Morgunblaðið - 22.10.2021, Qupperneq 70

70 MORGUNBLAÐIÐ FÖSTUDAGUR 22. OKTÓBER 2021 VIÐSKIPTAMOGGINN FRAMÚRSKARANDI FYRIRTÆKI
Þ
að var í ársbyrjun 1912 sem tveir
danskir athafnamenn, Fritz Nathan
og Carl Olsen, stofnuðu heildsöluna
Nathan & Olsen, eitt rótgrónasta
verslunarfyrirtæki landsins.
Nathan & Olsen er nú dótturfyrirtæki
rekstrarfélagsins 1912 ehf. og eru höfuð-
stöðvarnar í Klettagörðum 19.
Ásamt því að flytja inn nauðsynjavörur flutti
fyrirtækið út fisk og landbúnaðarafurðir. Það
starfrækti útibú víða um land, að því er segir á
vef fyrirtækisins, og átti um tíma flutningaskip
í siglingum milli hafna innanlands og erlendis.
Voru millilandaviðskiptin fyrst og fremst við
Bandaríkin og Danmörku.
Lísa Björk Óskarsdóttir, framkvæmdastjóri
Nathan & Olsen, segir fyrirtækið hafa frá upp-
hafi stundað innflutning og sölu á matvörum
og dagvörum.
„Nú sérhæfir Nathan & Olsen sig í innflutn-
ingi, sölu og markaðssetningu á vörum á mat-
vöru- og snyrtivörumarkaði. Þannig er aðal-
starfsemi okkar að bjóða upp á gæðavörur
fyrir dagvörumarkað ásamt því að bjóða upp á
nýjar vörur og fylgja straumum hvers tíma. Í
faraldrinum snerist allt um að birgja sig upp
og eiga varning. Nú horfum við fram á veginn
og getum aftur sett orku í að bjóða upp á eitt-
hvað nýtt og spennandi,“ segir Lísa Björk.
Með langa reynslu af
verslunarstörfum
Lísa Björk varð framkvæmdastjóri árið
2019. Hún er rekstrarfræðingur frá Háskól-
anum á Bifröst og með langa reynslu af versl-
un. Hún var framkvæmdastjóri Provision,
deildarstjóri hjá heildsölu í matvörugeiranum í
áratug, starfaði sem fjármálastjóri og síðar
markaðsstjóri hjá IKEA í sex ár og starfaði
jafnframt í tæknigeiranum og banka.
En hvað skyldi gera Nathan & Olsen að
fyrirmyndarfyrirtæki?
„Það eru auðvitað margir samverkandi
þættir eins og heilbrigður rekstur, skýr mark-
mið, framsækni og almenn skynsemi. Lykil-
þáttur er auðvitað okkar frábæra starfsfólk,
sem vinnur eftir skýrum ferlum og ástríðan og
metnaðurinn í því sem við gerum saman sem
heild.“
Hefur metnað til að gera vel
Hvernig myndirðu lýsa vinnustaðamenning-
unni?
„Hún einkennist af liðsheild, krafti og fram-
sækni. Hér er samansafn af öflugu fólki sem
hefur metnað og ástríðu til að gera vel. Þau
eru sannir Íslendingar; það er ekki hætt fyrr
en markmiðunum hefur verið náð. Hér eru
margir snjallir sérfræðingar sem eru sjálf-
stæðir í sínum störfum en vinna samt allir vel
saman og allir eru tilbúnir að hjálpa hver
öðrum.“
Allir þurfa að leggjast á eitt
Hvernig heldurðu uppi góðum starfsanda?
„Stjórnendur þurfa að tryggja góða umgjörð
en þetta er teymisvinna. Allir í hópnum þurfa að
leggjast á eitt í að viðhalda góðum starfsanda og
hafa gaman saman. Við erum með mannauðs-
stjóra og erum hluti af samstæðu með mörgu
öðru starfsfólki. Við reynum að hlúa vel að fólk-
inu og hittast reglulega sem var erfitt í faraldr-
inum. Við gerðum það sem við gátum þrátt fyrir
takmarkanir. Við erum líka með reglulegar
mannauðsmælingar sem eykur virkni starfs-
manna og hjálpar okkur að bregðast við. Við er-
um þétt og samstæð heild og störfum í opnu
umhverfi. Við hittumst á formlegum og óform-
legum fundum og spjöllum og náum vel saman.“
Hver er stefna ykkar í jafnréttismálum?
„Lögð er áhersla á að gæta jafnréttis í hví-
vetna og unnið er eftir mannauðsstefnu, jafn-
launastefnu og persónuverndarstefnu, svo
dæmi séu tekin. Við erum einnig jafnlauna-
vottuð og stefnan er að sjálfsögðu að viðhalda
því og passa upp á að allir hafi sömu tækifæri
og að það sé engin mismunun.“
Allir hafa jafnan rétt
Hvernig er því framfylgt?
„Við erum með mannauðsstjóra sem tekur
út allar vísitölurnar í þeim efnum. Hér hafa all-
ir jafnan rétt til að sækja um ný störf. Við
pössum upp á launin og reynum að hafa kynja-
hlutföllin sem jöfnust meðal yfirmanna, milli-
stjórnenda og innan hvers sviðs, eins og kostur
er. Við erum reyndar með snyrtivörusvið þar
sem afgerandi meirihluti starfsfólksins er kon-
ur en því er tekið fagnandi þegar karlmaður
sækir um starf þar,“ segir Lísa Björk.
baldura@mbl.is
Horfa á ný fram á veginn
Morgunblaðið/Eggert
Lísa Björk Óskarsdóttir, framkvæmdastjóri
Nathan & Olsen, leggur ríka áherslu á öfluga
liðsheild og samheldni starfsmanna.
95. sæti
NATHAN OG
OLSEN
Stórt 95. sæti
Lísa Björk Óskarsdóttir
Höfuðstöðvar Nathan & Olsen eru í Klettagörðum í Reykjavík. Á lagernum. Vörur N&O hafa lengi verið hluti af lífi Íslendinga.