Kirkjuritið - 01.04.1955, Síða 32

Kórvígsla í Elliheimilinu Grund
„Sæðið grær og vex“, þetta yndislega orð á við um Elli- og
hjúkrunarheimilið Grund, sem óx upp úr nálega ósýnilegri
byrjun og varð að stórhýsinu við Hringbraut. Og þetta stórhýsi
hefir skotið nýjum greinum í norður, austur og vestur, svo að
nú er það í röð mestu húsa landsins. Innan þess veggja munu
nú dvelja um 400 manns, vistmenn og starfslið.
í austurálmu hússins, sem nú er fyrir nokkru fullgerð, er
salur mikill á efstu hæð, um 20 metra langur og eftir því á
breidd, og var hans orðin mikil þörf. Þarna geta líklega um
250 manns setið.
Fyrir austurgafli hans er tjald mikið, dökkrautt, er vekur
litla athygli hversdagslega. En ef það er dregið frá, birtist
alveg ný sýn: Kórgafl með altari fyrir miðju og prédikunarstól
við suðurhlið. Á altarinu er krossmark og kirkjugripir aðrir,
en yfir því er fornlegt listaverk í veglegri umgerð. Kórinn er
klæddur dökkrauðum dúk á gólfi. En við þetta breytist hinn
mikli salur í vistlega kirkju.
Þessi kór var vígður sunnudaginn 6. febrúar af biskupi lands-
ins dr. Ásmundi Guðmundssyni með aðstoð vígslubiskups dr.
Bjarna Jónssonar, sóknarprestsins séra Sigurbjarnar Á. Gísla-
sonar, sem nú mun vera elztur þjónandi prestur á landinu, 79
ára að aldri, og nokkurra fleiri presta.
Elliheimilið Grund er sprottið upp af kærleikshugsjón kristin-
dómsins og hefir ávallt starfað og dafnað í þeim sama anda.
Hafa feðgar tveir átt mestan þátt í viðgangi þess, sr. Sigurbjörn
Á. Gíslason og núverandi forstjóri þess, Gísli Sigurbjörnsson,
þó að margir fleiri hafi þar lagt í mikið starf og óeigingjarnt.
Meðan svo er fram haldið, er þessari fögru stofnun óhætt.
M. J.
Aths. Mynd af þessari vígsluathöfn kom í síðasta hefti, en vegna
misminnis var þar sagt, að grein þessi væri komin.