig
gríðarlega vel fyrir hvern kennslutíma. Sú kennsla gagnaðist
mér hins vegar vel því fyrir utan að þarna var ég í raun
neyddur til að ná betri tökum á tungumálinu þá var ég
að kenna sænskan félagarétt og þekking á honum hefur
komið að góðum notum í doktorsnáminu, þar sem hluti
af verkefni mínu varðar að staðsetja og greina evrópskt
félag sem hefur höfuðstöðvar í Svíþjóð. Mér hefur fundist
kennslan skemmtilegt starf en hún er líka nauðsynleg til
þess að brjóta upp vinnuna við verkefnið.“
Setur sjálfum sér skilafresti
Er ekki skrítin tilhugsun að taka sér fyrir hendur afmarkað verkefni
sem hefur skiladag að fimm árum liðnum? Var þessi staða óþægileg
í byrjun?
„Það er svolítil kúnst að skipuleggja sig. Rannsóknin sjálf
er auðvitað aðalatriðið og það er dálítið einkennilegt að
horfa á endapunkt sem er svona langt frá manni í tíma.
Ég hef því leitast við að skipta verkefninu upp í afmarkaða
þætti og setja sjálfum mér skilafresti í þeim efnum. Að því
leyti til hjálpar uppsetning námsins einnig, þar sem gerð
er sú krafa að maður verji framgang rannsóknarinnar með
ákveðnu millibili. Ég reyni að sinna rannsóknum og skrifum
að mestu fyrir hádegi, þegar ég er ferskur í kollinum, en
síðari hluti dagsins er meira nýttur í önnur verkefni, t.d.
lestur heimilda og skipulag.“
Arnljótur vill þó ekki meina að hann hafi hugsað mikið út
í það í byrjun hversu langt ferlið er.
„Þetta hentar kannski ekki öllum en ég get svo sem ekki
lagt mat á þennan tíma fyrr en hann er að baki. Ég hef lagt
upp með það að njóta ferðalagsins á hverjum tíma eins og
kostur er, þrátt fyrir að það takist vissulega misvel. Auðvitað
hafa komið tímar þar sem ég hef velt því fyrir mér hvað ég
væri búinn að koma mér út í en mér hefur vaxið ásmegin
eftir því sem liðið hefur á námið “.
Kennslan skemmtileg
Arnljótur stefnir að því að verja doktorsverkefnið sumarið 2021
en hefur hann gert upp við sig hvað hann tekur sér fyrir hendur
að því loknu?
„Ég er í rauninni opinn fyrir því að starfa innan eða
utan akademíunnar. Lengst af hef ég getað sinnt öðrum
afmörkuðum verkefnum samhliða doktorsverkefninu og
síðari hluta ársins 2019 hef ég verið í leyfi frá verkefninu
og unnið fyrir EFTA-dómstólinn í Lúxemborg. Mér hefur
fundist það hjálpa til að skipta aðeins um umhverfi og
verkefni, bæði fyrir doktorsnámið og kennsluna. En ég veit
ekki alveg hvað tekur við þegar náminu lýkur. Eflaust sjá
flestir doktorsnemar fyrir sér að starfa innan akademíunnar,
við fræðiskrif og kennslu. Hér í Lundi er t.d. gerð sú krafa
að yfirmenn hvers námskeiðs innan lagadeildar hafi
doktorsgráðu. Sjálfum finnst mér spennandi að geta í
framtíðinni tengt praktík og fræðimennsku, frá einum
tíma til annars og tel í raun að þannig nýtist þekkingin
best á þeim réttarsviðum sem ég hef sérhæft mig, sem
er félagaréttur auk Evrópuréttar. Fyrst og fremst er ég
mjög ánægður með að hafa stigið þetta skref og er viss
um að þessi reynsla á eftir að nýtast mér vel í framtíðinni.
Sérstaklega hefur mér fundist kennslan skemmtileg og ég
hef mikinn áhuga á því að gera meira af því á næstu árum.
Hvort að það verður samhliða lögmennsku eða öðrum
verkefnum verður að koma í ljós“.
Ágúst Karl Karlsson og Daníel Isebarn Ágústsson.