Tölvumál - 01.10.1988, Blaðsíða 15

eiga tölvukerfi þurfa einnig að þjálfast í notkun þeirra. Eftir að þeir
hafa náð valdi á kerfunum þurfa þeir enn nokkurn tíma til að ná upp
fullum afköstum. Þennan kostnað verður að reikna til stofnkostnaðar
við tölvuvæðinguna.
Starfshættir breytast
Dagleg vinnubrögð þeirra sem nota tölvukerfin breytast. Það kallar oft
á að breyta þurfi starfsaðstöðu fólks. Breyta þarf innréttingu húsnæðis.
Kaupa verður ný húsgögn og tæki. Ákveðnir atvinnusjúkdómar eru
algengir á meðal fólks, sem vinnur lengi við tölvuskjái. Þá má oft
rekja til lélegra húsgagna og slæmrar vinnuaðstöðu. Til þess að koma
í veg fyrir atvinnusjúkdóma þarf að skapa starfsfólkinu þá aðstöðu
sem störfin krefjast. Því fylgir ákveðinn kostnaður. Oft er gert átak
til að skoða niður í kjölinn þau verkefni, sem til stendur að tölvuvæða.
Það er kallað að gera úttekt á verkinu. Sá kostnaður, sem fylgir út-
tektinni, er ekki alltaf innifalinn í hugbúnaðarkostnaði fyrirtækis eða
stofnunar, sem tölvuvæðist. Þetta á sérstaklega við um þau verkefni,
sem leyst eru með sérhönnuðum hugbúnaði.
Húsgögn
Gömul húsgögn þarf að taka úr notkun og fá í þeirra stað önnur ný,
sem hönnuð eru með tilliti til tölvunotkunar. Fólk, sem situr lengi
fyrir framan tölvuskjái, þarf á góðum stólum að halda. Af þeim sökum
er algengt að skipta þurfi um stóla hjá þeim starfsmönnum, sem mest
nota tölvuskjáina. Einnig má nefna afgreiðsluborð. Á nýjum borðum
þarf að vera unnt að koma fyrir skjám og prenturum. Sama máli gegnir
um venjuleg skrifborð. Á mörgum gömlum skrifborðum er ekki unnt að
hafa tölvuskjá og lykilborð. Tölvuskjái, sem unnið er reglulega við,
þarf að hafa á sérstökum vinnuborðum. Þau eru af ýmsum gerðum og í
mörgum verðflokkum. Menn hafa oft reynt að nota venjuleg skrifborð,
sem hafa verið fyrir hendi áður en til tölvuvæðingar kom. Reynslan
sýnir að þegar skjáir eru mikið notaðir býður það upp á vöðvabólgu og
aðra atvinnusjúkdóma að bæta ekki vinnuaðstöðu starfsfólksins.
Innréttingar og lagnir
Tölvuvinnsla krefst þess að sköpuð sé aðstaða á vinnustað fyrir það
fólk, sem á að nota tölvurnar, og að tækjunum sjálfum sé komið fyrir
í samræmi við kröfur. Meðal annars þarf að leggja rafleiðslur á milli
tækja. Skjáir, prentarar og önnur tæki tengjast miðstöð tölvu með
köplum. Þá þarf oftast að gera einhverjar breytingar á húsnæði því
15 TÖLVUMAL