Borgfirðingabók - 01.12.2008, Qupperneq 107

107Borgfirðingabók 2008
söguna áfram. En það þarf fleiri staði sem yrðu seglar til að dvelja
ferðamanninn í héraði. Í Snorrastofu eru uppi spennandi áætlanir
um Minjagarð þar sem niðurstöður forleifarannsókna undanfarinna
ára yrðu sýndar. Í Ferjukoti eru hjónin Þorkell Fjeldsted og Heba
Magnúsdóttir með stórkostlegt efni í höndunum til að útbúa safn um
ferskfiskveiðar á Íslandi. Á Hvanneyri er Landbúnaðarsafn þar sem eru
miklir áframhaldandi möguleikar. En það eru líka fleiri möguleikar.
Baróninn á Hvítárvöllum er einhver dularfyllsta persónusaga
Íslandssögunnar. Pourquoi-Pas? sýningin í Englendingavík var
sérlega falleg. En það þarf fleiri sérsýningar í þeirri perlu sem er að
verða þar til undir handleiðslu Hollvinafélags Englendingavíkur. af
hverju ekki að setja upp sérsýningu um baróninn á Hvítárvöllum í
gamla kaupfélagshúsinu? Því fleiri stoppustaðir fyrir ferðamanninn
því betra.
Nýir tímar
Nú eru tímar mikilla breytinga í atvinnuháttum á landsbyggðinni.
Vinnsla sjávarafurða hefur ýmist farið um borð í skipin eða er á
leiðinni til Kína. Framtíð landbúnaðarins virðist einna helst liggja í
því að framleiða lúxusvöru fyrir ferðamenn sem eiga leið um landið.
Við Vestlendingar erum að mörgu leyti sérlega vel undir búnir að
taka við nýjum og breyttum tímum. Menn segja í dag að menntun
sé afl þeirra hluta sem koma. Mannauðurinn sé framtíðin. Á meðan
Vestfirðingar og austfirðingar gráta og sýta yfir því að hafa ekki sinn
eigin háskóla þá höfum við tvo, Hvanneyri og Bifröst, og jafnvel
vísi að þeim þriðja þar sem er fræðasetrið Snorrastofa í reykholti.
Menntun og ferðaþjónusta. Þar liggur framtíðin fyrir landsbyggðina.
Þar stöndum við sérlega vel að vígi. Við verðum að hlúa að okkar
góðu stöðu. Við megum ekki glutra henni niður. Ef við ætlum okkur
að taka frumkvæðið í sögutengdri ferðaþjónustu þá verðum við að
vera meðvituð um að það sé það sem við ætlum okkur og vinna
einbeitt að því markmiði. annars gera aðrir það.