Muninn - 01.11.1994, Blaðsíða 5
Rifsf jórnarpistill
Jæja gott fólk!
Hér gefur að líta fyrsta tölublað vetrarins. Við höfum lagt kapp á að hafa
efni þess sem fjölbreytilegast og vonum að allir finni eitthvað við sitt hæfi.
Við gerð fyrsta blaðs koma upp margvísleg vandamál sem við reynum að
leysa úr eftir bestu getu. Eflaust má þó finna eitthvað sem er ábótavant og þá
biðjum við ykkur, kæru skólasystkin, að láta okkur vita, því þetta er jú ykkar
blað.
Við viljum hvetja alla til að senda inn efni. Bekkir og félagahópar geta t.d.
tekið sig saman og skrifað eitthvað sniðugt. Einnig viljum við benda fólki á að
við getum ekki birt greinar nema þeim fylgi fullt nafn höfundar (hann getur
kosið að birta greinina undir dulnefni).
Sú hugmynd hefur komið fram að hafa ákveðið þema í hverju blaði (þá er
ekki átt við að aðeins sé fjallað um eitt efni í öllu blaðinu, heldur að ritstjórn
skrifi um eitthvert ákveðið efni og nemendur segi svo skoðun sína á því). Verið
nú virk og sýnið að þið hafið skoðanir á hlutunum. Hvað finnst ykkur um nýja
punktakerfið? Er tæknin að leiða okkur til glötunar? Hvað með spillingu í
þjóðfélaginu, þrífst hún innan veggja skólans? Er mjólk góð?
Muninn er vettvangur fyrir alls kyns pælingar og verið því ekki feimin við
að nota hann. Markmið okkar er að Muninn endurspegli skólalífið og þann
anda sem ríkir í skólanum hverju sinni. Það þýðir ekki að halda of fast í gamlar
hefðir þegar Muninn á í hlut því andinn í skólanum nú er ekki sá sami og fyrir
tíu eða tuttugu árum. Við tökum öllum ábendingum um efni í blaðið með bros
á vör.
Aö lokum viljum við þakka öllum sem lögðu hendur á plóginn, sér í lagi
1. bekkingum, sem eiga heiður skilið fyrir sína hjálp. Takið þá til fyrirmyndar.
Lifið heil,
Ritstjórn
RS. Gvendur frændi hans Jónka fær
þúsund kossa fyrir lán á
upptökutæki.
P.S.^ Gauti og Gísli Jón fá þúsund
blauta kossa fyrir ómetanlega
aðstoð við uppsetningu blaðsins.
P.S.^ Þökkum Sverri Páli fyrir
teboð og miðnæturspjall.
MUNINN
5