Fréttablaðið - 12.10.2008, Blaðsíða 6
6 12. október 2008 SUNNUDAGUR
EFNAHAGSMÁL Skólastjórnendur
finna fyrir því að heimilin hafa
minna milli handanna en áður. Í
Rimaskóla eru foreldrar farnir að
gefa peningaleysi sem ástæðu
fyrir því að börn geti ekki tekið
þátt í tómstundastarfi. Í unglinga-
skólanum Garðaskóla hefur leyfis-
beiðnum vegna utanlandsferða
fækkað og skólastjórinn verður
var við auknar áhyggjur af kostn-
aði.
Skólar landsins fengu bréf frá
menntamálaráðherra í vikunni þar
sem stjórnendur eru hvattir til að
skoða hvaða úrræði væru fyrir
hendi til að takast á við kreppuna á
sem uppbyggilegastan hátt. Skólar
fengu svipað bréf frá fræðslu-
stjórum. Starfsfólk skólanna er á
varðbergi gagnvart líðan barna og
tilfinningum þeirra. Í mörgum
skólum ræða kennarar við nem-
endur og svara spurningum.
Helgi Árnason, skólastjóri Rima-
skóla, segir að ástandið hafa
breyst, krakkar geti komið illa
fyrir kallaðir í skólann, þau geti
verið grátgjörn og fljót upp. Innan
skólanna séu áhyggjur af greiðsl-
um fyrir þjónustu.
„Við erum með flesta krakka í
áskrift í mötuneyti og höfum
kannski áhyggjur af því að það
innheimtist verr en áður. Við
höfum líka verið að innheimta
ýmis skólaverkefni, ferðir á vegum
nemenda eða verkefni sem kalla á
kostnað foreldra sem og tóm-
stundanámskeið. Við finnum
aðeins fyrir því að krakkarnir hafi
ekki efni á því að fara á tómstunda-
námskeið. Ég var til dæmis að aug-
lýsa skákskóla sem kostar 5-10
þúsund krónur. Einhverjir svör-
uðu að þeir gætu ekki verið með
því að þeir hefðu ekki efni á þessu,“
segir hann.
Ragnar Gíslason, skólastjóri
Garðaskóla, segir að kennarar
skólans hafi rætt við krakkana um
ástandið. Sjálfur hafi hann hitt
nemendaráðið til að heyra hvernig
krakkarnir skynja ástandið. „Við
erum að draga andann og athuga
hvaða áhrif ókyrrð á heimilunum
hefur á börnin. Síðan erum við að
skapa jákvætt skólastarf þannig
að skólinn sé þeirra griðastaður.“
Margrét Geirsdóttir, forstöðu-
maður á Ísafirði, segir að samstarf
sé að hefjast innan bæjarkerfisins
við Fjölmenningarsetur, vinnu-
miðlun, verkalýðsfélög og fleiri.
Hugsanlega komi kreppan ekki
eins hart niður fyrir vestan.
„Ákveðin spenna er í andrúmsloft-
inu en við erum ekki farin að finna
hvar skórinn mun kreppa.“
ghs@frettabladid.is
Taka á kreppunni á
uppbyggilegan hátt
Heimilin hafa minna milli handanna en áður. Börn geta ekki tekið þátt í tóm-
stundastarfi vegna peningaleysis. Leyfisbeiðnum vegna utanlandsferða hefur
fækkað. Skólastjórnendur hafa áhyggjur af því að greiðslur berist verr en áður.
HELGI ÁRNASON MARGRÉT
GEIRSDÓTTIR
ÁHYGGJUR GETA BROTIST ÚT Skólastjórnendur finna fyrir því að heimilin hafa minna
milli handanna en áður. Innan skólanna eru áhyggjur af greiðslum fyrir þjónustu, til
dæmis áskrift í mötuneyti. Áhyggjur fjölskyldnanna geta brotist út hjá börnunum í
skólanum. Kennarar ræða við börnin og svara spurningum sem brenna á þeim.
MYNDIN ER ÚR SAFNI OG TENGIST EFNI FRÉTTARINNAR EKKI BEINT.
DÓMSMÁL Tveir rúmlega tvítugir
menn hafa verið dæmdir í sex og
átta mánaða fangelsi. Þeir struku
af Litla -Hrauni, fóru víða og létu
greipar sópa.
