Borgfirðingabók - 01.12.2008, Page 160

160 Borgfirðingabók 2008
Tekið vatn . . .
Árla morguns héldum við svo á stað til Tokocaq undir leiðsögn
kennarans í rjómablíðu og björtu veðri, og stóðu þeir báðir í efri brú
skipstjórinn og kennarinn. Til Tokocaq komum við um hádegisbil og
köstuðum akkeri í ágætri höfn. Þarna komu um borð tollverðir, og
hér skyldi taka vatn. Í Tokocaq var enginn bryggja eða viðlegukantur
til að athafna sig við og sögðu tollverðirnir að vatnið væri tekið
við klettahamar sem var að norðvestanverðu í höfninni, og 15-20
metra ofan við sjávarmál væri hvesta (dalur eða daldrag), og þar
uppi í henni væri vatnslind sem mætti stífla og leggja svo slöngur
niður klettavegginn um borð í skipið. Þá strax var farið að vinna
að þessari vatnstöku. Var léttbátnum slakað á flot og róið framfyrir
skipið. Þar var slakað niður í sjó varpakkerinu sem við notuðum úti
á fiskibönkunum og það hengt í stroffu sem var sett utanum bátinn
rétt fyrir aftan miðju og vírinn sem var við akkerið tekinn um borð
í bátinn og honum róið frá skipinu og afturfyrir það. Þá var Gunnar
skipstjóri búinn að létta akkeri og færa Eldborg að klettaveggnum
þannig að stefnið nam við klettana beint fyrir neðan hvestuna þar
sem lindin var uppi. Við Andrés rerum bátnum svo að afturenda
Eldborgar og tók Kristinn stýrimaður þar við enda vírsins og tók um
20-30 faðma slaka inn á spil sem var á bátaþilfari. Svo rerum við
Andrés vírinn út beint aftur af Eldborg þar til hann var allur úti og
tók í akkerið. Þá skárum við á stroffuna svo akkerið féll til botns,
og þá hífði Kristinn stýrimaður í vírinn þar til hann var strekktur og
Eldborg lá með stefnið þétt við bergið. Var þá hægt að stökkva af
hnýflinum upp í klettana. Það gerðum við nokkrir og hjálpuðumst að
við að útbúa vatnslón uppi í hvestunni. Tveggja tommu gúmíslanga
var leidd úr lóninu niður að berghamrinum og síðan sett strigaslanga
utan yfir og samskeytin bensluð með trolltvinna svo ekki læki. Þessi
strigaslanga var síðan lögð að fyllingarstút tanksins sem fylla skyldi.
Rörbútur var benslaður fastur inní strigaslönguna og honum stungið
niður í áfyllingarrörið. Þessi áfylling tókst vel. Tekin voru um 67 tonn
og tók það 12-14 tíma. Meðan við tókum vatnið kom m/s Elsa inn til
Tokocaq undir stjórn Jóns Franklíns og þurftu þeir á vatni að halda.
Þegar vatnstöku okkar lauk var Eldborgin færð frá klettaberginu og
út á höfn og öllu fyrirkomið á sama hátt og áður, akkeri og vír fært
framá.
Bátarnir höfðu róið frá okkur meðan á þessu stóð. Þeir komu að