Gerpir - 01.07.1947, Blaðsíða 25

Menn skyldu ennfremur gera sér ljóst
að verð á erlendum gjaldeyri, hér á
landi, er hinum færeysku verkamönnum
svo hagstætt, að fyrir þá krónutölu, sem
þeir fá yfirfærða og breytt í danskar
krónur, geta þeir heima hjá sér keypt
a. m. k. helmingi meira af nauðsynja-
vörum, en íslenzkir verkamenn geta
keypt hér heima. Þetta þýðir raunveru-
lega það, að íslenzka þjóðarbúið greiðir
færeyskum verkamönnum, sem t. d.
vinna við byggingar í Reykjavík, stór-
um hærra kaup en greitt er íslenzkum
verkamönnum, sem vinna sömu vinnu,
því kaup verkamannsins er engan veg-
in fólgið í þeirri krónutölu sem hann fær
greidda, heldur er hið raunverulega
kaup hans það magn lífsnauðsynja, sem
hann getur keypt fyrir þá krónutölu
sem hann vinnur sér inn. Og miðað við
þetta, sem er auðvitað hið eina rétta,
sézt að kaup þessara erlendu verka-
manna er stórum hærra en hinna inn-
lendu, a. m. k. sá hluti þess, sem breytt
er í danskan gjaldeyri með aðstoð bank-
anna. Hvers vegna líða íslenzkir verk-
lýðsleiðtogar þetta? Það hefir víst ein-
hvern tíma þotið í nösum þeirra út af
minnu tilefni.
Að öllu þessu athuguðu virðist það
næstum óskiljanlegt, að þótt hafi rétt-
mætt að grípa til þessara harkalegu að-
gerða og skera svona umsvifalaust á
líftaugar þessa margáminnsta samstatfs
Austfirðinga og Færeyinga.
Auðvitað ætlast enginn til þess að
hinni ráðandi stefnu í fiskveiðamál-
um sé breytt aðeins vegna hagsmuna
tveggja útgerðarmanna á Austfjörðum.
Hins vegar sýnist manni að það hefði
verið útlátalaust að tilkynna með a. m.
k. sex mánaða fyrirvara, að undanþága
yrði ekki oftar veitt.
G. J.
Uöfnin og hdfnargaröur á
Borgarfirði. Fleiri myndir
þaðan koma í 3. hefti,
4-sam.t frásögn af fram-
kvœmdum þar.
23