Morgunblaðið - 25.10.2003, Blaðsíða 44
m 44
Hinrik Prins, eiginmaður Margrétar Þór-
hildar Danadrottningar, er mikill ástríðu-
kokkur og elskar að tala um mat. Prinsinn
og Margrét borða yfirleitt keisarasúpu á
veturna þegar þau búa í Amalienborg.
Uppskriftina fékk prinsinn hjá japanska
keisaranum sem ljúflega gaf honum upp-
skriftina (sjáið þið fyrir ykkur umræðuna
hjá þessum tveimur virðulegu mönnum).
Hjónin bjóða oft tignum gestum þessa
súpu og það er einmitt það sem þið eigið
að gera, kæru lesendur.
KEISARALEG SVEPPASÚPA
F. 4
6 dl kjúklingasoð
4 egg
250 g sveppir, ýmsar gerðir
1 msk ólífuolía
4 dl kjúklingasoð
½ bolli af góðu þurru sérríi
salt
nýmalaður pipar
basilika
Ef súpan á að heppnast vel er best að búa
til kjúklingasoð úr einum kjúklingi. Hrærið
eggjunum saman við 6 dl af soði og krydd-
ið með salti og pipar. Sigtið súpuna og
hellið í fjórar eldfastar súpuskálar. Leggið
súpuskálarnar í vatnsbað í 10 mínútur.
Hreinsið sveppina og skerið niður og steik-
ið í olíu stutta stund og kryddið með salti
og pipar. Hitið nú afganginn af kjúklinga-
soðinu. Setjið sveppina í súpuskálarnar og
hellið soðinu yfir. Skreytið með basilíku og
berið fram strax.
Með þessari súpu er tilvalið að drekka Le
chablis Premier cru vieille vingne.
Það er eitthvað við það að fletta gömlum
kokkabókum, ég fékk eina slíka frá ömmu
Gauju fyrir mörgum árum sem nefnist
„Prinsessornas Kokbok. Husmanskost
och helgdagsmat“ frá árinu 1945. Inni í
bókinni eru yndislegar ljósmyndir af krón-
prinsessunum Mörtu frá Noregi, Margréti
frá Danmörku og Astrid frá Hollandi. Þær
eru allar með skuplur á höfði og með
hvítar svuntur, eflaust ekki uppáhalds-
fötin þeirra! Þessi bók var nú farin að
safna ryki hjá mér en þá datt mér í hug að
það gæti verið gaman að elda upp úr
henni. Ég setti mig í stellingar og bjóst
við miklum veislumat en þá kom í ljós að
þetta er bara heiðarleg og yndisleg
kokkabók. Ég valdi af handahófi þrjá
rétti, forrétt, aðalrétt og eftirrétt, og þá
er bara að skella sér í prinsessufötin
(munið eftir skuplunni) og elda handa
góðum gestum. Hafið í huga að sá sem
býður vinum sínum í mat án þess að
leggja hjarta sitt og sál í matseldina á alls
ekki skilið að eiga vini.
GRAFLAX
F. 12
2 kg lax
2 msk gróft salt
1 tsk hvítur pipar
2 msk sykur
handfylli af dilli
Beinhreinsið laxaflökin, skolið og þerrið
vel. Nuddið salti og pipar á flakið, leggið
handfylli af dilli á álpappír og leggið flakið
ofan á (snúið roðinu niður). Leggið dill ofan
á fiskflakið og þrýstið vel niður. Pakkið vel
inn og látið bíða í ísskáp yfir nótt.
Berið fram með t.d. graflaxsósu (blandið
saman olíu, vínediki, sykri, hvítum pipar,
salti og frönsku sinnepi) og brauðstöngum
sem búnar eru til úr smjördeigi.
„Hefur þú borðað eitthvað gómsætt nýlega?“
Texti: Sigurlaug M. Jónasdóttir
Ljósmyndir: Áslalug Snorradóttir
ÞEGAR FRAKKAR HITTAST BYRJA ÞEIR
EKKI Á ÞVÍ AÐ SPYRJA ÚT Í HEIMSMÁLIN
HELDUR KEMUR ÞESSI SPURNING YFIR-
LEITT FYRST: „HEFUR ÞÚ BORÐAÐ EITT-
HVAÐ GÓMSÆTT NÝLEGA?“
HUMAR Á HRÍSGRJÓNABEÐI
F. 6
1½ kg humar með eða án skeljar
salt
hvítur pipar
1 dl olía
2 msk smjör
2 skallottulaukar
4 dl hvítvín
3 msk koníak
3 tómatar
hnífsoddur af cayennepipar
Hrísgrjón:
3 dl hrísgrjón
2 litlir gulir laukar
3 msk smjör
7 ½ dl soð
salt
Byrjið á því að matbúa hrísgrjónin. Steikið
laukinn í smjöri og svitið hann. Bætið hrís-
grjónum út í ásamt vatni og sjóðið í tuttugu
mínútur.
Þá er að snúa sér að humrinum. Steikið
laukinn í olíu og smjöri og saltið og piprið.
Skerið niður tómatana og bætið út í lauk-
inn. Látið malla stutta stund og bætið kon-
íaki og hvítvíni út í ásamt humrinum, látið
malla í stutta stund, en passið vel að of-
sjóða ekki humarinn. Leggið hrísgrjónin á
disk og humarinn þar ofan á. Hellið sósunni
yfir og berið fram strax.