Morgunblaðið - 13.05.2022, Síða 36

36 MENNING
MORGUNBLAÐIÐ FÖSTUDAGUR 13. MAÍ 2022
Einar Falur Ingólfsson
efi@mbl.is
Tónlistin og verkfræðin styðja vel
við hvort annað. Svo er þetta allt
einn stór spuni,“ segir djasspíanist-
inn, tónskáldið og verkfræðingurinn
Magnús Rannver Rafnsson þegar
rætt er við hann um nýútkominn
geisladisk, Concrete Abstracts.
Þetta er önnur platan sem kemur út
með lögum Magnúsar en á þessari
nýju leika, auk Magnúsar í píanóið,
þeir Ari Bragi Kárason á trompet,
Birgir Steinn Theodórsson á bassa,
Einar Scheving á trommur og gítar-
leikararnir Andr-
és Þór Gunn-
laugsson og
Hilmar Jensson.
Magnús setti
hópinn saman til
að flytja tónlist
sína. „Þannig er
það í þessum bransa, einhver setur
saman rammann um tónlistina sem
allir mætast í. Þessir kappar koma
til móts við mig – þeir eru allir mjög
færir tónlistarmenn – og saman setj-
um við einhverja heildarmynd á
þetta,“ segir hann.
„Hver kemur með sitt hljóðfæri
og sinn karakter. Sumt af tónlistinni
er skrifað og sumt spunnið; það er
mikið frelsi í djassinum.“
Magnús segir að fyrir upptökur á
diski sem þessum komi hópur venju-
lega saman nokkrum sinnum, æfi og
leiki lögin á tónleikum. „En við lent-
um í Covid! Við vorum byrjaðir að
æfa vel haustið 2020 en svo var öllu
skellt aftur í lás. Við ákváðum samt
að kýla á þetta, tókum tónlistina upp
á tveimur dögum í janúar í fyrra og
náðum líka að leika á einum tón-
leikum áður, sem var fínt. En Covid
setti mark á allan ferilinn.“
Þetta er ákveðinn lífsstíll
Á Concrete Abstracts eru ellefu
lög, samin og útsett af Magnúsi, fyr-
ir utan Vögguvísu eftir Jón Leifs
sem hljómaði í kvikmyndinni Tár úr
steini sem fjallar um tónskáldið.
„Mér finnst þetta flott og aðgengi-
legt lag. Kvikmyndin opnaði fyrir
mörgum á tónlist Jóns Leifs og ég
hef verið að reyna mig við fleiri lög
eftir hann í nýjum útsetningum.“
Magnús Rannver er upphaflega
menntaður í klassískum píanóleik.
Hann lærði svo verkfræði í Stutt-
gart í Þýskalandi. Þegar hann kom
aftur heim rétt fyrir síðustu aldamót
fór hann aftur að sækja tíma í píanó-
leik, í FÍH hjá Svönu Víkingsdóttur.
„Ég dustaði rykið af klassíkinni hjá
henni, kláraði sjöunda stig, en smit-
aðist af djassinum sem var þar allt í
kring og langaði að spreyta mig á því
sviði.
Ég hef alltaf verið spilandi, þetta
er ákveðinn lífsstíll. Með því að
sækja tíma hjá leiðbeinanda er fók-
usinn skýrari og betra að setja sér
markmið að vinna að.“
Magnús starfar sem verkfræð-
ingur og segir tekjurnar koma það-
an að stærstum hluta. Hann er mikið
í nýsköpun og tækniþróun. „Ég er í
skapandi hliðinni á verkfræði, að
framleiða hugmyndir, þróa þær og
leggja fram lausnir sem virka, og
tónlist og verkfræði ganga fyrir mér
út á frjóa hugsun. Að skapa eitthvað
nýtt sem er einhvers virði.“
Magnús segir að til standi að
fylgja útgáfu disksins eftir með tón-
leikum. „Það er vissulega verkefni
að ná saman sex manna bandi, þar
sem allir vasast í ýmsu.“
Það vekur athygli að tveir gítar-
leikarar eru í sveitinni, Andrés Þór
og Hilmar, og setur það svip á tón-
listina. „Þetta eru tveir af bestu
djassgítarleikurum landsins, gríðar-
lega ólíkir, og það er gaman að
stefna þeim saman. Þetta gengur að
vissu leyti líka út á að skapa karakt-
er og sérkenni. Ég trúði á þá hug-
mynd að tefla þeim saman með þess-
um hætti,“ segir Magnús.
