Kjarninn - 26.12.2013, Page 82

01/01 kjarninn SJÖ SPURNiNGaR
K
olbrún Halldórsdóttir átti sæti á Alþingi fyrir
hönd Vinstrihreyfingarinnar – græns framboðs
á árunum 1999–2009. Hún gegndi stöðu um-
hverfisráðherra og ráðherra norrænna sam-
starfsmála á árinu 2009. Hún er leikstjóri að
mennt og var kjörin forseti Bandalags íslenskra listamanna á
aðalfundi bandalagsins í janúar 2010.
Hvað er það jákvæðasta sem gerðist á Íslandi árið 2013?
Það kann að vera óskhyggja en mig langar að segja aukin meðvitund um
þýðingu lista og menningar fyrir mannlífið og aukinn skilningur á alvarlegum
afleiðingum hlýnunar lofthjúpsins fyrir framtíð móður Jarðar. En kannski er
öruggast að segja bara að jákvæðast hafi verið að yfir 4.000 börn skuli hafa
bæst í hópinn hér á ísaköldu landi.
Hvað var það neikvæðasta sem gerðist á Íslandi árið 2013?
Það fyrsta sem kemur upp í hugann er vanhugsuð aðför stjórnenda Ríkis-
útvarpsins að dagskrá útvarpsins og skilningsleysi þeirra á þýðingu Ríkis-
útvarpsins sem máttarstólpa menningar í fámennu landi sem tekur alvarlega
það hlutverk að halda lifandi tungumálinu okkar, íslenskunni. Næst vil ég
nefna niðurskurð stjórnvalda á verkefnatengdum sjóðum á vettvangi listgreina
og hönnunar. Þar ræður för dapurleg skammsýni. Þá er komið að tveimur
atvikum á syndaregistri umhverfisráðherra; að hann skuli synja þjóðinni um
ásættanlegar úrbætur í málefnum náttúruverndar með því að koma í veg fyrir
að mikilvæg heildarlöggjöf um náttúruvernd taki gildi og að hann skuli komast
upp með það að endurskoða rammaáætlun um virkjanakosti með skammsýn
sjónarmið stórnotenda raforku að leiðarljósi. Loks hlýt ég að nefna þau mistök
ríkisstjórnarinnar að hverfa frá áformum um að sækja hærra auðlindagjald til
þeirra sem hagnast af sókn í sameiginlegar auðlindir þjóðarinnar.
Hvaða hlutum er brýnast að breyta til að styrkja stöðu
þjóðarinnar og gera samfélagið betra?
að fara leiðir í uppbyggingu menntunar og rannsókna sem fela í sér tæki-
færi til atvinnusköpunar sem hæfir menntunarstigi þjóðarinnar – og undir
„rannsóknir“ leyfi ég mér að fella „listsköpun“, því okkar unga listafólk hefur
menntast á listaháskólum og fyrir þeim gegnir listsköpun sama hlutverki og
rannsóknir í starfi ungra vísinda- og fræðimanna. atvinnutækifæri af þessu
tagi byggja á hugviti og þekkingu, listum og menningu, hugmyndafræði
sjálfbærrar þróunar og virðingu fyrir lífríkinu. Haldbæra atvinnustefnu þarf
að byggja upp í þéttri samvinnu ríkis og sveitarfélaga, með þau sveitarfélög í
forystu sem þegar hafa náð athyglisverðum árangri í þessum efnum.
Hvernig metur þú stöðu landsins í lok árs, og hvort telur þú að
staða Íslands muni hafa versnað eða batnað í lok árs 2014?
Mér þykir líklegt að efnahagur landsins verði erfiðari eftir því sem lengra líður
á næsta ár. Ríkisstjórnin hefur í engu svarað rökstuddum áhyggjum stofnana
á vettvangi efnahagsmála og ýmissa efnahagssérfræðinga sem telja aðgerðir
ríkisstjórnarinnar í efnahagsmálum illa ígrundaðar og byggja á hugmyndum
sem menn veiddu upp úr hatti í kosningabaráttunni síðastliðið vor. En ef
ráðamenn losa sig undan óttanum sem þeir eru augljóslega haldnir gagnvart
opnum og málefnanlegum samskiptum við almenning og stofnanir samfélags-
ins gætu jákvæðar breytingar orðið nokkuð hraðar.
Hvernig stendur ríkisstjórnin sig að þínu mati, hvað hefur hún
gert vel og hvað ekki?
Hún stendur sig illa, samanber svar við spurningu tvö. Forystumönnum
hennar hættir til að tala af hroka og yfirlæti til þjóðarinnar, auk þess sem þeir
nota nánast hvert tækifæri sem gefst til að sýna verkum fyrri ríkisstjórnar
fyrirlitningu. Það er ekki víst að þeir átti sig á því að kjósendur þeirra flokka
sem nú eru í stjórnarandstöðu hljóta að taka hluta þeirrar fyrirlitningar til sín.
Menn skyldu hafa í huga að dramb er falli næst.
Hvar sérð þú helstu tækifæri Íslands á næsta ári/árum?
Í uppbyggingu atvinnu- og menntunartækifæra fyrir skapandi og skemmtilegt
fólk á öllum aldri í öllum landshlutum. Slík tækifæri þarf að byggja upp á
grundvelli vísinda og tækni, lista og menningar, náttúruverndar og skynsam-
legrar auðlindanýtingar.
Er framtíðin björt fyrir land og þjóð?
Það getur sannarlega brugðið til beggja vona en ef við náum að segja skilið við
landlæga meðvirkni og áttum okkur á því að vald okkar til að breyta öðrum er
takmarkað kunna að vera jákvæðar breytingar í vændum.
Deildu með
umheiminum
sjö spurninGar
Kolbrún
Halldórs dóttir
leikstjóri og forseti Banda-
lags íslenskra listamanna
dapurleg
skammsýni
ræður för