Fyrst brutust þeir inn í hesthús
á Eyrarbakka og stálu meðal
annars skrautsverði. Síðan lá
leiðin í vinnuskúr í Árborg. Þar
stálu þeir vinnufatnaði. Þar
skrifuðu þeir á vegg vinnuskúrs-
ins: „Takk fyrir okkur, stroku-
fangar á Litla-Hrauni.“ Mennirn-
ir héldu áfram að fara á milli
staða og stela, þar á meðal
vegabréfum, bíl og innkaupakorti
Það notuðu þeir til að kaupa mat
og sígarettur. Báðir eiga brota-
feril að baki. - jss
Sex og átta mánuði inni:
Fangar létu
greipar sópa
DÓMSMÁL Karlmaður á fimm-
tugsaldri hefur verið ákærður
fyrir að ráðast á annan mann og
stórskaða hann í andliti.
Manninum er gefið að sök að
hafa ráðist á fórnarlambið í
húsnæði Þvottahallarinnar,
Grófinni 27, Reykjanesbæ,
slegið hann hnefahöggi í andlit
svo að hann hlaut brot á kinn-
beini vinstra megin í botni
augntóftar með brotlínu eftir
öllu gólfi augntóftar og upp í
augntóftina nefmegin. Jafnframt
rispu á hornhimnu augans,
glóðarauga og nefblæðingu auk
þess sem höggið leiddi til
tvísýni.
Sá sem fyrir árásinni varð
krefst 484 þúsunda króna í
skaðabætur. - jss
Ákærður og krafinn bóta:
Stórskaðaði
mann í andliti
NÓBELSVERÐLAUN Martti Ahtisaari,
fyrrverandi Finnlandsforseti,
hlýtur friðarverðlaun Nóbels í ár
fyrir aðild sína að friðarumleitun-
um víða um heim undanfarna þrjá
áratugi.
„Öll sín fullorðinsár, hvort
heldur sem háttsettur embættis-
maður í Finnlandi og forseti eða á
alþjóðavettvangi, oft í tengslum
við Sameinuðu þjóðirnar, hefur
Ahtisaari unnið að friði og
sáttaumleitunum,“ segir í tilkynn-
ingu norsku Nóbelsnefndarinnar.
Þar eru nefnd alvarleg átök víða
um heim, sem hann hefur átt þátt í
að leysa, svo sem aðild hans að
stofnun sjálfstæðs ríkis í Namibíu,
lausn á deilu íbúa Aceh-héraðs við
stjórnvöld á Indónesíu árið 2005,
og svo þátt hans í lausn á deilum
um Kosovohérað. - gb
Martti Ahtisaari:
Vinnur að friði
víða um heim
MARTTI AHTISAARI Hann hlýtur friðar-
verðlaun Nóbels í ár.
Forsetakjör í aðra umferð
Maumoon Abdul Gayoom, sem hefur
verið forseti Maldíveyja í Indlandshafi
í 30 ár, hlaut flest atkvæði í fyrstu
lýðræðislegu forsetakosningunum
í landinu. Þar sem hann fékk ekki
hreinan meirihluta verður efnt til
úrslitaumferðar milli hans og höf-
uðandstæðings hans, Mohameds
Nasheed. Gaoyoom fékk 41 prósent
en 25 prósent komu í hlut Nasheeds.
MALDÍVEYJAR
EFNAHAGSMÁL Tryggja þarf matvælaöryggi þjóðar-
innar í efnahagssamdrættinum. Einar K. Guðfinns-
son, landbúnaðar- og sjávarútvegsráðherra, hefur
fundað með Eiríki Blöndal, forsvarsmanni Bænda-
samtaka Íslands, um leiðir til að reyna að tryggja
stöðu landbúnaðar og um leið sjá til þess að hér
ríki matvælaöryggi.
Til að hægt sé að stunda sjávarútveg og landbún-
að þarf að tryggja ýmsar innfluttar vörur. Það
mikilvægasta er eldsneyti svo hægt sé að sigla
skipum og koma vörum til og frá en svo eru þættir
eins og umbúðir, varahlutir, veiðarfæri og kjarn-
fóður. Til þess að fjármagna það þarf gjaldeyri.
