Bændablaðið - 04.07.2013, Síða 26

26 Bændablaðið | Fimmtudagur 4. júlí 2013
Frá Íslandsmeistarakeppninni í skógarhöggi. Mynd / Þóra Sól
Fjöldi gesta á vel heppnuðum Skógardegi
Skógardagurinn mikli, árleg
skógarhátíð Félags skógarbænda
á Austurlandi, Barra, Héraðs- og
Austurlandsskóga, Skógræktar-
félags Austurlands og Skógræktar
ríkisins, var haldinn hátíðlegur
í blíðskaparveðri í níunda sinn í
Mörkinni í Hallormsstaðaskógi.
Dagurinn hófst á hinu árlega Skógarhlaupi,
þar sem hlaupin er 14 km leið um skóginn.
Sigurvegari í karlaflokki var Jón Jónsson á
tímanum 1 klst. og 6 mínútum. Í öðru sæti
var Bogi Ragnarsson og í því þriðja varð
Hafliði Sævarsson. Í kvennaflokki sigraði
Brynja Baldursdóttir á tímanum 1 klst. og
19 mínútum. Í öðru sæti varð Linda María
Karlsdóttir og í þriðja sæti varð Brynhildur
Sigurðardóttir.
Eftir hádegi hófst hin formlega skemmti -
dagskrá. Meðal atriða má nefna töfra -
manninn Ingó, karlakórinn Drífandi
og atriði úr Kardemommubænum.
Einnig fór fram Íslandsmeistarakeppnin
í skógarhöggi, þar sem Ingvar Örn
Arnarson frá Skógrækt ríkisins á
Suðurlandi bar sigur úr býtum. Í öðru
sæti varð Bjarki Sigurðsson frá Skógrækt
ríkisins á Hallormsstað og Jón Björgvin
Vernharðsson, sem keppti fyrir hönd
skógarbænda, varð þriðji.
Boðið var upp á heilgrillað naut, pylsur,
ketilkaffi, lummur og fleira góðgæti.
Áætlað er að tæplega tvö þúsund gestir
hafi heimsótt Hallormsstaðaskóg á
Skógardaginn mikla. /MÞÞ
Heilgrillaða nautið bitað niður. Myndir / Esther Ösp Gunnarsdóttir