Skessuhorn - 30.11.2022, Blaðsíða 23
MIÐVIKUDAGUR 30. NÓVEMBER 2022 23
Skallagrímur og Ármann mætt-
ust í 1. deild karla í körfuknattleik
á föstudagskvöldið og fór leikurinn
fram í Fjósinu í Borgarnesi. Jafnt
var á flestum tölum allan fyrsta
leikhlutann sem var dæmigert fyrir
leikinn því hann var spennandi frá
byrjun til enda. Eftir fimm mín-
útna leik var staðan 11:10 fyrir
Skallagrími en í stöðunni 16:13
settu gestirnir niður sjö stig í röð
og leiddu með fjórum stigum við
flautið, 16:20. Skallagrímsmenn
voru fljótir til í öðrum leikhluta
og höfðu jafnað metin á innan við
mínútu en síðan tóku Ármenn-
ingar við sér og voru komnir með
tíu stiga forystu eftir sex mínútur
á klukkunni, staðan 26:36 fyrir
Ármanni. Heimamenn með Björg-
vin Hafþór Ríkharðsson í farar-
broddi náðu síðan með mikilli bar-
áttu að minnka muninn í eitt stig
fyrir hálfleik, staðan 38:39 Ármanni
í hag.
Í þriðja leikhluta náði Ármann
aftur yfirhöndinni og var kom-
inn með kunnuglegt tíu stiga for-
skot eftir tæplega fimm mínútur,
45;55. Skallagrímur náði síðan að
minnka muninn í tvö stig áður en
Ármenningar gáfu í á nýjan leik
og höfðu sex stiga forystu fyrir
fjórða og síðasta leikhluta, 56:62.
Skallagrímsmönnum gekk illa að
krafsa í gestina í byrjun fjórða leik-
hluta og Ármann náði 14 stiga for-
skoti eftir tæpar fjórar mínútur,
60:74. Skallagrímur hleypti síðan
spennu í leikinn á lokamínútunni
þegar þeir minnkuðu muninn í
þrjú stig, 80:83, þegar nítján sek-
úndur voru eftir af leiktímanum en
gestirnir stóðust álagið, skoruðu
síðustu fjögur stigin af vítalínunni
og fögnuðu góðum sigri, lokatölur
80:87 Ármanni í vil.
Keith Jordan Jr. var langstiga-
hæstur hjá Skallagrími með 35 stig
og 10 fráköst, Bergþór Ægir Rík-
harðsson var með 13 stig og bróðir
hans Björgvin Hafþór með 9 stig.
Hjá Ármanni var William Thomp-
son með 21 stig, Borgnesingurinn
Kristófer Már Gíslason var með 17
stig og Austin Bracey með 16 stig.
Skallagrímsmenn hafa nú tapað
fimm leikjum í röð í deildinni og
fjarlægjast vonina um sæti í úrslita-
keppninni en deildin er jöfn og
alls ekki útilokað að Skallarnir eigi
enn möguleika á því enda nóg eftir
af mótinu. Þeir verða þó að snúa
gengi liðsins við sem fyrst, en næsti
leikur liðsins er á móti Sindra sem
er í öðru sæti deildarinnar með
16 stig og tíu stigum meira en
Skallagrímur sem er í 8. til 9. sæti
ásamt Fjölni. Leikurinn fer fram
næsta föstudag í Ice Lagoon höll-
inni á Höfn í Hornafirði og hefst
klukkan 19.15.
vaks
Sindri og ÍA áttust við í 1. deild
karla í körfuknattleik síðasta föstu-
dagskvöld og fór viðureignin
fram á Höfn í Hornafirði. Ferða-
þreytan virtist ekki vera mikið að
hrjá Skagamenn í fyrsta leikhluta
þó heimamenn væru alltaf aðeins
skrefinu á undan. Um miðjan leik-
hlutann var Sindri sex stigum yfir,
17:11, og við lok hans var þetta á
svipuðum nótum, staðan 30:25
fyrir Sindra. Heimamenn voru
mun sterkari í öðrum leikhluta,
þeir voru komnir með 15 stiga for-
skot eftir rúman fimm mínútna leik
og létu kné fylgja kviði fram að
hálfleik. Þegar flautað var til hálf-
leiks var munurinn á milli liðanna
orðinn 25 stig, 64:39, og ljóst að
einhver þreytumerki væru á Skaga-
mönnum og þeir alls ekki í góðum
málum.
Sindramenn voru ekki á því að
gefa gestunum neitt í þriðja leik-
hluta, þeir gáfu þeim engin grið og
ekki heldur tækifæri á að koma sér
inn í leikinn að einhverju marki.
Þeir komust fljótlega í yfir 30 stiga
forystu í leiknum en þó Skagamenn
næðu að bíta frá sér á tímabili og
minnka aðeins muninn var Sindri
með 31 stigs forystu fyrir síðasta
leikhlutann, 91:60. Þó úrslit leiks-
ins væru nánast ráðin voru Skaga-
menn ekki alveg á því að leggja árar
í bát og með stoltið að vopni unnu
Skagamenn fjórða leikhlutann með
tíu stigum. Þeir skoruðu alls 18
stig gegn aðeins níu stigum Sindra
á síðustu sex mínútum leiksins og
sáu til þess að löng heimferðin var
kannski með aðeins skárra móti
heldur en útlit var fyrir. Stórsigur
heimamanna þó staðreynd og loka-
tölur leiksins, 109:88 Sindra vel í
vil.
Marko Jurica var stigahæstur hjá
ÍA með 23 stig, Gabriel Adersteg
var með 21 stig og Jalen Dupree
með 19 stig og 14 fráköst. Hjá
Sindra var Oscar Jorgensen með 22
stig, Rimantas Daunys með 19 stig
og Tyler Stewart með 18 stig.
