Dagblaðið Vísir - DV - 19.01.2009, Blaðsíða 2

mánudagur 19. janúar 20092 Fréttir
Frumkvæði að framboði Sigmundar
Davíðs Gunnlaugssonar til formanns
Framsóknarflokksins kom frá fjórum
framsóknarmönnum á Austurlandi,
þeim Einari Birgi Kristjánssyni og Sig-
urði Freyssyni frá Eskifirði og Gunnari
Sigbjörnssyni og Jónasi Guðmunds-
syni frá Fljótsdalshéraði. Þeir lýsa því
svo að þegar Valgerður Sverrisdótt-
ir, fráfarandi formaður, hafði ákveðið
að gefa ekki kost á sér í formannssæt-
ið auk þess sem Guðni Ágústsson var
nýstiginn upp úr stólnum, væri tími
róttækrar endurnýjunar upp runn-
inn. „Við höfðum hlustað á málflutn-
ing Sigmundar og leist vel á hann. Við
vorum svo galnir að við ákváðum að
hafa samband við hann og úr varð
að við keyptum flugfar undir hann til
Egilsstaða,“ segir Einar Birgir. „Þeg-
ar þangað var komið voru það ekki
við fjórmenningarnir sem hann hitti
heldur um 40 manns, sem byrjuðu að
leggja á ráðin um framboð. Eftir fund-
inn fórum við með hann til Neskaup-
staðar. Hann tók ekkert mark á okkur
í fyrstu, hélt að okkur væri ekki alvara
og hló bara að okkur. Hann þekkti
engan þarna og ég held að honum
hafi ekki litist neitt á þetta. Þegar við
skiluðum honum aftur í flugvélina á
Egilsstöðum sagði hann eitthvað á þá
leið að hann yrði líklega að taka mark
á okkur,“ segir Sigurður. „Þetta var
ótrúlega gaman. Undarlegt að þetta
skuli vera hægt, en það eru reyndar
óvenjulegar aðstæður í þjóðfélaginu,“
segir Gunnar.
Var bara í jólaundirbúningi
Lýsing Sigmundar kemur heim og
saman við lýsingar fjórmenning-
anna á Austurlandi. „Það hringdu í
mig menn að austan. Ég var bara í
jólaundirbúningi. Þeir vildu kanna
við mig hvort ég væri til í formanns-
framboð. Gáfu meðal annars upp þá
skýringu að þeir kynnu vel við minn
málflutning og sýndu þekkingu á því
sem ég hefði fram að færa um mikil-
væg viðfangsefni samtímans. Ég hafði
haldið fyrirlestra um stöðuna í efna-
hagsmálunum. Ég var reyndar sam-
mála mati þeirra á stöðunni og því
mati þeirra að þetta færi vel við gildi
Framsóknarflokksins. Ég hélt að ég
væri að fara að ræða við þessa fjóra
karla um þessa skrítnu hugmynd en
hitti fjölda fólks Ég tók dræmt í fram-
boðshugmyndina og taldi hana ekki
raunhæfa í fyrstu. Þegar ég kom að
austan fóru að berast áskoranir víðar
að. Síðan þetta gerðist virtust öll vötn
hníga til Dýrafjarðar.“
Skuldar engum neitt
Gunnlaugur Sigmundsson, faðir Sig-
mundar, er fyrrverandi þingmaður
Framsóknarflokksins en sneri sér að
viðskiptum. Vitanlega bar Sigmund-
ur málið undir reynsluboltann föð-
ur sinn. Gunnlaugur mun hafa ráð-
ið Sigmundi frá framboðinu og þótt
það óraunhæft. Betra væri að stofna
nýtt stjórnmálaafl. Eftir að áskoran-
ir fóru að berast úr ýmsum áttum fór
Sigmundur að hugsa málið. Hann
bar málið aftur undir föður sinn með
þeim orðum að Gunnlaugur hefði
alltaf sagt að betra væri að endur-
reisa illa stödd fyrirtæki með skipulag
og tengsl við markaðinn frekar en að
stofna ný. Við þessu átti Gunnlaugur
ekkert svar. Sigmundur segir sjálfur að
það hafi verið fífldirfska að fara af stað
með svo skömmum fyrirvara og með
svo lítil tengsl við flokkinn og fólkið.
„En ég skynjaði að fólk væri til í að fara
þessa róttæku leið,“ segir hann.
Hið ótrúlega gerðist: Ungur maður
án tengsla við flokksvélina og flokks-
starfið kom, sá og sigraði.
Skyldi vera um að ræða upp-
gjör við gamla tíma, einhvers konar
flokkseigendafélag? „Þessum úrslit-
um er ætlað að eyða öllum vafa í huga
fólks, hvort sem það telur að Fram-
sóknarflokknum hafi verið stjórnað
af einhverju flokkseigendafélagi eða
ekki, að nýr formaður hefur ekki haf-
ist til metorða í stjórnmálum síðustu
ára og skuldar engum neinn greiða.
Viljinn er til þess að sýna nýja byrjun,“
segir Sigmundur.
