Dagblaðið Vísir - DV - 07.02.2011, Blaðsíða 16

16 | Erlent 7. febrúar 2011 Mánudagur
Greindarskertum Breta hefur verið bannað að stunda kynlíf:
Bannað að stunda kynlíf
Breskir dómstólar hafa bannað 41
árs manni að stunda kynlíf vegna
greindarskorts, en greindarvísitala
mannsins er langt undir meðaltali
– eða 48. Maðurinn, sem er aðeins
nefndur Alan í dómsúrskurðinum,
hefur verið í sambandi með öðrum
manni um talsvert skeið og sagðist
vonast til að það samband „héldi
áfram“ því það gerði hann „glaðan.“
Ástæðan fyrir kynlífsbanninu ku
vera sú að Alan veit ekki hvað hann
er að gera. Kynhvöt hans er óeðlilega
sterk og telja dómstólar það óviðeig-
andi að hann stundi reglulega kynlíf
án þess að gera sér grein fyrir þeim
hættum sem því fylgja.
Dómarinn sem úrskurðaði í mál-
inu lagði einnig til að félagsmálayf-
irvöld fylgdust grannt með Alan, en
hann hefur verið á framfæri þeirra
síðan hann fluttist frá foreldrum
sínum. Þegar dómarinn kvað upp
dóminn sagði hann: „Ég gef því út
þá yfirlýsingu að eins og staðan er
núna hafi Alan ekki andlegt atgervi
til að veita samþykki til ástundunar
kynlífs með öðrum aðila.“
Málið er mjög umdeilt í Bretlandi
en þetta er eitt af mörgum málum
sem hafa verið tekin til umfjöllunar
í skjóli laga frá árinu 2005 sem veita
stjórnvöldum umboð til að hafast að
í málum einstaklinga sem ekki eru
taldir hafa burði til að taka ákvarð-
anir sjálfir. Geta stjórnvöld meðal
annars skipað konum í fóstureyð-
ingu, skipað fólki í ófrjósemisaðgerð
eða ákveðið hvenær eigi að stefna á
lífslokameðferð.
Sjálfur segir Alan að hann viti að
kynlíf geti leitt til þess að blettir, eða
mislingar, myndist á líkamanum.
bjorn@dv.is
Dómur kveðinn upp Dómari úrskurðaði Alan vanhæfan til að stunda kynlíf vegna
greindarskorts.
Mótmælabálið
á undanhaldi
Bræðralag múslima, sem eru
stærstu samtök stjórnarandstæð-
inga í Egyptalandi, samþykkti á
sunnudag að ræða við ríkisstjórn
Hosni Mubaraks um hvernig megi
koma á stjórnarskiptum með frið-
samlegum hætti. Omar Suleiman,
varaforseti Egyptalands, bauð öllum
stjórnarandstöðuflokkum að ræða
við stjórnvöld, en stjórnmálaskýr-
endur telja að hann sé þar með að
búa til brotalamir í samstarf stjórn-
arandstæðinga.
Nú hafa mótmæli staðið yfir í
tvær vikur samfleytt og hafa millj-
ónir Egypta fylkt liði á götum úti í
helstu borgum Egyptalands. Þrátt
fyrir það situr Hosni Mubarak, sem
hefur verið forseti síðan 1981, enn-
þá sem fastast í embætti sínu.
Á sunnudag, sem er virkur dag-
ur meðal múslima, voru bankar í
Egyptalandi opnaðir í fyrsta sinn í
heila viku. Þykir það benda til þess
að mótmælabálið sé á undanhaldi
og að fólk vilji nú láta sér nægja að
skipt verði um forseta þegar kosn-
ingar fara fram næsta haust. Þessu
eru þó ekki allir sammála.
Hætta á borgarastríði
Mohamed ElBaradei, friðarverð-
launahafi Nóbels sem hefur lýst yfir
áhuga sínum á foretaembættinu,
var spurður í viðtali við þýska frétta-
tímaritið Der Spiegel hvort hann ótt-
aðist borgarastyrjöld í Egyptalandi.
„Það er hætta á því. Við höfum und-
anfarna daga séð gífurlegt ofbeldi af
hálfu útsendara ríkisstjórnarinnar,
sem eru dulbúnir meðlimir leyni-
þjónustunnar og lögreglunnar.“ Í
síðustu viku færðist ofbeldi í aukana
í mótmælunum í Egyptalandi. Hafa
nú rúmlega 300 manns fallið í átök-
unum en á tímabili leit út fyrir að
ofbeldi stjórnarsinna í Egyptalandi
væri í rénun. Sú þróun snerist alger-
lega við á miðvikudag í síðustu viku
þegar stjórnarsinnar réðust inn á Ta-
hrir-torg í miðborg Kaíró, vopnaðir
svipum og kylfum.
Þykir nú ljóst að skipun Mubar-
aks á Omari Suleiman í embætti
varaforseta hafi verið til þess gerð
að brjóta mótmælin á bak aftur. Su-
leiman var áður yfirmaður egypsku
leyniþjónustunar og ætti að kunna
sitthvað fyrir sér þegar kemur að því
að þagga niður í stjórnarandstæð-
ingum.
