Golf á Íslandi - 01.10.2016, Qupperneq 11

Kylfingar hafa aldrei verið fleiri en nú og eru 16.820
skráðir í golfklúbba víðsvegar um landið. Þetta
er aukning um tæplega 400 kylfinga frá árinu
í fyrra. Fjölgunin er hvað mest í golfklúbbum á
höfuðborgarsvæðinu og Reykjanesinu.
Gott veðurfar, aukin markaðssetning og
fjölbreyttara framboð á félagaaðild gætu
verið líklegar skýringar á fjölguninni.
Þegar rýnt er í tölurnar kemur í ljós að
aukningin er mest hjá fólki sem er 50 ára
og eldra en sá hópur stækkar um heil 13%
milli ára. Á móti er fækkun í hópi fólks 22-
49 ára og nemur fækkunin um 7%. Einnig
fækkar börnum og unglingum yngri en 14
ára um 12%.
Í dag eru 55% allra kylfinga eldri en 50 ára
og í þeim aldurshópi eru flestir nýliðarnir.
Þar sem færri nýliðar undir 50 ára byrja í
golfi má segja að meðalaldur kylfinga sé að
hækka verulega hér á landi. Meðalaldur
kvenkylfinga er nú 52 ár og karlkylfinga
46 ár.
Aðsókn í golf á síðustu 16 árum hefur
verið gríðarleg. Í samanburði við árið 2000
hefur kylfingum fjölgað um rúmlega átta
þúsund og fjöldinn nánast tvöfaldast á þessu
tímabili. Á árunum 2000 til 2005 má segja
að árlega hafi fjölgun kylfinga verið um
12%, en síðustu fimm ár hefur aukningin
verið að meðaltali um 1%.
Ef við setjum þessa stærð í samhengi
við aðrar íþróttagreinar í landinu þá
er knattspyrnusambandið stærst með
rúmlega 22.000 félaga, en næst kemur
golfsambandið með tæplega 17.000 félaga.
Fimleikar og hestaíþróttir koma þar næst.
Capacent framkvæmir árlega neyslu- og
lífstílskönnun þar sem fram kemur að um
60.000 Íslendingar fara í golf a.m.k. einu
sinni á ári. Það má því segja að áætlaður
fjöldi kylfinga sé þrefalt meiri en þeir sem
eru skráðir í klúbba. Golfsumarið heldur
áfram og enn geta kylfingar skráð sig í
klúbba.