Dagblaðið Vísir - DV - 02.02.2011, Síða 17

Erlent | 17Miðvikudagur 2. febrúar 2011
Eldgosið á Kyushu-eyju færðist í aukana:
Eldingaský yfir Japan
Þann 19. janúar hófst eldgos í Shin-
moedake-fjalli á Kyushu-eyju í suð-
urhluta Japan. Undir lok síðustu
viku fór eldgosið að færast í aukana
og náðist þá þessi magnaða ljós-
mynd sem birtist síðustu helgi í stað-
arblaðinu Minami Nippon Shimbun
sem er gefið út Kago shima-héraði í
Japan. Í þessu magnaða sjónarspili
má sjá hvernig himinn og jörð kall-
ast á með spúandi eldi og eldinga-
skýi. Mikill kraftur var í eldgosinu
og tók Shinmoedake-fjall að spúa
grjóti og ösku án afláts. Allir íbúar
í nágrenni fjallsins þurftu að yfir-
gefa heimili sín og ekki er útséð um
hvenær þeir geta snúið aftur til síns
heima. Shinmoedake er hluti af Kir-
ishima-fjallgarðinum en þar er mik-
il eldvirkni og gætu fleiri fjöll í ná-
grenninu gosið þá og þegar.
björn@dv.is
Dóttir Berlusconis
mögulegur arftaki
Silvio Berlusconi, forsætisráðherra
Ítalíu, er nú farinn að undirbúa
jarðveginn fyrir mögulegan starfs-
feril dóttur sinnar í stjórnmálum.
Ítalskir fjölmiðlar greindu frá þessu
um helgina. Um er að ræða elstu
dóttur glaumgosans frá Sardiníu,
Marinu Berlusconi. Hún stjórnar nú
þegar eignarhaldsfélagi föður síns,
Fininvest, auk þess sem hún er for-
seti fjölmiðlaveldis fjölskyldunnar,
Mondadori, sem rekur sjónvarps-
og útvarpsstöðvar og gefur út dag-
blöð og tímarit.
Eins og kunnugt er sætir Silvio
nú rannsókn vegna vændiskaupa.
Saksóknaraembættið í Mílanó rann-
sakar tíðar svallveislur Berlusconis
í villu hans í úthverfi borgarinnar,
en hann er talinn hafa greitt 17 ára
vændiskonu, sem hefur verið kölluð
„Ruby hjartaþjófur“, fyrir kynlíf. Síð-
ar reyndi hann að hylma yfir glæp-
inn og er sakaður um að hafa beitt
mútum og þvingunum til að fá Ruby
og lögreglumennina sem handtóku
hana á sínum tíma til að breyta upp-
runalegum vitnisburði sínum.
Nýtur stuðnings flokksins
Meðlimir Frelsisflokks Berlusconis
hafa tekið vel í hugmyndina um að
Marina bjóði sig fram í næstu kosn-
ingum. Þær eiga hins vegar ekki að
fara fram fyrr en árið 2013 en talið
er næsta víst að þær verði haldnar
fyrr, jafnvel innan nokkurra mán-
aða. Ríkisstjórn Berlusconis hang-
ir á bláþræði þrátt fyrir að hann
hafi staðið af sér vantrauststillögu í
desember. Munaði þá aðeins þrem-
ur atkvæðum að Berlusconi þyrfti
að taka poka sinn.
Michaela Biancofore, þingmað-
ur Frelsisflokksins, sagði í viðtali
við breska blaðið Daily Telegraph
að Marina Berlusconi myndi verða
frábær starfskraftur. „Hún er tákn-
mynd þjóðarinnar og þekkt um all-
an heim fyrir hæfileika sína sem
stjórnandi. Ef hún ákvæði að taka
þátt í stjórnmálum yrði hún skín-
andi fyrirmynd allra kvenna innan
Frelsisflokksins.“
Berbrjósta stjarna
Hvað sem hæfileikum Marinu
Berlusconi líður er ljóst að hún
er stórstjarna á Ítalíu. Hún kemur
reglulega fram í slúðurblöðunum og
ljósmyndarar elta hana á röndum.
Hún virðist þó ekki hafa mikið á móti
því og baðar sig í sviðsljósinu við
hvert tækifæri. Síðasta sumar birtust
myndir af henni berbrjósta þar sem
hún naut sólarinnar á einkaströnd
fjölskyldunnar, en myndirnar voru
einmitt birtar í tímariti sem er gefið
út af Mondadori. Þykir það benda
til þess að Marina hafi ekkert haft á
móti birtingu myndanna.