Næsti leikur ÍA er heimaleikur
á móti botnliði Þórs frá Akureyri
næsta föstudag í íþróttahúsinu við
Vesturgötu og hefst klukkan 19.15.
vaks
Þar kom að því. Eftir átta sigurleiki í
röð í 1. deild kvenna í körfuknattleik
þurftu Snæfellskonur að játa sig
sigraða síðasta miðvikudag. Þær
mættu fullar sjálfstraust norður yfir
heiðar til að takast á við Þór Akur-
eyri og útlit fyrir hörkuleik þar sem
liðin sátu í 2. og 3. sæti deildar-
innar en Snæfell þó með tveimur
stigum meira í öðru sætinu. Þór
byrjaði fyrsta leikhluta af miklum
krafti og var kominn í 8:2 fljót-
lega í leiknum en Snæfell kom til
baka og staðan 14:12 fyrir Þór eftir
rúmar fimm mínútur. Jafnt var á
með liðunum það sem eftir lifði af
leikhlutanum en Snæfell átti síðasta
orðið og leiddi með fjórum stigum,
17:21. Baráttan hélt áfram í öðrum
leikhluta og enn var jafnt eftir
tæpan fimm mínútna leik, 27:27.
Þórskonur voru síðan sterkari fram
að hálfleik og voru komnar fjórum
stigum yfir þegar heyrðist í bjöll-
unni, hálfleikstölur 37:33 Þór í hag.
Heimakonur fóru síðan ansi vel
af stað í byrjun þriðja leikhluta,
skoruðu fyrstu tólf stigin og komu
sér í vænlega stöðu, 49:33. Fyrsta
stig Snæfells kom ekki fyrr en eftir
sex mínútna leik þegar Cheah Rael
Whitsitt hitti úr öðru víti sínu og
Snæfell átti næstu sex stig áður
en Þór bætti aftur í. Karen Lind
Helgadóttir setti síðan niður þrist
á lokasekúndunum og staðan 58:43
fyrir Þór. Snæfell náði síðan að
koma sér aftur inn í leikinn í fjórða
leikhluta þegar Minea Takala hitti
úr þriggja stiga skoti og minnk-
aði muninn í fimm stig, 60:55 eftir
tæpar fimm mínútur. En þá skelltu
norðankonur í lás á lokakaflanum
og sögðu hingað en ekki lengra,
spiluðu geysigóða vörn á Snæ-
fell sem skoraði aðeins tvö stig á
móti tólf stigum Þórs og lokatölur
öruggur sigur, 73:57 Þór í vil.
Stigahæstar hjá Snæfelli voru
þær Cheah Rael Whitsitt sem var
með 24 stig og 16 fráköst, Preslava
Koleva var með 12 stig og Ylena
Maria Bonett var með 11 stig.
Hjá Þór var Eva Wium Elíasdóttir
með 15 stig og 10 fráköst, Hrefna
Ottós dóttir með 14 stig og Heiða
Hlín Björnsdóttir með 12 stig.
Staðan í deildinni er þannig að
Stjarnan er efst með 18 stig eftir 9
leiki, Þór og Snæfell eru næst með
16 stig en Snæfell með leik minna
en Þór sem hefur leikið 11 leiki.
KR og Hamar/Þór eru í 4. og 5.
sæti með 12 stig eftir 11 leiki og tvö
neðstu liðin eru Tindastóll með 4
stig og Breiðablik b er enn án stiga
en bæði lið hafa leikið 11 leiki.
Næsti leikur Snæfells er á móti
Tindastóli í kvöld í Stykkishólmi
og hefst klukkan 19.15.
vaks
Fimmtudaginn 17. nóvember síðast-
liðinn var Æskulýðsballið haldið í
Hjálmakletti. Um er að ræða við-
burð sem félagsmiðstöðin Óðal í
Borgarnesi stendur fyrir árlega fyrir
öll ungmenni á Vesturlandi.
Fram kemur í frétt á heimasíðu
Borgarbyggðar að um 320 ung-
menni hefðu mætt í Borgarnes til
þess að skemmta sér saman og sáu
DJ Egill Spegill og Herra Hnetu-
smjör um að halda uppi fjörinu. Þá
segir einnig að 113 ungmenni hafi
mætt frá félagsmiðstöðinni Óðali af
þeim 147 sem búa í Borgarbyggð
sem verður að teljast nokkuð góð
mæting.
Óhætt er að segja að ballið hafi
heppnast afar vel og það var ekki
annað að sjá en að allir hafi skemmt
sér konunglega. Eina gagnrýnin
sem heyrðist eftir ballið var að við-
burðurinn mætti vera oftar á ári.
„Starfsfólk Óðals vill þakka for-
eldrum fyrir samstarfið á ballinu
en hópurinn var vel sýnilegur á
viðburðinum og einnig hafa for-
eldraröltin verið virkjuð á ný.
Hópurinn stóð einnig vaktina í
sjoppunni og hjálpuðu til við gæslu
inni á ballinu. Það er dýrmætt að
eiga góð samskipti við foreldra.“
segir í fréttinni á borgarbyggd.is.
vaks
Vel heppnað æskulýðsball
Herra Hnetusmjör hélt uppi stuðinu á ballinu. Ljósm. borgarbyggd.is
Fimmta tap Skallagríms í röð
Keith Jordan Jr. var með 35 stig á móti Ármanni. Ljósm. glh
Snæfell tapaði fyrir Þór Akureyri
eftir átta leikja sigurhrinu
Skagamenn töpuðu
fyrir Sindra
ÍA er í sjöunda sæti deildarinnar með átta stig eftir tíu leiki. Ljósm. glh