Borgfirðingabók - 01.12.2008, Qupperneq 161

161Borgfirðingabók 2008
með fiskinn og losuðu yfir í Eldborg og tóku bjóðin. Síðan var haldið
í átt að ,,Sykurtoppnum“ (Sukkertoppen). Þar sáum við konubát. Þar
reru 6-8 konur og karl stýrði. Þau höfðu skutlað hrefnu og dregið
hana uppá ávala klöpp þar sem konurnar gerðu hana til, en karlinn
horfði á. Þær skáru spikið í lengjur eða reimar og átu hráar.
Þegar við höfðum fiskað þarna um hríð var siglt til Straumfjarðar
syðri. Fiskuðu bátarnir úti á bankanum, en prófað var að leggja línu
þarna líka, en afli var tregur og einnig hurfu 6-8 lóðir af grunnenda
eða innri endanum á línunni. Þarna var líka mikill hiti inni í firðinum
og mý. innst í firðinum var flugvöllur, en hann sáum við ekki. Þá
var farið frá Syðri-Straumfirði til Fiskimeistarans hafnar. Þar var
töluvert um Grænlendinga og voru trillur þeirra með Dan-vélum
og Ölfu, Gamla-Dan með opnum sveifarhúsum og glóðarhaus sem
þurfti að hita upp með lampa áður en þeim var snúið í gang. Mér
fannst Grænlendingar alveg snillingar að meðhöndla svona gamalt
drasl sem allir aðrir voru hættir að nota. Þarna sá ég doríur sem þeir
höfðu fundið á reki. Þær hafa sennilega slitnað frá stóru portúgölsku
seglskipunum sem lágu út á fiskibankanum eða týnst með manni
í roki og sjó eða þoku. Þessar doríur voru allar með svona vélum
Gamla-Dan og Ölfu.
Þessi mynd er af loftskeytastöðinni í Færeyingahöfn. Sjúkrahúsið er lengst til
hægri og sjómannaheimilið í húsaþyrpingunni hjá loftskeytastöðinni. Ljósm.
Roy Ólafsson.