Og svo er ástæða fyrir því að
Magnús vísar í steypu í heiti plöt-
unnar og skrifar um hana í bæklingi
sem fylgir. „Jú, steypa er mitt
meginsvið í verkfræðinni. Mitt sér-
svið er í grunninn burðavirkjafræði
og efna- og eðlisfræði mannvirkja.
Ég hef hannað margvísleg mann-
virki, húsbyggingar, turna, tanka,
brýr, sem dæmi, í öllum byggingar-
efnum. Eftir hrun bauðst mér staða
við tækniháskóla í Þrándheimi og ég
var þar við kennslu og nýsköpun frá
2009 til 2021. Þar kenndi ég meðal
annars steypufræðin.“
Og hann nálgast svo steypuna
með öðrum hætti í tónlistinni. „Ég
flétta þessu öllu saman já og finnst
það skemmtilegt.“
Morgunblaðið/Eggert
Steypufræðingur „Sumt af tónlistinni er skrifað og sumt spunnið; það er mikið frelsi í djassinum,“ segir Magnús
Rannver um tónlist hans á diskinum nýja. Heitið vísar í steypu en Magnús er sérfræðingur í steypufræðum.
Er allt einn stór spuni
- Lög eftir píanistann, tónskáldið og verkfræðinginn Magnús Rannver Rafns-
son hljóma á diskinum Concrete Abstracts - Kunnir djassmenn í hljómsveitinni
Grasrótarhátíðin Reykjavík Fringe
Festival verður haldin 24. júní til 3.
júlí og verður hitað upp fyrir hana í
kvöld með kynningarhófinu Korter
í Fringe í Húsi Máls og menningar
við Laugaveg, frá kl. 22 til 1. Munu
koma þar fram ýmsir skemmti-
kraftar sem eru með sýningar á há-
tíðinni og gestir geta því fengið for-
smekkinn af dagskránni.
Kynnir kvöldsins verður Bibi
Bioux kabarettskemmtikraftur,
réttu nafni Brynhildur Björns-
dóttir, og mun hún syngja lög úr
sýningu sinni. Sérstaklega margar
kabarettsýningar verða á Fringe í
ár og sérstök börlesk hátíðardag-
skrá. Húlladansarinn Bobbie Mic-
helle kemur fram í kynningarhóf-
inu sem og Miss S úr kabarett-
hópnum Sóðabrók. Tveir grínistar
munu troða upp, Helgi Steinar og
Sindri Sparkle, og undir lokin þeyt-
ir Owen Hindley skífum og gestir
geta stigið dans. 90 atriði verða á
dagskrá Fringe og má kynna sér
hátíðina á rvkfringe.is.
Hitað upp fyrir Reykjavík Fringe
Kynnir Bibi Bioux kabarettskemmtikraftur,
réttu nafni Brynhildur Björnsdóttir.
Breska ríkisútvarpið, BBC, mun
tvöfalda framleiðslu á nýjum
gamanþáttum, skv. frétt á vef The
Guardian. Segir þar að tvöfalt fleiri
upphafsþættir, pilot á ensku, verði
gerðir og tíu milljónir sterlings-
punda lagðar aukalega í slíka fram-
leiðslu. Umsjónarmaður BBC
Comedy, gamanefnisdeildar BBC,
Jon Petrie, segir að til standi að
bjóða upp á breskar persónur sem
fólk geti tengt við og með nýrri
nálgun. Þá standi til að höfða til
yngri áhorfenda með því að fram-
leiða efni sem þeir tengi við.
Gamanþátta-
röðin Mother-
land sem BBC
framleiðir hlaut
Bafta-verðlaun
fyrir skömmu og
af öðrum seríum
sem notið hafa
mikilla vinsælda
og hlotið verð-
laun má nefna
Fleabag sem er
sköpunarverk Phoebe Waller-
Bridge sem fór einnig með aðal-
hlutverkið.
BBC eykur framleiðslu á gamanþáttum
Phoebe
Waller-Bridge
Glimmer er yfirskrift tónleika sem
haldnir verða í Verksmiðjunni á
Hjalteyri við Eyjafjörð í kvöld kl.
20. Þar koma fram Michaela Grill,
Sophie Trudeau, Hafdís Bjarna-
dóttir, Brynjar Daðason og Guð-
mundur Ari Arnalds. Tónleikar
með sama nafni verða haldnir í
Mengi í Reykjavík á sunnudaginn
kemur kl. 20.
