Börn og menning - 01.04.2009, Síða 29

Pabbi les
29
röðin komin að yngri syninum. Hann hefur
mjög fjölbreyttan áhuga á bókum og því
er erfitt að taka einhverjar sérstaklega út
úr. Þessa dagana er hann mjög heillaður af
leikritum og ævintýrum. Það var mikið hlegið
þegar við lásum öll ævintýrin um hann Emil
og ekki erfitt fyrir þann stutta að setja sig
í spor prakkarans í Kattholti. Atvikið þegar
Emil hífði ídu upp í fánastöng reynist honum
ógleymalegt og reyndar mér líka alveg frá
því ég heyrði fyrst af þessari ógurlegu tilraun
Emils. Annað verk sem stendur upp úr er Fólk
og ræningjar í Kardemommubæ. Líkt og hjá
mörgum börnum eru ræningjarnir í mestu
uppáhaldi hjá honum enda óútreiknanlegir
kumpánar þar á ferð. Einnig vil ég nefna
Spiderwick-bækurnar sem fá strákinn til að
iða af spenningi enda barátta milli góðs og
ills í hæstu hæðum.
Spennandi fræðibækur
Þá er komið að elsta stráknum sem er
mikill bókaormur og eyðir oft mörgum
klukkustundum á dag í lestur. Síðasta sumar
var hann sennilega með sögulegt met í lestri
í lestrarátaki Bókasafns Hafnarfjarðar. Hann
fór snemma að hafa gaman af hvers kyns
fræðibókum og vil ég nefna Mannslíkaminn;
Alfræði barnanna um mannslikamann, Atlas
barnanna; Fyrsta bók barnanna um löndin I
heiminum og Dýraalfræði fjölskyldunnar sem
eru virkilega vel skrifaðar fyrir fróðleiksfúsa
krakka sem og fullorðna. Uppsetning
bókanna hentar lika mjög vel og er því
hver blaðsíða spennandi heimur. Þar sem
ég er enskukennari finnst stráknum mjög
spennandi að taka enskar fræðibækur og
láta mig þýða fyrir sig og verða þá oftar en
ekki flugvéla- og bílabækur fyrir valinu þó
stöku sinnum læðist ein og ein myndasaga.
Síðastliðið ár hefur hann drukkið í sig hverja
Syrpuna á fætur annarri með Andrési önd og
félögum en upp á síðkastið hefur strákurninn
horfið inn í dagbækur Berts og klárað hverja
bókina á eftir annarri og pabbi má ekki vita
allt sem stendur í þeim. Ætli það hafi ekki
eitthvað með aldurinn að gera!
Nærvera og tenging með hjálp
bókanna
Bækur eru og verða alltaf ómissandi partur
af heimilishaldi á mínu heimili. Það er
fátt betra en að eyða síðustu mínútum
dagsins með börnunum á jafnskemmtilegan
máta og við lestur. Auk nærverunnar
og skemmtanagildisins þá eru bækurnar
fræðandi og takast oft á við siðferðislegar
og uppeldislegar aðstæður. Ekki hef ég tölu
á þvf hversu oft við foreldrarnir vitnuðum í
söguna um Láka þegaryngri strákurinn gerði
eitthvað af sér svo ekki sé talað um orðaforða
og umhverfisvitund hjá yngsta barninu. Því
hvet ég að lokum alla pabba (og mömmur!)
til að nýta sér mátt bókanna og tengjast
börnum sínum enn frekar með góðum lestri.
Þessi stutta samverustund gleður ekki síður
okkur eldri „börnin" því við megum ekki
gleyma barninu sem býr innra með okkur
öllum.
Flöfundur er framhaldsskólakennari