Reynsluleysi gæti hjálpað
Stjórnmálaskýrendur á Ítalíu telja
ólíklegt að reynsluleysi verði Mar-
inu til trafala. Í raun hafi faðir henn-
ar notað reynsluleysi sitt í stjórnmál-
um sem sitt helsta vopn þegar hann
ákvað að hella sér út í stjórnmál. Ítöl-
um er mikið í nöp við atvinnustjórn-
málamenn, sem þeir telja spillta og
stunda fyrirgreiðslustjórnmál. Því
líkar þeim oftar en ekki betur við
frambjóðendur sem hafa litla sem
enga reynslu af stjórnmálum.
Marina Berlusconi er þó sann-
arlega ekki blaut á bak við eyrun.
Á síðasta lista bandaríska tímarits-
ins Forbes yfir 100 valdamestu kon-
ur í heiminum var Marina í 48. sæti.
Var hún ofar á lista en til dæmis Julia
Gillard, forsætisráðherra Ástralíu,
og Tarja Halonen, forseti Finnlands.
Til gamans má geta þess að Jóhanna
Sigurðardóttir, forsætisráðherra Ís-
lands, var í 80. sæti á þeim lista.
n Silvio Berlusconi, forsætisráðherra Ítalíu, undirbýr nú frama dóttur sinnar í
stjórnmálum n Marina Berlusconi stýrir nú þegar fjölmiðlaveldi Berlusconis
og eignarhaldsfélagi n Hún er stjarna á Ítalíu sem hefur víðtæk tengsl
Björn Teitsson
blaðamaður skrifar bjorn@dv.is
„Ef hún ákvæði að
taka þátt í stjórn-
málum yrði hún skínandi
fyrirmynd allra kvenna
innan Frelsisflokksins.
Glaumgosinn frá Sardiníu
Bendir ef til vill á dóttur sína.
Marina Berlusconi
Frumburðurinn sem stjórn-
ar nú þegar viðskipta- og
fjölmiðlaveldi Berlusconis.
Eldingaský yfir Shin-
moedake-fjalli Himinn
og jörð kallast þarna á með
ómældum krafti.
Hvirfilbylur í
aðsigi í Ástralíu
Íbúar í Queensland-fylki í Ástr alíu
búa sig nú undir versta hvirfil-
byl í sögu fylkisins. Búist er við að
hvirfilbylurinn, sem hefur fengið
nafnið Yasi, lendi af fullum þunga á
Queens land í dag, miðvikudag, eða
seint um kvöld að áströlskum tíma.
Íbúar Queensland hafa þurft að þola
hreint ótrúlegar raunir á síðustu
vikum. Ekki er langt síðan gífurleg
flóð skildu eftir sig slóð eyðilegging-
ar á svæðinu og 35 látna. Þá þurftu
30 þúsund manns að yfirgefa heimili
sín. Anna Bligh, forsætisráðherra í
Queensland, hefur varað íbúa við
hvirfilbylnum. Búist er við að lendi á
borginni Cairns, en þar búa um 120
þúsund manns. Nú þegar hafa tugir
þúsunda flúið heimili sín og búist er
við að sú tala hækki ört í dag.
Abdullah rekur
ríkisstjórnina
Abdullah, konungur af Jórdaníu,
hefur ákveðið að reka alla ráðherra í
ríkisstjórn Jórdaníu. Er Abdullah þar
með að bregðast við óskum þúsunda
mótmælenda sem hafa fylkt liði á
götum úti og krafist breytinga. Mót-
mælin í Jórdaníu má rekja til þeirra
sem hófust í Túnis í byrjun janúar
og hafa farið eins og eldur í sinu um
gjörvallan heim Araba. Abdullah
vill freista þess að koma á umbótum
áður en mótmælin fara úr böndun-
um, en hann vill síst lenda í sömu
stöðu og Zine al-Abidine Ben Ali,
sem hrökklaðist frá völdum í Túnis,
eða Hosni Mubarak, sem stendur nú
höllum fæti í Egyptalandi.
Chirac segist ekki
vera með Alzheimer
Jacques Chirac, fyrrverandi forseti
Frakklands, þvertók fyrir það í vik-
unni að hann þjáðist af Alzheimer-
sjúkdómnum. Það var franska blað-
ið Journal du Dimanche sem birti
fréttir af því á sunnudaginn að Chir-
ac hefði þjáðst af minnisleysi upp
á síðkastið og að eiginkona hans,
Bernadette Chirac, óttaðist að hann
gæti verið með Alzheimer. Chirac
sagði hins vegar við blaðamenn á
mánudag að svo væri ekki. „Lít ég
út fyrir að vera ekki hraustur? Ég get
sagt þér það að ég er við hestaheilsu.
Ég vona bara að þið séuð við jafn-
góða heilsu og ég,“ sagði forsetinn
fyrrverandi.