FLE blaðið - 01.01.2021, Blaðsíða 30

30 FLE BLAÐIÐ JANÚAR 2021
ÞAÐ HELSTA
Í STARFSEMI FLE
Sigurður B. Arnþórsson er framkvæmdastjóri FLE
Síðastliðið ár hefur verið mjög sérstakt fyrir
félagið í alla staði og aðal áskorun þess
tengst því með hvaða hætti við gætum
staðið að ráðstefnu- og námskeiðahaldi
VIÐBURÐIR
Það er ekki laust við að félagið hafi staðið frammi fyrir ýms-
um áskorunum vegna fjöldatakmarkana í tengslum við
COVID-19-19 á liðnu starfsári, þá sérstaklega á ráðstefnur og
námskeið. Félagið hefur því verið að prófa ýmsar nálganir á því
að koma endurmenntun á framfæri við félagsmenn, eins og
takmarkaða mætingu ásamt streymi, eingöngu streymi, taka
beint upp og gera svo aðgengilegt rafrænt. Það er ljóst að þetta
hefur haft ákveðinn viðbótarkostnað í för með sér fyrir félag-
ið, en allt er þetta gert til þess að þjóna félagsmönnum sem
best. Þannig náði félagið að standa fyrir samtals 14 viðburðum
á starfsárinu sem gáfu 37 endurmenntunareiningar. Til saman-
burðar þá stóðum við fyrir 18 viðburðum árið á undan sem gáfu
46 einingar.
Félagið stóð fyrir þremur ráðstefnum en síðast liðið vor féll
niður Endurskoðunardagurinn í maí, en var sameinaður Reikn-
ingsskiladeginum núna í september með takmarkaðri mætingu
en streymt jafnframt. Þetta tókst vonum framar og var heildar-
mæting á ráðstefnuna nærri tvö hundruð manns og þar af fylgd-
ust um 80% með í gegnum streymi. Heildarmætingin á þessar
þrjár ráðstefnur var mjög góð eða um 520 félagsmenn saman-
borið við 570 sem mættu árið á undan þegar ráðstefnurnar voru
fjórar. Haustráðstefnan var með venjulegu ráðstefnufyrirkomu-
lagi í stað vinnustofuformsins og tókst hún afar vel og fylgdust
með henni um 170 félagsmenn.
Þess má geta til gamans að vinnustofufyrirkomulagið á Haust-
ráðstefnunni hefur verið viðhaft allt frá árinu 2011 eða í níu ár
en það fyrirkomulag hefur verið afar vinsælt og boðið upp á
mikinn fjölbreytileika og sveigjanleika fyrir félagsmenn. Meðal
margra áhugaverðra erinda á ráðstefnum á liðnu starfsári má
nefna fróðlegt erindi um IFRS 16 sem og tvær vinnustofur á
Haustráðstefnunni sem fjölluðu um kulnun í starfi annars vegar
og hins vegar um ófjárhagslegar upplýsingar í ársreikningi.
Á starfsárinu voru haldin níu námskeið, fræðslufundir og aðrir
viðburðir og mættu 413 félagsmenn samanborið við átta við-
burði árið á undan og mætingu um 375. Margt fróðlegt var til
umfjöllunar á þessum námskeiðum og vil ég þar helst nefna
umfjöllun um peningaþvætti, námskeið um endurskoðun
rekstrarhæfis og matskenndra liða og síðast en ekki síst að-
komu endurskoðenda að skiptum við sambúðarslit. Á nám-
skeið Ingridar Kuhlman um vinnu endurskoðenda á óvissutím-
um mættu um 30 félagsmenn en helmingi fleiri hafa nú þegar
horft á upptökuna sem er aðgengileg á innri vef félagsins.
Þá bauð félagið upp á þriggja tíma námskeið um arðgreiðslur
sem var eingöngu streymt og var áhorfið með eindæmum gott
en um 150 félagsmenn fylgdust með því. Undir lok ársins var
svo boðið upp á þrjú klukkustundarlöng morgunkorn sem ein-
göngu voru aðgengileg rafrænt. Haldin voru tvö morgunkorn
á starfsárinu, en morgunkornin í febrúar og mars féllu niður
á síðustu stundu vegna COVID-19-19. Á annað kornið mætti
Bergþór nokkur Pálsson söngvari og lífskúnster og var það
einstaklega lífleg morgunstund.
Eins og undanfarin fjögur ár er það svo Skattadagur félagsins
sem er fjölmennasti einstaki atburðurinn þar sem um 200 fé-
lagsmenn mættu samanborið við 184 á síðast ári og er þetta
mesta mæting sem við höfum séð á einstakan viðburð undan-
farin 8 ár. Á innri síðu félagsins geta félagsmenn í nær öllum til-
vikum fundið glærur af fyrirlestrum frá ráðstefnum, námskeið-
um sem og öðrum viðburðum.