„Menn mega ekki gleyma því að Íslendingar eru
fyrst og fremst matvælaframleiðsluþjóð þegar
kemur að framleiðslugreinum. Í þeim skilningi
erum við sjálfum okkur nóg.
Stóra málið er samt að tryggja að hér geti farið
fram eðlileg gjaldeyrisviðskipti. Takist það eru
allar aðstæður til að tryggja matvælaöryggi,“
segir Einar. „Það verður ekki matvælaskortur á
Íslandi ef gjaldeyrisviðskipti eru tryggð. Það er
stóra málið sem við verðum að vinna að,“ segir
Einar. - kdk
Án gjaldeyris er matvælaöryggi þjóðarinnar ekki tryggt:
Matvælaöryggi ótryggt án aðfanga
LANDBÚNAÐUR Leitað er leiða til að sjá til þess að þjóðin geti
aftur farið að stunda eðlileg gjaldeyrisviðskipti svo hægt sé að
kaupa nauðþurftir fyrir samfélagið.
STJÓRNMÁL Ögmundur Jónasson,
þingmaður Vinstri hreyfingarinnar
- græns framboðs, er hneykslaður á
ummælum Halldórs Ásgrímssonar,
fyrrverandi forsætis ráðherra, í
Fréttablaðinu í gær.
„Ég held að mörgum hafi brugð-
ið í brún við að sjá hverjir nú eru
komnir upp á dekk til ráðgjafar um
lausn á vanda Íslendinga. Annars
vegar Alþjóðagjaldeyrissjóðurinn
og viti menn, Halldór Ásgrímsson
sem þykist búa yfir einhverjum
húsráðum,“ segir Ögmundur. „Við
megum ekki gleyma því að hann
var einn af leiðsögumönnum okkar
út í það fen sem við nú erum stödd
í. Þegar hann fagnar að Alþjóða-
gjaldeyrissjóðurinn sé að koma til
sögunnar segist hann vera þess vel
meðvitaður að sjóðurinn komi til
með að setja okkur ákveðnar skorð-
ur. En það þurfi hvort sem er að
taka ákvarðanir sem muni leiða
okkur til betri framtíðar. Þessi orð
hljóta að verða okkur tilefni til
umhugsunar,“ segir hann. „Jafnan
þegar Alþjóðagjaldeyrissjóðurinn
kemur að því að ræða málefni þjóð-
ar sem á í vanda hugar hann fyrst
og fremst að tvennu. Í fyrsta lagi
að tryggja að alþjóðaauðmagnið fái
eins mikið út úr þrotabúum og
kostur er, sem þýðir á mannamáli
að það á að tryggja að börnin okkar
og barnabörn verði látin borga sem
mest fyrir gróðavæðingu síðustu
tíu ára. Í öðru lagi hefur sjóðurinn
haft það að vinnureglu að finna
leiðir til að auðmagnið fái greiðan
aðgang að endurreistu samfélagi.
Það er gert með kröfum um
markaðs væðingu.“
Ögmundur gagnrýnir Halldór
fyrir að vilja virkja sem aldrei fyrr
og láta ekki löggjöf þvælast fyrir
okkur. „Ég spyr hver verður til
varnar fyrir íslenskt samfélag ann-
ars vegar og náttúruna hins vegar
ef menn sem eru svona þenkjandi
og Alþjóðagjaldeyrissjóðurinn með
sína hugmyndafræði leggja saman
í púkk. Það er ekki gæfulegur kok-
teill.“ - fb
Ögmundur Jónasson gagnrýnir ummæli Halldórs Ásgrímssonar um efnahagsmál:
Segir Halldór hafa leitt Íslendinga í skuldafen
ÖGMUNDUR JÓNASSON Ögmundur
gagnrýnir ummæli Halldórs Ásgrímsson-
ar í Fréttablaðinu á laugardag harðlega.
KJÖRKASSINN
Hyggur þú á utanlandsferð í
vetur?
Já 26,5%
Nei 73,5%
SPURNING DAGSINS Í DAG:
Á Ísland að sækja um stuðning
Alþjóðagjaldeyrissjóðsins?
Segðu skoðun þína á Vísir.is