Óvíst hvort ályktun verði
útgefin
Á föstudag var boðaður fundur ut-
anríkismálanefndar Alþingis vegna
ástandsins fyrir botni Miðjarðarhafs,
en fundinn sátu einnig Össur Skarp-
héðinsson utanríkisráðherra og Jón
Ormur Halldórsson, stjórnmála-
fræðingur og einn helsti sérfræðing-
ur Íslands um Mið-Austurlönd. DV
hafði samband við formann utan-
ríkismálanefndar, Árna Þór Sigurðs-
son. Hann sagði að fundurinn hefði
fyrst og fremst verið fræðslufundur
þar sem verið væri að fara yfir stöðu
mála. „Í framhaldinu munum við
ráða ráðum okkar, um hvort nauð-
synlegt þyki að senda ályktun frá Al-
þingi,“ sagði Árni á sunnudag. Að-
spurður hvernig utanríkismálanefnd
líti á málefni Egyptalands um þessar
mundir sagði Árni að allir í nefnd-
inni væru í stórum atriðum sam-
mála. „Við fordæmum auðvitað allt
ofbeldi, eins og það sem hefur verið
unnið af hendi útsendara Mubaraks.
Við vonumst til þess að lýðræðisum-
bætur hefjist sem fyrst og vonum að
vilja fólksins verði komið fram með
friðsamlegum hætti. Ég held að það
séu allir sammála um það.“
n Omar Suleiman, varaforseti Egyptalands, hóf viðræður við Bræðralag múslima á
sunnudag n Mohamed ElBaradei hefur lýst yfir áhyggjum af borgarastyrjöld n Utan-
ríkismálanefnd Alþingis fordæmir allt ofbeldi en óvíst er hvort hún ályktar um málið
Björn Teitsson
blaðamaður skrifar bjorn@dv.is
„Við höfum und-
anfarna daga séð
gífurlegt ofbeldi af hálfu
útsendara ríkisstjórnar-
innar, sem eru dulbúnir
meðlimir leyniþjónust-
unnar og lögreglunnar.
Árni Þór Sigurðsson, formaður utan-
ríkismálanefndar Alþingis Segir alla
sammála um að fordæma ofbeldi en ekki sé
víst hvort nefndin álykti um málið.
Axarmaðurinn
fundinn sekur
Sómalski maðurinn sem reyndi að
myrða Kurt Westergaard með öxi, og
þar af leiðandi kallaður „axarmaður-
inn“ af dönskum fjölmiðlum, hefur
verið fundinn sekur fyrir tilraun til
hryðjuverks af dómstólum í Árós-
um. Westergaard er sem kunnugt er
teiknarinn, sem teiknaði skopmynd
af Múhameð spámanni sem birtist
í Jótlandspóstinum árið 2005. Axar-
maðurinn, sem er 29 ára fjölskyldu-
faðir, braust inn á heimili Westerg-
aards á nýársdag á síðasta ári og
hafði þar í hótunum á meðan hann
sveiflaði öxi. Westergaard tókst að
læsa sig inni á baðherbergi þar sem
hann beið eftir lögreglu, en hún kom
í þann mund sem axarmaðurinn hjó
gat á baðherbergishurðina.
Rumsfeld sér
ekki eftir neinu
Fyrrverandi varnarmálaráðherra
Bandaríkjanna, Donald Rumsfeld,
segist ekki sjá eftir neinu varðandi
þátt hans í stríðsrekstri Banda-
ríkjanna í Írak. Þetta segir hann í
sjálfsævisögu sinni sem mun koma í
bókaverslanir vestanhafs á þriðju-
dag næstkomandi. Rumsfeld segir
að „ástandið væri mun verra en það
er núna,“ ef Bandaríkin hefðu ekki
steypt stjórn Saddams Husseins af
stóli. Hann segir að hinn himinhái
kostnaður, sem og mannfórnir, sem
fylgt hafi stríðsátökunum í Írak hafi
verið þess virði. Ráðist var inn í Írak
til að finna gereyðingarvopn sem
þar áttu að vera. Eins og frægt er
orðið, fundust slík vopn aldrei í Írak.
Styrjuhrogn
aftur á markað
Sælkerar um alla Evrópu geta tekið
gleði sína á ný en Rússar hafa nú
ákveðið að hefja aftur útflutning á
styrjuhrognum, eða kavíar, til Evr-
ópu á nýjan leik. Styrjuhrogn, eða
„svartur kavíar“, þykja eitt mesta
lostæti sem völ er á í heiminum.
Þau hafa hins vegar verið ófáan-
leg í Evrópu síðan árið 2002 vegna
mikillar ofveiði á styrju. Nú hefur
verið ákveðið að heimila útflutning
til Evrópu á nýjan leik, en aðeins
verður gefin heimild til útflutnings á
150 kílóum árlega. Það verður held-
ur ekki fyrir hvern sem er að kaupa
styrjuhrognin, því hvert kíló mun
kosta sem samsvarar 800 þúsund
krónum.