Framkvæmdafréttir Vegagerðarinnar - 06.09.2023, Blaðsíða 19

Framkvæmdafréttir nr. 726
4. tbl. 31. árg.
19
Eldgosið hófst þann 10. júlí síðastliðinn og fljótlega
varð ljóst að möguleiki væri á að hraun rynni
yfir Suðurstrandarveg. Settar voru upp nokkrar
sviðsmyndir varðandi hraunflæðið, í samstarfi
við Verkís, þar sem skoðað var til hvaða aðgerða
Vegagerðin gæti ráðist í til að lágmarka tjón á veginum.
Eitt af því sem kom til greina var að reisa leiðigarða en
hvað fæst með því að reisa slíka garða?
„Leiðigarðar minnka áhrif hraunsins á veginn
sjálfan og hraunið ætti þá að renna yfir styttri vegkafla
en ella. Bæði verður þá minna tjón á veginum og
auðveldara verður að koma á vegsambandi aftur
þegar gosi líkur. Ef hraun flæðir óhindrað yfir vegi, er
hætta á að margir kílómetrar fari undir hraun. Með því
að byggja leiðigarða eru meiri líkur á að hægt sé að
hafa einhverja stjórn á hvert hraunið rennur og freista
þess að færri kílómetrar af vegi fari undir hraun, með
tilheyrandi kostnaði og fyrirhöfn,” segir Guðmundur
Valur Guðmundsson, framkvæmdastjóri þróunarsviðs
Vegagerðarinnar.
Vegagerðin og
jarðhræringar á
Reykjanesskaga
Vegagerðin fylgdist grannt með hraunflæði
frá eldgosinu við Litla-Hrút á Reykjanesskaga
meðan það stóð yfir, sér í lagi með tilliti til
Suðurstrandarvegar. Til skoðunar var m.a. að
reisa leiðigarða til að freista þess að beina
hraunrennslinu yfir veginn á eins stuttum kafla
og talið er mögulegt, hefði sú staða komið upp.
Aðgerðir vegna gossins
Þegar gosið braust út og stærð þess og staðsetning
lá fyrir var ljóst að búast mátti við meiri umferð
um Reykjanesbrautina, Grindavíkurveg og
Suðurstrandarveg. Vegagerðin flýtti framkvæmdum
við Krýsuvíkurveg vegna gossins, til að vegurinn væri
betur í stakk búinn til að taka á móti aukinni umferð.
Vegurinn var styrktur og bættur á um 1,3 km kafla í júlí
síðastliðnum. Samhliða voru sett upp fleiri víravegrið á
veginum til að auka umferðaröryggi. Á næstunni verður
sett upp veðurstöð, myndavél og umferðarteljari við
Krýsuvíkurveg til að hægt sé að fylgjast betur með
veðri, færð og umferð.
Þá var ráðist í endurbætur á veginum
við Festarfjall til að bæta umferðaröryggi en
jarðskjálftarnir í upphafi jarðhræringanna á Reykjanesi
höfðu valdið nokkru tjóni á veginum. Vegurinn var
breikkaður um 2 metra en með því móti er umferðinni
beint nær fjallinu en áður var gert. Þá er stefnt að því
að styrkja fláafótinn.
Starfsfólk Vegagerðarinnar kom einnig að
samstarfi með viðbragðsaðilum á svæðinu og skipulag
á opnunum og lokunum á vegslóðum í nágrenni við
gosið og miðlun upplýsinga til almennings.
↘
Starfsfólk Vegagerðarinnar
skoðaði aðstæður við
Suðurstrandarveg í júlí
síðastliðnum.
↓
Leiðigarðar gætu beint
hraunrennsli yfir styttri
vegkafla en ella.