Fólk mun sópast að flokknum
Þegar kjör Sigmundar var orðið ljóst
bar hann lof á keppinauta sína, þá
Höskuld Þórhallsson, sem fyrir mis-
tök kjörstjórnar var í fyrstu sagður
hafa borið sigur úr býtum, og sömu-
leiðis Pál Magnússon sem féll úr leik
í fyrri umferð. Sigmundur bað þá að
koma upp á svið til sín til að innsigla
samstöðuna og uppskar mikið lófa-
tak. Hann kvaðst vona að aðrir fram-
bjóðendur yrðu áfram í forystuhópi
Framsóknarflokksins. „Þetta snýst um
nýtt upphaf og viljann til að taka þátt
í slíku upphafi. Ég veit að þetta var
stórt stökk fyrir marga... Þjóðin mun
í framhaldi af þessu treysta Fram-
sóknarflokknum... Gildi Framsókn-
arflokksins eru þau gildi sem vant-
að hefur í þjóðlífið að undanförnu...
Hann er búinn að sanna það að hið
eina sem skipta mun máli hjá Fram-
sóknarflokknum núna er að vinna að
gildum og markmiðum flokksins...
Ég er viss um að fólk mun sópast að
flokknum,“ sagði Sigmundur og hvatti
fundargesti til þess að fá fólk til liðs
við flokkinn um allt land.
Ætlar að efla tengslin
við flokkinn
Sigmundur sagði að Framsóknar-
fokkurinn væri til þess fallinn að taka
erfiðar ákvarðanir og kvaðst þeg-
ar í dag ætla að ráðfæra sig við hæfa
menn um lausnir á vanda þjóðarinn-
ar í kjölfar bankahrunsins. Brýnt væri
að leysa vanda þjóðarinnar og Fram-
sóknarflokkurinnn ætti að leggja því
lið á næstunni. „Með því að leita ráða
út fyrir flokkinn munum við ávinna
okkur traust... Framsóknarflokkur-
inn er til þess fallinn að fylkja sér um
skynsamlegustu leiðirnar og fylgja
þeim eftir.“ Sigmundur kvaðst ætla að
heimsækja á næstunni hvert einasta
Framsóknarfélag á landinu og vinna
að því að stilla saman strengi. „Nýja
Ísland byrjar í Framsóknarflokknum
og við munum leiða þá vegferð,“ sagði
Sigmundur er hann þakkaði stuðn-
inginn.
Til í kosningar en
svigrúm væri ágætt
Í samtali við blaðamann DV sagði Sig-
mundur að hann ætlaði að leita til
sérfræðinga til að finna bestu lausn-
irnar á neyðarástandinu sem blasi við
heimilum og fyrirtækjum í landinu
eftir bankahrunið. „Við höfum skýrar
tillögur um þetta. Við ætlum að bjóða
stjórnarflokkunum, öðrum þeirra eða
báðum, samstarf með því að veita til-
teknum tillögum stuðning. Við erum
ekki að biðja um að komast í ríkis-
stjórn. Þetta verða erfiðar ákvarðanir.
Við ætlum að sýna þá ábyrgð að styðja
ríkisstjórnina í að koma ákveðnum til-
lögum í gegn.“
Sigmundur kveðst vilja hraða þing-
kosningum. „Ástæðan fyrir því að við
förum þessa leið er að við getum ekki
beðið með að leysa bráðavandann.
Það mundi henta okkur ágætlega
að hafa smávegis svigrúm til þess að
stilla saman strengi og byggja upp
flokksstarfið áður en kemur að kosn-
ingum. En við erum tilbúin í kosning-
ar strax ef svo ber undir.“
Sigurganga Sigmundar Davíðs Gunn-
laugssonar til æðstu metorða í Framsókn-
arflokknum er stutt en ævintýraleg. Lang-
þreyttur flokkur á innri átökum og stjórnmál
á heljarþröm í kjölfar bankahruns hrundu
af stað atburðarás sem endaði með rót-
tækri endurnýjun forystunnar og óvæntri
samstöðu um aðildarumsókn að Evrópu-
sambandinu. DV segir söguna um hugmynd
sem fæddist austur á landi sem endaði með
sigri Sigmundar í formannskjöri.
Kom, sá og sigraði
Jóhann haukSSon
blaðamaður skrifar: johannh@dv.is
Sigmundur Davíð
Var lokkaður til framboðs af
fjórmenningum fyrir austan
með skömmum fyrirvara og
stóð uppi sem sigurvegari.
Tveir þeirra fagna við hlið
hans á myndinni.
mynD BraGi Þór JóSeFSSon
Fagna sigrinum
Sigmundur gunnlaugsson og
gunnar Sigbjörnsson. gunnar, einn
af arkitektunum að sigri Sigmundar,
fagnar með nýjum foringja.
mynD BraGi Þór JóSeFSSon
arkitektarnir
arkitektarnir að sigrinum: Einar
Birgir Kristjánsson (til vinstri), Sigurður
Freysson og gunnar Sigbjörnsson (til
hægri) keyptu flugfar undir Sigmund
til Egilsstaða. Þeir höfðu ástæðu til
að fagna þegar úrslit voru endanlega
kunn. á myndina vantar jónas
guðmundsson frá Fljótsdalshéraði.
mynD BraGi Þór JóSeFSSon