Golf á Íslandi - 01.10.2016, Page 8

Sagt er að stórkostleg tækifæri bjóðist hugsanlega bara einu sinni á lífsleiðinni. Stundum koma þau jafnvel
bara einu sinni á hundrað ára fresti. Slíkt tækifæri bauðst golfíþróttinni fyrir skemmstu, þegar keppt var í golfi
á Ólympíuleikunum í fyrsta sinn frá árinu 1904, eða í 112 ár. Ríó bauð upp á einstakt tækifæri – ekki bara fyrir
golfíþróttina, til að stækka og breiðast út, heldur einnig fyrir þá kylfinga sem var boðið taka þátt í keppninni. Sviðið
var þeirra og öll heimsbyggðin fylgdist með. Þegar leiktjöldin voru dregin frá, kom hins vegar í ljós að nokkrir af
aðalleikurum stóðu ekki á sviðinu.
Kylfingarnir gáfu ýmsar ástæður fyrir fjarveru sinni, sem flestar voru
býsna ómerkilegar. Einn besti kylfingur heims, Rory McIlroy, bætti
gráu ofan á svart þegar hann sagði það ekki vera í sínum verkahring
að hjálpa til við útbreiðslu golfíþróttarinnar – hann væri í golfi til
sigra á risamótum.
Það er sorglegt að íþróttamaður í fremstu röð skuli hafa slíkt viðhorf
til íþróttarinnar sem hann á svo margt að þakka. Það er engu líkara
en að kylfingurinn hafi gleymt því hvaðan hann kom og hvað aðrir
hafa lagt á sig mikla vinnu til að koma honum þangað sem hann er
í dag. Þá hefur hann einnig gleymt því hvers vegna þetta sama fólk
lagði fram alla þessa vinnu og fjármagn. Í hverjum einasta golfklúbbi
eða golfsambandi heimsins leggja óteljandi eintaklingar (langflestir
í sjálfboðavinnu) á sig mikla vinnu til að efla íþróttina og útbreiðslu
hennar. Í því felst meðal annars að aðstoða bestu ungmennin við að
ná markmiðum sínum. Það drífur sjálfboðaliðana áfram. Stundum
heppnast ætlunarverkið, sem gerir þetta allt þess virði. Nýr kylfingur
skýst upp á stjörnuhimininn og þeir sem yngri eru fá þann draum að
feta í fótsporin.
Bestu kylfingar heims verða aldrei skyldaðir til að endugjalda
greiðann en það er sorglegt að þeir skuli ekki vilja gera það þegar
mikið liggur við og einstakt tækifæri býðst golfíþróttinni. Ólympíu­
leikarnir eru golfíþróttinni afar mikilvægir. Þar fyrir utan er varla
hægt að segja að í því felist mikil fórn fyrir kylfinga að „þurfa“ að
leika fyrir hönd þjóðar sinnar á Ólympíuleikum. Um er að ræða
stærsta íþróttaviðburð heims, sem haldinn er á fjögurra ára fresti.
Risamótin eru hins vegar haldin fjórum sinnum á ári og þótt háar
peningafjárhæðir séu í boði fyrir sigurvegarana þá hlýtur gull-,
silfur- eða bronspeningur að hafa mikla þýðingu. Fæstir íþróttamenn
fá nefnilega tækifæri til að taka þátt í mörgum Ólympíuleikum á
lífsleiðinni og það er óvíst að McIlory, Johnson, Spieth, Day eða
Scott bjóðist slíkt tækifæri aftur. Þegar kemur að íþróttum getur
nefnilega verið skammt stórra högga á milli. Stærsta golfstjarnan
getur hrapað til jarðar á einni nóttu. Við þekkjum skýr dæmi þess.
Að mínu mati hefði mátt velja annað keppnisfyrirkomulag á
Ólympíuleikunum en fjögurra daga höggleikskeppni. Ég held
að það hefði mátt keppnina áhugaverðari með annars konar
leikfyrirkomulagi, sérstaklega þegar litið er til þess hversu sviðið
var stórt og hversu langt er síðan keppt var í golfi á leikunum. Það
breytir því hins vegar ekki að leikarnir heppnuðust einstaklega vel
og voru góð auglýsing fyrir golfíþróttina. Ummæli þeirra keppenda
sem tóku þátt eru staðfesting þess auk þess sem sjónvarpsáhorfið var
það mesta sem mældist, að lokahring Masters frátöldum.

Þeir kylfingar sem kusu frekar að keppa á John Deere Classic mótinu
á PGA-mótaröðinni eða kusu jafnvel að keppa ekkert umrædda
viku, munu vonandi horfa til baka og hugsa með sér að þarna hafi
þeir gert stór mistök. Mistökin eru hins vegar til þess að læra af
þeim og aftur verður keppt í golfi á Ólympíuleikunum í Tókíó árið
2020. Ljósin á stóra sviðinu verða þá kveikt á nýjan leik og ég trúi
ekki öðru en að bestu kylfingar heims, í karla- og kvennaflokki,
verði þá tilbúnir að fara með rulluna sína.
Þar sem þetta síðasta tölublað Golf á Íslandi á þessu golftímabili
langar mig að lokum að þakka öllum sjálfboðaliðum í hreyfingunni
fyrir þeirra óeigingjörnu störf í sumar.
Með bestu kveðju,
Haukur Örn Birgisson
Forseti Golfsambands Íslands
Þegar tækifærin bjóðast
Takk fyrir
ógleymanlegan dag
Reykjavíkurmaraþon Íslandsbanka
Fleiri en 15 þúsund hlauparar tóku þátt í Reykjavíkurmaraþoni
Íslandsbanka 2016 og settu nýtt met í áheitasöfnun til styrktar
góðum málefnum.
Íslandsbanki óskar öllum hlaupurum til hamingju með glæsilegan
árangur. Sérstaklega þökkum við öllum þeim sem hétu á hlaupara
á hlaupastyrkur.is og tóku þannig þátt í stærstu fjáröflun landsins
fyrir góðgerðarfélög.
Við hlökkum til að sjá ykkur að ári!
8 GOLF.IS - Golf á Íslandi
Forseti Golfsambands Íslands