Strandapósturinn - 01.06.1977, Side 65

það var byggt árið 1911. Rafmagnsstöð til ljósa og suðu byggði
hann 1920. Einnig var hann mikill fjárræktarmaður og fóðraði
búpening sinn mjög vel.
Halldór Kr. Júlíusson sýslumaður í Strandasýslu frá 1909—
1938 sat á Borðeyri en rak jafnframt búskap á Valdasteinsstöð-
um.
Halldór var mikill persónuleiki og röggsamt yfirvald. Hann
gat verið hrjúfur á köflum, en raungóður og vildi hvers manns
vanda leysa eftir því sem í hans valdi stóð. Hann varð þjóð-
kunnur er hann gegndi störfum rannsóknardómara í Hnífsdals-
málinu árin 1927—1928. Þáverandi dómsmálaráðherra Jónas
Jónsson lét þau orð falla að rannsókn lokinni að hún hefði verið
framkvæmd af hendi rannsóknardómarans af ítrustu ná-
kvæmni.
Einn hausttíma var ég hjá Halldóri sýslumanni við skriftir.
Sýslumaður hafði þann sið að ganga um gólf þegar hann las mér
fyrir og mátti ég hafa mig allan við að fylgja honum eftir, því ég
var óvanur að skrifa svo hratt. Ég skrapp heim um helgar tvisvar
sinnum um haustið og var þar eina nótt. Sýslumaður tók mér
alltaf hlýlega þegar ég kom úr þessum ferðum og gætti þess að ég
fengi mat og færi úr vosklæðum ef ég var blautur. Halldór var
hressilegur maður og oft skemmtilegur. Einkum þótti honum
gaman að tala um búskap. Hann rak eingöngu sauðfjárbúskap á
eignarjörð sinni og átti mjög fallegt fé.
Kristmundur Jónsson frá Kolbeinsá var kaupfélagsstjóri við
Kaupfélag Hrútfirðinga á Borðeyri frá 1921—1935. Hann fór í
Flensborgarskólann og lauk gagnfræðaprófi 1905 og kennara-
prófi 1906. Stundaði kennslustörf um skeið. Síðan búskap á
Kolbeinsá. Kristmundur var bráðgreindur maður og fórst
kaupfélagsstjórnin mjög vel úr hendi. Undir hans stjórn blómg-
aðist kaupfélagið mjög. Þar kom að hin vinsæla og rótgróna
Riisverslun varð að gefast upp og seldi hún kaupfélaginu eignir
sínar á Borðeyri árið 1930.
Það var mikið starf sem Kristmundur leysti af hendi við
Kaupfélag Hrútfirðinga. Þá voru starfsskilyrði allt önnur en nú
tíðkast og starfslið fámennt. Hann var mjög vinsæll í starfi sínu
63