Árbók Landsbókasafns Íslands - Nýr flokkur - 01.01.1983, Qupperneq 66

66
BRÉF WILLARDS FISKES
Prestur [góður] og kæri herra,
Tvö seinustu bréf yðar, frá í febrúar og ágúst í fyrra, bárust mér bæði í sama pósti.
Það varð mér til mikillar ánægju að fá fréttir af yður og hinni íjarlægu eyju, sem er
mér svo hugleikin. Ljósmyndir hr. Þórbergssonar bárust mér um svipað leyti. Þær
reyndust vera miklu betri en ég hafði búizt við, - satt að segja ágætar -, og hafa
stórlega aukið þekkingu mína á umhverfi yðar. Þá hefur dr. [Þorvaldur] Thoroddsen
ennfremur rétt í þessu sent mér afar fróðlega ritgerð eftir sig, Et Besög paa Grimsö,
sem er aðdáanlega vel samin og mikilsverð, ekki aðeins vegna efnisins, heldur einnig
hins ágæta korts, sem í henni er og mér virðist miklu betra en nokkurt annað kort,
sem ég hef séð. Fyrir tveimur árum rissaði einn af aðstoðarmönnunum í danska
sjóskjalasafninu (So-Archiv) upp kort af Grímsey handa mér, en það reyndist um
mjög margt ónákvæmt. Ég vildi óska, að dr. Thoroddsen gæti heimsótt eyna aftur og
staðið miklu lengur við og lýst þessum merkilega stað mun rækilegar fyrir veröldinni.
Ég vona innilega, að veturinn hafi verið bærilegur yður og fjölskyldu yðar,
ennfremur öllum sóknarbörnum yðar og bækurnar, sem ég sendi yður, hafi orðið
yður öllum til einhverrar skemmtunar í þrautum þeim, er hin stranga veðrátta
veldur yður. Mig langar mjög til að vita, hvernig yður hefur reitt af hina köldu
mánuði, og vonast til að frétta, að þér hafið öll lifað þá af við góða heilsu.
Vegna tíðra gigtarkasta, sem bundið hafa mig að mestu heima, hef ég ekki síðustu
mánuðina getað komið áleiðis til Eyjarbókasafnsins mörgum bókum til viðbótar. Ég
býst við að senda yður nokkrar fleiri bækur, þegar hlýnar í veðri, því að við á Ítalíu
eigum í janúar og febrúar við kulda að búa, þótt hann jafnist auðvitað ekkert á við
þær hörkur, sem þér fáið að reyna.
Nú er staddur hjá mér, en verður einungis fram í miðjan næsta mánuð, Halldór
Hermannsson, er þér kannizt við. Hann er að vinna að skrásetningu íslenzka
bókasafnsins míns, heljarmiklu verki, sem því miður sækist seint. Mér er kappsmál
að koma skránni á prent, áður en ég fell frá, því að þar verða talin í stafrófsröð nær öll
verk, bæði forn og ný, auk langflests af því, sem vitað hefur verið um rúnir, goðafræði
og hvers konar minjar norrænpar fornaldar. I safninu eru öll rit um íslenzka
náttúrufræði og eins allar ferðabækur varðandi ísland. I því eru nú milli 8000 og
9000 bindi.
Ég býst við, að þér hafið ekki haft spurnir af amerísku bókunum, sem bóksalarnir
G.P. Putnam’s Sons í New York sendu yður. Þeir sendu þær því miður vitlausa leið,
og ég óttast, að þær muni aldrei komast tíl skila. Skyldi þó svo fara, bið ég yður að
láta mig vita og tiltaka þá fjölda bókanna og stuttan titil hverrar þeirra. Þær voru
sendar frá New York með einu þessara svokölluðu “Express Companies”, þvert ofan
í fyrirmæli mín, sem voru, að senda skyldi þær í pósti. Öðrum kosti áttu þær aldrei að
fara frá New York.
Tímaritið “í uppnámi” lýkur göngu sinni með lokum 2. bindis, svo sem þér hafið
e. t. v. heyrt. Tilgangurinn allt frá upphafi var einungis sá að búa í hendur
landsmönnum yðar dálítið safn skáka og skákþrauta, auk nokkurrar fræðslu um sögu
íþróttarinnar. Þar sem því markmiði hefur verið náð, er nú hætt við útgáfuna. Þetta
hefur þó vakið nægilegan áhuga til þess, að nú er fastur skákþáttur í einu
Reykjavíkurblaðanna. Ég vona, að tímaritið hafi einnig orðið skákmönnum í
Grímsey að nokkru gagni.