Kiwanisfréttir - 01.04.2009, Blaðsíða 14

Við Höfðafélagar höfum haft ýmislegt fyrir stafni undanfarna
mánuði, bæði í starfi og leik og verður í þessum pistil stiklað á
stóru.
Við fengum góða gesti á fund okkar þann 6.11. sl., en þá
heiðruðu Matthías G. Pétursson umdæmisstjóri og Helgi
Straumfjörð svæðisstjóri Eddusvæðis, okkur með nærveru sinni.
Umdæmisstjóri lýsti m.a. kynnum sínum af Don Canaday
heimsforseta og sagði okkur skemmtilega og fræðandi sögu um
það hvernig hann hefur staðið að því í gegnum tíðina að fjölga í
Kiwanishreyfingunni með stofnun Kiwanisklúbba víða um heim.
Það er fastur liður hjá okkur að konurnar okkar hittast skömmu
fyrir jól til að föndra. Á þessu varð engin breyting þetta árið.
Þann 8. nóvember var föndurdagurinn að þessu sinni og var
föndrað í heimahúsi. Skv. venju mættum við „kallarnir“ á staðinn
þegar degi fór að halla, og var þá slegið upp matarveislu og
skrafað og skeggrætt fram eftir kvöldi.
Eins og ávallt er desember annasamasti mánuður okkar
Höfðafélaga í Kiwanisstarfinu. Jólafundurinn var að þessu sinni
haldinn í Kiwanishúsinu við Engjateig. Séra Sigríður
Guðmarsdóttir prestur í Guðríðarkirkju var gestur okkar að
þessu sinni og flutti hún jólahugvekju. Að sjálfsögðu borðuðum
við góðan mat en að þessu sinni svignuðu borð undan heitu og
köldu hangikjöti m.t.h. meðlæti.
Eins og undanfarin ár höfum við styrkt nokkrar fjölskyldur
með matargjöfum fyrir jólin. Að þessu sinni voru það 25
fjölskyldur í Grafarvogi og Grafarholti nutu þessara gjafa. Ekki
þarf að taka það fram að gjafirnar komu sér ákaflega vel fyrir þá
sem þær þáðu, enda hefur fjárhagsstaða ótrúlega margra sjaldan
verið verri en einmitt nú. Eins og áður var það kirkjan sem benti
okkur á þær fjölskyldur sem matargjafirnar fengu og að vanda
nutum við velvildar nokkurra íslenskra fyrirtækja sem gáfu
okkur þessa matvöru. Séra Sigríður Guðmarsdóttir aðstoðaði
okkur við matargjafirnar að þessu sinni. Kunnum við öllum
þessum aðilum okkar bestu þakkir.
Að venju er sala flugelda fyrir áramót okkar helsta tekjulind.
Að þessu sinni fór salan fram að Gylfaflöt 5 í mjög hentugu
húsnæði. Það er mjög slæmt fyrir okkur að hafa ekki fastan
samastað fyrir flugeldasöluna. Það er því alltaf töluvert
áhyggjuefni hjá okkur á hverju ári, hvort við finnum hentugt
húsnæði. Auðvitað viljum við helst vera í Grafarvoginum eða
helsta nágrenni hans, en það er því miður ekki alltaf hægt. Í
hitteðfyrra urðum við t.d. að vera með sölustaðinn í
Kópavoginum.
Við vorum ekki mjög bjartsýnir með söluna fyrir þessi áramót
vegna kreppunnar. En okkur til ánægju reyndist salan meiri en
við gerðum ráð fyrir. Staðreyndin er nefnilega sú að við höfum
gætt þess að vera með góða vöru á góðu verði í gegnum tíðina.
Auðvitað er stór hluti okkar viðskiptavina þeir sömu ár eftir ár og
breytir þá engu þótt þeir þurfi að fara heldur lengri leið en
vanalega eftir flugeldunum sínum. Þessum aðilum erum við
ákaflega þakklátir og að sjálfsögðu einnig öllum hinum sem
versla við okkur og með því styðja okkur til góðra verka.
Vonumst við til að sjá sem flesta þeirra fyrir næstu áramót.
Þann 13. febrúar blótuðum við þorra. Að þessu sinni fór blótið
fram í heimahúsi en ákveðið hafði verið að halda kostnaðinum
við blótið í lágmarki. Þetta var ákaflega vel heppnað og
skemmtilegt kvöld en heldur var mætingin í lakara lagi að mati
undirritaðs. Ekki veit ég hverju um er að kenna, en varla getur
það verið maturinn, því eins og allir vita er hann algert lostæti og
það er sko eitthvað annað að skófla í sig pungum, hval og súru
slátri í stað einhverra torkennilegra, naumt skammtaðra og
rándýrra rétta með útlendum nöfnum. Sameiginlegur fundur
með Jörfa, öðrum móðurklúbba okkar, var haldinn þann 5.
febrúar.
Á þeim rúmu 10 árum sem undirritaður hefur verið félagi í
Höfða hafa margir fyrirlesarar heimsótt okkur félagana á
almenna fundi. Yfirleitt hafa þessir fyrirlesarar verið
skemmtilegir og/eða áhugaverðir. En að öðrum ólöstuðum þá
var fyrirlesari sá sem heimsótti okkur þann 5. mars sá allra
skemmtilegasti sem ég man eftir. Þessi ágæti maður er séra
Gunnar Sigurjónsson, prestur í Digraneskirkju. Séra Gunnar er
ekki bara prestur heldur ber hann titilinn „sterkasti prestur í
heimi“. Þá nafnbót hlaut hann í júní 2004. En það er næsta víst að
verði einhvern tímann keppt um nafnbótina „fyndnasti prestur í
heimi“ þá er séra Gunnar verðugur kandidat. Klerkurinn reitti af
sér „sanna“ brandara til hægri og vinstri milli þess sem hann tók
í nefið og snýtti sér. Brandararnir voru mest ferða- og veiðisögur
„STERKASTI PRESTUR Í HEIMI“
HEIMSÓTTI HÖFÐA
Flugeldasala Höfða stendur undir kostnaði vegna matargjafa.
Sterkasti prestur í heimi.
14