„Sophie Trudeau og Michaela
Grill byrjuðu að vinna saman 2015
og eru þekktar fyrir tilfinninga-
sama, lifandi tónlistar og mynd-
gjörninga. Þær vinna einnig í sam-
einingu að innsetningarverkum
með áherslu á náin tengsl myndar
og hljóðs. Hljóðræn og myndræn
könnun á heimi viðkvæmra sam-
setninga: laglína, skuggaspils og
enn þá óþekktra minninga,“ segir í
tilkynningu um viðburðinn.
Rautt Sophie Trudeau og Michaela Grill
skapa saman tónlist og myndgjörninga.
Glimmer á Hjalt-
eyri og í Mengi
Kristín Svava
Tómasdóttir
ræðir um farsótt-
ir í borginni í
Mengi í kvöld kl.
21. Erindið er
hluti af fyrir-
lestraröð þar
sem sjónunm er
beint að áhuga-
verðum mál-
efnum og ein-
staklingum sem litað hafa
menningar- og mannlíf borgar-
innar. Kristín Svava hefur unnið að
bók um sögu gamla Farsótta-
hússins í Þingholtsstræti 25 sem
lengi var miðstöð lækninga og sótt-
varna í Reykjavík. Hún rifjar upp
gamlar sögur úr Þingholtunum um
farsóttir og smitsjúkdóma og bar-
áttuna gegn þeim. Aðgangur er
ókeypis.
Fræðsluerindi um
farsóttir í borginni
Kristín Svava
Tómasdóttir
Ragna Róbertsdóttir er ein fimm
evrópska myndlistakvenna sem eiga
verk á Biennale Donna myndlistar-
tvíæringnum í Ferrara á Ítalíu sem
er helgaður myndlist eftir konur.
Tvíæringurinn
var fyrst haldinn
árið 1984 og er
þetta sá 19. Auk
Rögnu eru sýn-
endur Monica De
Miranda frá
Portúgal/Angóla,
Christina Kub-
isch frá Þýska-
landi, Diana Lelo-
nek frá Póllandi
og Anaïs Tondeur
frá Frakklandi. Um er að ræða ólík-
ar listakonur sem hafa allar vakið at-
hygli fyrir verk sýn og þau sýnd víða
en þær eru fulltrúar ólíkra kynslóða,
rúmlega fjörutíu ára aldurmunur á
þeim elstu og yngstu.
Tvíæringurinn er haldinn í sam-
starfi við Ferrara Padiglione Con-
temporanea-safnið í Ferrara. Sýn-
ingastjórar völdu að beina sjónum
þessu sinni að myndlist sem fjallar
um umhverfismál með ólíkum hætti.
Verk Rögnu eru sýnd í stórum sal.
Það setti hún upp stórt verk úr vikri,
sjö metra breitt og tveggja metra
hátt, en hún hefur sett slík verk upp
víða um lönd. Þá vann hún annað
verk á staðnum, á gólfið úr hvera-
leir. Einnig er sýnd röð verka úr
salti sem kemur frá galleríi Rögnu í
Berlín, Persons Project, þar sem
þau voru sýnd áður.
„Við listakonurnar erum allar
valdar út frá tengingum við náttúr-
una í verkunum,“ segir Ragna. Hún
hrósar aðstandendunum sýning-
arinnar og segir að afar vel sé að öllu
staðið, enda um gamalgróinn tvíær-
inn að ræða. „Þetta er mjög fínn
sýningarstaður,“ bætir hún við og
henni þykir verk þeirra allra tala vel
saman. „Þetta er í fyrsta sinn sem ég
sýni á Ítalíu og það var áhugavert að
vinna þarna að verkunum.“ Sýningin
í Ferrara stendur út maímánuð.
Þess má geta að til stóð að Ragna
sýndi líka á tvíæringnum í Ríga í
Lettlandi í sumar, en sá er einnig
gamalgróinn og þekktur. Þar ætlaði
Ragna að sýna stórt verk sem hún
hefur þegar gert hér heima en nú er
búið að fresta þeim tvíæringi um
óákveðinn tíma vegna stríðsátak-
anna í Úkraínu. efi@mbl.is
Ragna sýnir í Ferrara
Vikur og leir Frá sýningunni á verkum Rögnu á Biennale Donna-tvíær-
ingnum í Ferrara á Ítalíu. Þessi verk vann hún á staðnum í salinn.
- Var boðið að
sýna á 19. Biennale
Donna-tvíæringi
Ragna
Róbertsdóttir