Skinfaxi - 01.08.1978, Side 10

keppni í jurtagreiningu. Stella Guðmunds-
dóttir, UMSK, reynist hafa mest vit á
blómum, en Ketill Tryggvason, HSÞ, næst
mest.
Að beita línu svo vel sé er enginn leikur
en þegar líka þarf að flýta sér er vissara að
vera nokkuð klár. Það vefst ekki fyrir
Gylfa Magnússyni, HSH, að samtvinna
þetta hvorutveggja og tryggja sér sigur
verðlaunin, þó má þar engu muna því þeir
félagar Haraldur Benediktsson, UMSK, og
Magnús Hreiðarsson, HSÞ, kunna sitthvað
fyrir sér.
Knattleikir
í borðtennis er keppt til stiga í fyrsta sinn
nú eins og í blaki. í kvennaflokki sigrar
Guðrún Einarsdóttir, UMSK, og karla-
flokki Jón Sigurðsson, UMFK, og bætir
þar með nokkuð fyrir frammistöðu sinna
manna í knattspyrnunni.
í knattspyrnu heldur keppnin áfram.
UMSK sigrar HSK 3:2, jafnt verður með
HSH og UÍA og skorar hvorugt liðið mark,
að siðustu sigrar UMSK knattspyrnumenn
HSÞ 1:0. Nokkrir eftirmálar verða að leik
þessum er þeir Þingeyingar þykjast hafa
orðið þess varir að UMSK notast við óeðli-
lega marga liðsmenn, þó ekki inni á vellin-
um, þar eru þeir alltaf 11, en þess utan hafa
þeir úr of mörgum að moða. Kæran fer
fyrir dómnefnd sem ekki getur komið auga
á neitt saknæmt og visar kærunni á bug.
Þingeyingar, sárir mjög, draga sig út úr
frekari keppni. Það kemur berlega í ljós að
reglugerð sú sem sett er fyrir landsmót
UMFÍ er að mörgu leyti gölluð þrátt fyrir
að síðasta þing UMFÍ hafi þóst gera á
henni verulegar umbætur. Nóg um það.
í íþróttahúsinu nýja fer til skiptis fram
keppni í körfubolta og blaki. Blakið er
greinilega mjög vinsæl grein ef marka má
þann áhorfendafjölda sem það dregur að
sér. UMSK sigrar UÍA með tveimur
hrinum gegn engri, og UMSE ber sigur af
HSÞ 2:1. Það er þá orðið ljóst að HSK og
UMSE munu keppa um fyrsta sætið en
HSÞ og UMSK um þriðja og fjórða sætið.
Handknattleikur kvenna er í fullum
gangi á steypta planinu við barnaskólann.
Þar sigrar UMSK lið Grindvíkinga 11:9 og
HSÞ Njarðvíkinga 12:6. Að þessum leikj-
um loknum er ljóst að UMSK og HSÞ
munu keppa til úrslita um 1. og 2. sæti og
UMFG og UMFN um 3. og 4. sæti.
Skák.
Úr því við erum við barnaskólann þá er
rétt að líta inn fyrir til skákmannanna sem
þar sitja og láta hávaðann úti fyrir lítið
trufla sig. Tvær umferðir eru tefldar á þess-
um degi og er staðan nú að lokinni þeirri
síðari að UMSK er með 10 vinninga, HSS 9
1/2, UÍA 7 1/2, USAH 6 1/2, UMFB 5 1/2
og UV 5 vinninga.
Glíma
Úr gamla íþróttasalnum við barnaskól
ann heyrast stympingar og stunur sterkra
manna. Glíman virðist orðin nokkur horn-
reka á landsmótum, aðeins þrjú sambönd
senda keppendur til hennar, það eru HSÞ,
HSK og Víkverji. Keppt er í þremur
þyngdarflokkum. Um úrslit er getið á
öðrum stað í blaðinu.
10
SKINFAXI