Neytendablaðið - 01.06.2015, Blaðsíða 14
Neytendasamtökunum hafa á undanförnum árum borist
margar athugasemdir vegna vátryggingarsamninga. Í
mörgum tilfellum snúast þessar kvartanir um binditíma
slíkra samninga og það að þeim er ekki hægt að segja
upp á samningstímanum, að líftryggingum undanskildum
en þeim hefur verið hægt að segja upp hvenær sem er.
Þannig hafa þeir neytendur sem hafa lent í ágreiningi við
sitt tryggingarfélag eða viljað segja upp samningi vegna
betri kjara annars staðar ekki haft erindi sem erfiði.
Þann 1. júlí næstkomandi mun sú framkvæmd heyra sög-
unni til því Alþingi hefur samþykkt breytingar á lög um
um vátryggingarsamninga sem gera það að verkum að
neytendur geta sagt upp slíkum samningum með eins
mánaðar uppsagnarfresti hvenær sem er á samnings tím-
anum. Þannig geta neytendur fært sig á milli vátrygg-
ingarfélaga t.d. ef betri kjör bjóðast annars staðar.
Undanfarin ár hefur þetta ekki verið möguleiki.
Nú endurnýjast vátryggingarsamningur sjálfkrafa ef
honum er ekki sagt upp og ef vátryggingartaki vill segja
upp samningi verður það að gerast innan mánaðar frá
því að tryggingarfélagið sendi reikning vegna gjalddaga
hins nýja vátryggingartímabils. Þannig hefur sá tími sem
neytendur hafa haft til þess að segja upp samningi verið
mjög skammur og oft hafa neytendur alls ekki verið með-
vitaðir um það að samningar endurnýist sjálfkrafa við
þessar aðstæður. Eins og áður sagði breytist þetta 1. júlí
næstkomandi, þegar breytingar á lögunum taka gildi, og
geta neytendur þá sagt upp vátryggingarsamningum
með eins mánaðar fyrirvara, en uppsögn miðast við
næstu mánaðarmót þar á eftir. Þannig telst vátrygging-
arsamningi sem sagt er upp 20. febrúar vera lokið 1.
apríl sama ár, svo dæmi sé tekið.
Vátryggingartaki getur því eftir 1. júlí sagt samningi upp
ef hann hefur ekki lengur þörf fyrir vátrygginguna, ef
fyrir hendi eru aðrar sérstakar ástæður sem réttlæta
uppsögn eða ef hann vill flytja vátryggingu til annars
félags. Þessi breyting er tilkomin vegna athugunar ESA,
Eftirlitsstofnunar EFTA, á því hvort aðkoma íslenska
ríkisins að endurreisn tryggingarfélagsins Sjóvár sam-
rýmd ist reglum EES-samningsins. ESA fór fram á að
nokkrar breytingar yrðu gerðar á löggjöf hér á landi til
að efla samkeppni, svo hægt væri að fallast á þjóðnýt-
ingu félagsins, og var hreyfanleiki viðskiptavina trygging-
arfélaga eitt af því sem ESA taldi að myndi hafa jákvæð
áhrif á samkeppni á vátryggingarmarkaði. Að lokum er
rétt að nefna að vátryggingarfélögum er óheimilt að taka
gjald vegna þess kostnaðar sem getur hlotist af því að
vátryggingu er sagt upp á samningstímabilinu.
Hefðbundin þvottavél er u.þ.b. 60 sm breið, 85 sm há og
60 sm djúp. Í sumum tilvikum henta svo stórar vélar
ekki og þá verður minni vél fyrir valinu. Í apríl birti
danska neytendablaðið Tænk gæðakönnun á minni
þvottavélum og náði hún til átta véla þar sem þvotturinn
er settur í að framanverðu og fimm véla þar sem þvott-
urinn er settur í að ofanverðu. Þessar vélar taka á bilinu
4-7 kg af þurrum þvotti. Niðurstöður gæðakönnunar-
innar, sem náði til 13 véla, voru það slakar að Tænk
treysti sér ekki til að gefa neinni vélanna meðmælin
„best í gæðakönnun“.
Sex þessara véla eru til á markaði hérlendis og eru fjórar
þeirra framhlaðnar og tvær topphlaðnar. Electrolux
EWS7146DU kostar 89.900 krónur, tekur 7 kg og fær 54
af 100 mögulegum í einkunn (sem var hæsta heildar-
einkunnin). Gorenje W6443/S kostar 98.900 krónur og
AEG L61460TL kostar 199.900 krónur. Báðar vélarnar
taka 6 kg og fá 50 í einkunn. Síðarnefnda vélin er topp-
hlaðin. Candy AQUA1041D1S kostar 72.995 krónur,
tekur 4 kg og fær 40 í einkunn. Zanussi ZWY61205WA
kostar á tilboðsverði 79.900 krónur, er topphlaðin, tekur
6 kg og fær 48 í einkunn. Loks er það svo Matsui
M510WM13E sem kostar 49.995 krónur, tekur 5 kg og
fær 35 í einkunn. Þetta var raunar ódýrasta þvottavélin
á markaði hér samkvæmt markaðskönnun sem Neyt-
enda samtökin gerðu 9. nóvember sl. í 15 verslunum og
er að finna á ns.is á læstum síðum fyrir félagsmenn
(sjá lykilorð á bls. 2 í þessu blaði).
Rétt er að taka fram að í gæðakönnunum Neytendablað-
sins eru einkunnir frá 0,5 til 5,5 en ekki 0-100 eins hjá
Tænk.
Máttu segja upp tryggingunum?
Ekki velja litla þvottavél nema nauðsyn krefji
Í stuttu máli
Hingað til hafa neytendur ekki getað sagt upp
samningi um tryggingar fyrr en eftir tólf mánaða
bindingu hjá sama félagi, enda samningarnir gerðir
til eins árs í senn. Nú heyrir það brátt sögunni til
en 1. júlí nk. munu breytingar á lögum um
vátryggingarsamninga taka gildi. Í þeim felst að
neytendur geta alltaf sagt upp tryggingum með
eins mánaðar fyrirvara án aukakostnaðar. Það
mun hafa jákvæð áhrif fyrir neytendur og gerir
þeim auðveldara að leita tilboða í tryggingar og
flytja sig milli fyrirtækja eftir eins mánaðar
uppsagnarfrest.
NEYTENDABLAÐIÐ // JÚNÍ 2015 // TrYggINgAr / LITLAr þVoTTAVéLAr14