Borgfirðingabók - 01.12.2008, Page 192

192 Borgfirðingabók 2008
Ef menn sjá fyrir sér stækkun núverandi höfuðborgarsvæðis
virðast fjórir kostir vera í stöðunni:
1) Að leggja Reykjavíkurflugvöll í Vatnsmýri undir íbúabyggð.
2) Framlengja byggðina í Hafnarfirði til suðurs áleiðis eftir
Reykjanesskaganum.
3) Framlengja byggðina frá Árbæjarhverfi meðfram Suður-
landsvegi í átt að Hellisheiði.
4) Þróa byggðina til norðurs samkvæmt hugmyndum Valdimars
Kristinssonar frá árinu 1995.
Sennilega væri gáfulegast að sumu leyti en þó ekki öllu leyti
að leggja Vatnsmýrina undir íbúabyggð. Það er þó alveg óvíst
hvort það verður gert og stefna núverandi stjórnvalda er að
Reykjavíkurflugvöllur verði á sama stað næstu ár eða áratugi. Varla
er gáfulegt að teygja byggðina í átt að eldvirkum Reykjanesskaga
annars vegar eða í átt að aðaljarðskjálftasvæði landsins hins vegar
þar sem Suðurlandsundirlendið er, fyrir nú utan að þar rekast menn á
mikla hindrun sem heitir Hellisheiði. Böndin berast því sterklega að
Hvalfjarðarsveitinni og ég spái því að þar eigi eftir að rísa mikil borg
í fyllingu tímans! Það hefur jafnvel verið nefnt að þarna gæti risið nýr
innanlandsflugvöllur í stað Reykjavíkurflugvallar, en ég hef ekki vit á
því hvort það er raunhæft.
(Byggt á erindi sem haldið var á fundi Rótarýklúbbs Akraness 12. mars
2008. Kortin í greininni eru tekin úr grein Valdimars Kristinssonar í
Fjármálatíðindum sem vitnað er til.)