Lögmannablaðið - 2021, Blaðsíða 4

4 LÖGMANNABLAÐIÐ TBL 04/21
LÖGMANNA FÉLAGIÐ
110 ÁRA
Þann 11. desember 1911 höfðu Eggert Claessen og Sveinn
Björnsson frumkvæði að stofnun Málflutningsmannafélags
Íslands, en heiti þess var síðar breytt í Lögmannafélag
Íslands. Í Lögmannablaðinu sem gefið var út á 100 ára
afmæli félagsins var ástæða stofnunar félagsins m.a.
sögð erfið samskipti á milli málflutningsmanna í formi
persónulegra meiðinga, háðs og hótfyndni. Þar var
líka nefnt að almenningi hafi jafnvel fundist mál ekki
sómasamlega flutt nema málflytjendurnir væru sektaðir
fyrir meiðyrði.
Þó margt hafi breyst í lögmennskunni frá stofnun félagsins
markast starfið þó enn af því að við ráðum tíma okkar að
litlum hluta sjálf. Að einhverju leyti er það óhjákvæmilegt
enda fáum við oft á tíðum litlu ráðið um það hvenær
áríðandi verkefni koma upp hjá skjólstæðingum okkar,
hvenær mæta þarf í skýrslutökur hjá lögreglu eða í
málflutning fyrir dómi.
Það sem hefur hins vegar breyst er að lögmenn gera í dag
auknar kröfur til tíma síns og starfsumhverfis. Í upphafi
lögmennsku minnar var mér sagt að lögmenn yrðu ekki
veikir. Þeir mæta bara og gegna skyldum sínum. Er mér
minnistætt viðtal sem ég átti við einstakling sem vildi kanna
möguleika á endurupptöku dómsmáls, þar sem ekkert
hefði heyrst í fyrri lögmanni hans við aðalmeðferðina
sökum raddleysis. Þarna gilti hið fornkveðna um að kapp
sé best með forsjá, eða kannski frekar orð séra Friðriks
Friðrikssonar um að láta aldrei kappið bera fegurðina
ofurliði.
Það sem hefur líka gerst er að lögmennskan nægir flestum
ekki ein og sér. Lögmenn vilja njóta eðlilegs fjölskyldulífs,
sinna áhugamálum sínum eða fara í venjulegt frí eins og
aðrar stéttir samfélagsins gera, þ.m.t. aðrar starfsstéttir
réttarkerfisins.
Í samræmi við framangreint hefur Lögmannafélagið að
undanförnu beitt sér fyrir því að tekið verði tillit til sumarleyfa
og stórhátíða við ákvörðun kæru- og áfrýjunarfresta. Mörg
okkar þekkja það að brjóta upp sumarfríið okkar með ritun
kæru eða greinargerðar vitandi það að við séum bara að
skrifa fyrir skúffuna og að ekkert muni gerast fyrr en að
loknu réttarhléi. Er það von okkar að slík breyting verði
færð í lög á þessu þingi.
Þá gerði Lögmannafélagið líka athugasemdir við stuttan
boðunarfrest aðalmeðferða í Landsrétti nú í haust. Þá var
svo komið að stundum liðu eingöngu 2 ½ til 3 vikur frá
tilkynningu til aðalmeðferðar sem gerði okkur erfiðara
fyrir að skipuleggja undirbúning málflutningsins í kringum
önnur verkefni. Sýnist mér að Landsréttur hafi tekið þessum
athugasemdum vel og hafi fresturinn lengst í 4-6 vikur.
Starfsumhverfi okkar skiptir einfaldlega miklu máli en
í nýjasta tölublaði danska lögmannablaðsins má finna
athyglisverða könnun á meðal ungra danskra lögmanna þar
sem svigrúm til fjölskyldulífs og gott vinnuumhverfi skiptu
mestu við val á vinnustað og vógu þyngra en möguleikar
til framgangs. Engin ástæða er til að ætla að annað gildi
á meðal ungra íslenskra lögmanna og lögfræðinga sem
eru að huga að starfsvettvangi sínum. Huga þarf að því
hvernig tryggja má að ungt fólk sækist eftir því að vinna
við lögmennsku og geri það að ævistarfi sínu. Í samkeppni
um besta starfsfólkið er líka góður bisness að hugsa vel um
starfsfélagana og starfsumhverfi þeirra. Svo megum við ekki
gleyma því að hugsa vel um okkur sjálf.
Til hamingju með afmælið!
SIGURÐUR ÖRN HILMARSSON LÖGMAÐUR
FORMAÐUR