Lögmannablaðið - 2019, Side 4

4 LÖGMANNABLAÐIÐ TBL 04/19
LÖGMANNABLAÐIÐ 25 ÁRA OG
BREYTINGAR FRAMUNDAN
Lögmannablaðið hefur verið gefið út frá árinu 1995,
en átti sína fyrirrennara. Blaðið verður því 25 ára á
næsta ári. Á afmælisárinu verða þær breytingar gerðar
að blaðið verður ekki sent til félagsmanna í blaðaformi
nema óskir um slíkt berist sérstaklega. Rafræn útgáfa
verður meginreglan en blaðið verður þó áfram sent á
stofnanir stjórnsýslunnar, fjölmiðla, til háskólanna og
bókasafna og á þær lögmannsstofur sem þess óska.
Margir lögmenn hafa nú þegar afþakkað pappírseintak
enda er áherslan á rafræna útgáfu liður í að svara
kalli nútímans og samfélagslegum breytingum.
Ritstjórn blaðsins bar tillögu þessa efnis undir stjórn
Lögmannafélagsins í byrjun ársins. Samþykkt var
að áfram yrði hægt að óska eftir að fá blaðið sent í
pappírsformi en meginreglan væri að Lögmannablaðið
kæmi út rafrænt frá og með næstu áramótum.
Alltaf er nokkur missir af blöðum og tímaritum sem taka
þetta skref og því skal árétta að á sama hátt og það hefur
verið hægt að óska eftir einungis rafrænu blaði verður
frá og með árinu 2020 hægt að óska eftir prentuðu
eintaki. Eyðublöð þess efnis er að finna á heimasíðu
félagsins www.lmfi.is

Þetta er síðasta Lögmannablaðið sem prentað er í stóru
upplagi (hafa verið um 1200 eintök) nema að seinni
tíma ritstjórnir breyti aftur yfir í prentað blað. Ritstjórn
blaðsins vonar að breytingin falli lögmönnum í geð.
GAGNAGRUNNUR TIL VARNAR
PENINGAÞVÆTTI
Lögmannafélag Íslands hefur tekið í notkun alþjóðlegan
gagngrunn frá fyrirtækinu Accuity. Gagnagrunnurinn gefur
lögmönnum tækifæri á að kanna bakgrunn væntanlegra
viðskiptamanna sem hluta af mati á hættu á misnotkun
þjónustunnar með tilliti til reglna um aðgerðir gegn
peningaþvætti og fjármögnunar hryðjuverka.
Gagnagrunnurinn hefur m.a. að geyma umfangsmiklar
upplýsingar um einstaklinga í áhættuhópi vegna
stjórnmálalegra tengsla (Politically Exposed Person eða
PEPs) og fyrirtæki sem tengjast slíkum einstaklingum, sem
kallað geta á nánari úttekt eða rannsókn á hlutaðeigandi
vegna aukinnar hættu á misnotkun.
Aðgengi að þessum gagnagrunni, sem er til reynslu í eitt
ár, er í gegnum tölvu sem staðsett er á bókasafni í húsnæði
Lögmannafélagsins að Álftamýri 9. Eru lögmenn hvattir
til að nýta sér þessa nýju þjónustu til að auka öryggi við
skoðun á bakgrunni þeirra einstaklinga og/eða fyrirtækja
sem leita eftir kaupum á þjónustu lögmanna.