Morgunblaðið - 22.10.2021, Síða 74

74 MORGUNBLAÐIÐ FÖSTUDAGUR 22. OKTÓBER 2021 VIÐSKIPTAMOGGINN FRAMÚRSKARANDI FYRIRTÆKI
S
teypustöðin hóf starfsemi árið 1947
og byggir því á traustum grunni.
Fyrirtækið var brautryðjandi í fram-
leiðslu á steypu úr steypubifreiðum í
Evrópu, að því er segir á vef félagsins, en
fyrstu árin var mikill uppgangur eftir lok síðari
heimsstyrjaldar.
„Lausnaframboð Steypustöðvarinnar nær til
margra sviða í byggingarframkvæmdum allt
frá framleiðslu og dreifingu á blautsteypu,
framleiðslu á forsteyptum einingum og hellum,
múrvörum, floti og fylliefnum til framkvæmda.
Auk þess leggur félagið áherslu á endurvinnslu
á steypu og malbiki í takt við sjálfbærnimark-
miðin okkar,“ segir Björn Ingi Victorsson, for-
stjóri félagsins.
Steypustöðin er í hópi framúrskarandi
fyrirtækja á lista Creditinfo.
Víða um landið
Steypustöðvarnar eru átta talsins; í Borgar-
nesi, á Malarhöfða í Reykjavik, í Hafnarfirði, í
Helguvík, á Selfossi og í Vík í Mýrdal, auk þess
sem félagið á tvær færanlegar steypustöðvar
sem eykur, að sögn Björns, sveigjanleika og
hagræðingu í stærri verkefnum. Framleiðslu-
geta félagsins í blautsteypu er um 600 m3 á
klukkutíma. Þá er fyrirtækið með múrbúð á
Malarhöfða sem selur til fagmanna.
„Við framleiðum blautsteypu og forsteyptar
einingar. Við steypum t.a.m. húseiningar,
hellur, sorptunnuskýli, brunna og rör í mörg-
um stærðum og gerðum. Við endurvinnum
malbik fyrir malbikunarstöðvarnar, en erum
ekki malbikunarfyrirtæki. Þá endurvinnum við
steypu og notum hana ýmist aftur eða seljum
sem fyllingarefni. Við endurvinnum mikið af
okkar efni sjálf,“ segir Björn Ingi.
Fyrirtækið er jafnframt með námur í Vatns-
skarði og við Hólabrú en sú síðarnefnda er
nokkra kílómetra frá Hvalfjarðargöngum,
Akranesmegin, á leiðinni í Borgarnes.
Hefur keypt önnur félög
Það á þátt í vexti Steypustöðvarinnar að
fyrirtækið hefur keypt önnur félög í
byggingargeiranum.
Fyrirtækið hefur frá árinu 2003 rekið hellu-
verksmiðju í Álfhellu í Hafnarfirði.
Árið 2016 keypti félagið Loftorku Borgar-
nesi og hefur einingaframleiðsla síðan verið
vaxandi þáttur í starfseminni. Steypustöðin og
Loftorka Borgarnesi sameinuðust í ársbyrjun
2019.
Árið 2018 keypti Steypustöðin félögin Alex-
ander Ólafsson og Tak-Malbik, sem stofnuð
voru á 8. áratug síðustu aldar, í því skyni að
byggja upp efnisvinnslu. Félögin voru sam-
einuð í ársbyrjun 2019.
Gervigreind í steypu
Um 315 manns starfa hjá Steypustöðinni
víða um landið. Að sögn Björns Inga er
meginstarfsemin framleiðsla á blautsteypu.
Stöðugt sé unnið að vöruþróun og innleiðingu
nýjunga í framleiðslu.
„Það nýjasta er að við höfum sett á markað
snjallsteypu sem eru þráðlausir nemar sem
settir eru út í steypuna á verkstað. Upplýs-
ingar um styrk og hita berast í rauntíma frá
nemunum og forritið notar síðan gervigreind
til að ráðleggja notanda um næstu skref.
Snjallsteypa styttir verktíma og tryggir
gæði. Fram að þessu hefur þurft að meta
ástand steypu með höndunum og áætla. Það
getur þýtt að slegið er of snemma frá eða beð-
ið lengur en þörf er á, sem hefur áhrif á gæði
steypunnar og tímalengd verkefna. Hér á
landi eru miklar hitabreytingar í veðurfari og
nákvæmar upplýsingar um ástand steyp-
unnar skilar sér í skilvirkari framkvæmd,“
segir Björn Ingi um þessa nýju tækni.
Það megi raunar segja að blautsteypan sem
framleidd er í dag sé hátæknivara sem verður
til með tölvustýrðum framleiðsluferlum sem
hefjast í steypustöð og lýkur með dælingu úr
steypubíl á byggingarstað. Félagið er með
eigin rannsóknarstofu þar sem stöðugt er
fylgst með gæðum allra ferla framleiðslunnar.
Samdráttur í faraldrinum
Björn Ingi segir aðspurður að veltan hjá
fyrirtækinu hafi dregist saman í kórónu-
veirufaraldrinum í fyrra.
„Bransinn er og hefur verið sveiflu-
kenndur. Við það bætist að veturinn 2020 var
mjög erfiður til framkvæmda og svo kom
faraldurinn ofan í hann,“ segir Björn Ingi. Nú
sé geirinn aftur á uppleið.
Rekstrartekjur samstæðunnar voru 8.630
milljónir árið 2019 en 7.847 milljónir í fyrra.
Hagnaðurinn var 438 milljónir 2019 en 312
milljónir í fyrra. Eigið fé félagsins lækkaði milli
ára og var 2.268 milljónir í fyrra og er eigin-
fjárhlutfall félagsins 32% í árslok 2020 sam-
anborið við 30,5% árið á undan. Samanlagður
launakostnaður var um þrír milljarðar í fyrra
og breyttist lítið milli ára.
Hittast reglulega
Steypustöðin er sem áður segir í hópi fram-
úrskarandi fyrirtækja á lista Creditinfo í ár líkt
og síðustu tvö ár þar á undan.
En hvað skyldi gera fyrirtækið sérstakt?
„Fyrirtækið er 75 ára gamalt, með framúr-
skarandi starfsfólk og sterka eiginfjárstöðu.
Ég held að það sé grunnurinn að því að gera
fyrirtækið að fyrirmyndarfyrirtæki,“ segir
Björn Ingi.
En hvernig skyldu stjórnendur halda góðum
starfsanda og keppnisanda?
„Það er gert með ýmsum hætti. Við teljum
mikilvægt að halda starfsfólki upplýstu um mál-
efni fyrirtækisins og gerum það á innri vefnum
Workplace. Við hugum að öryggismálum og
leggjum áherslu á að allir komi heilir heim eftir
daginn. Auk þess reynum við að hittast og
skemmta okkur saman og hlökkum til að gera
meira að því nú þegar faraldurinn er að líða und-
ir lok,“ segir Björn Ingi Victorsson að lokum.
baldura@mbl.is
Snjallsteypan eykur gæðin
Morgunblaðið/Kristinn Magnússon
102. sæti
STEYPU-
STÖÐIN
Stórt 102. sæti
Björn Ingi Victorsson
Ljósmynd/Eiríkur Hafdal
Steypustöðin hefur innleitt nýja tækni til að fylgjast með steypunni á verkstað.
Björn Ingi Victorsson, forstjóri
Steypustöðvarinnar, segir starf-
semina hvíla á gömlum merg.