Dagblaðið Vísir - DV - 31.08.2007, Qupperneq 8

föstudagur 31. ágúst 20078 Fréttir DV
Meirihlutinn í borgarstjórn vill breyta Orkuveitunni í hlutafélag. Fjallað var um tillögu í þessa veru á stjórn-
arfundi Orkuveitunnar en afgreiðslu frestað fram yfir helgi. Vilhjálmur Þ. Vilhjálmsson borgarstjóri segir
að með breytingunni sé verið að hagræða. Dagur B. Eggertsson, stjórnarmaður og borgarfulltrúi, er
undrandi á því að málið sé komið fram og óttast breytingarnar.
UGGANDI FULLTRÚAR
„Við fórum vel yfir þessa tillögu
en afgreiðslu málsins var frestað til
mánudagsins,“ segir Vilhjálmur Þ.
Vilhjálmsson borgarstjóri. Stjórn
Orkuveitunnar fjallaði í gær um til-
lögu um að beina þeim tilmælum
til eigenda fyrirtækisins að breyta
rekstrarfyrirkomulaginu úr sameign-
arfélagi í hlutafélag. Afgreiðslu tillög-
unnar var þó frestað, ekki síst vegna
mótmæla stjórnarmanna úr röðum
minnihlutans í borgarstjórn Reykja-
víkur sem voru á Ísafirði og gátu því
ekki setið fundinn.
Vilhjálmur segir að R-listinn hafi
verið kominn á fremsta hlunn með
að breyta Orkuveitunni í hlutafélag á
sínum tíma. Vinstri-grænir hafi hins
vegar stoppað það af.
„Það er alltaf þessi sífellda hræðsla
við einkavæðingu. Það liggur hins
vegar fyrir af minni hálfu og meiri-
hlutans að það verða engar tillögur
fluttar um að einkavæða fyrirtækið á
þessu kjörtímabili. Við höfum skýra
stefnu um að gera það ekki.“
Áfram á sömu leið
Vilhjálmur segir að með breyting-
unni á rekstrarfyrirkomulaginu fylgi
margs konar hagræðing. „Við búum
til dæmis í öðru skattaumhverfi held-
ur en hlutafélögin. ESA hefur einnig
verið með málið til meðferðar og tel-
ur núverandi rekstrarform ekki vera
löglegt.“
„Við munum halda áfram upp-
byggingu á Hellisheiði og halda
áfram að bjóða notendum vatn og
rafmagn á sem hagstæðustu verði,“
segir Vilhjálmur. „Við munum líka
halda áfram þátttöku okkar í út-
rásinni svokölluðu og áherslur okkar
hvað varðar starfshætti munu ekkert
breytast.“
Dagur ósáttur
„Það er mjög sérstakt að þessi
tillaga hafi verið lögð fyrir án nokk-
urrar umræðu,“ segir Dagur B. Egg-
ertsson, stjórnarmaður í Orkuveitu
Reykjavíkur og borgarfulltrúi fyrir
Samfylkinguna.
Dagur mótmælti vinnubrögðum
stjórnarmanna harðlega þar sem til-
lagan um hlutafélagavæðingu fyrir-
tækisins var lögð fyrir.
Dagur var á stjórnarfundi Sam-
bands íslenskra sveitarfélaga á Ísafirði
ásamt kollega sínum Svandísi Svavars-
dóttur sem einnig á sæti í stjórn Orku-
veitunnar fyrir Vinstri-græna. Hvorugt
þeirra fékk send fundargögn vegna
fundarins og er Dagur afar ósáttur við
að þannig hafi verið staðið að málum.
Vafasöm vinnubrögð
„Ég er bæði kurteis og hef ver-
ið þekktur fyrir þolinmæði en ég
hef sjaldan kynnst öðru eins,“ seg-
ir Dagur. Hann segist ekki gera sér
grein fyrir því hvaða leiðangur sé
þarna í gangi. „Það er ekki eins og
það sé eitthvað hús að brenna. Þetta
er blómstrandi fyrirtæki sem hefur
starfað sem sameignarfélag í nokk-
ur ár með áberandi góðum árangri.
Hvers vegna er þá verið að gera þetta
á einhverjum handahlaupum án
nokkurrar umræðu? Er það vegna
þess að það á að skella á notendur
þjónustunnar einkavæðingu á ein-
okunarrekstri?“
Dagur segist ekki hafa fengið
neina haldbæra skýringu á að málið
var tekið fyrir í gær. „Þetta er auðvit-
að fáheyrt þegar um svona stórt mál
er að ræða. Við erum búin að óska
eftir því að málið verði tekið fyrir á
fundi borgarstjórnar á þriðjudaginn.
Mér finnst ekkert skrítið að fólk verði
tortryggið því þarna leynist einhver
fiskur undir steini.“ Fundinum lauk
með því að afgreiðslu var frestað og
því fá Dagur og Svandís tækifæri til
að lýsa sinni skoðun á henni.
Forstjóri Orkuveitunnar og stjórn-
arformaður vildu engu svara heldur
vísuðu í fréttatilkynningu þar sem
sagði að sóknarfæri lægju í hlutafé-
lagavæðingu.
Einar Þór SigurðSSon
blaðamaður skrifar einar@dv.is
„Er það vegna þess að
það á að skella á not-
endur þjónustunnar
einkavæðingu á
einokunarrekstri?“
orkuveita reykjavíkur dagur B. Eggertsson segist sjaldan hafa kynnst öðru eins.
Hann furðar sig á vinnubrögðum stjórnar Orkuveitunnar þar sem tillagan um
hlutafélagavæðingu hennar hefur fengið litla umræðu.