Dagblaðið Vísir - DV - 10.12.2013, Side 30

Vikublað 10.–12. desember 201330 Sport
Eftirsóttir
stórlaxar
n Félagaskiptaglugginn er ótútreiknanlegur n Tíu leikmenn sem gætu skipt um lið í janúar
Sergio Agüero
Aldur: 25 ára
Þjóð: Argentína
Orðaður við: Real Madrid,
Barcelona
n Þessi knái framherji hefur skorað 12 mörk
í 14 deildarleikjum á tímabilinu og 18 mörk
í öllum keppnum. Aðeins Luis Suárez hefur
skorað meira í deildinni. Agüero er algjör lyk-
ilmaður í liði City og það yrði mikil blóðtaka
fyrir liðið ef hann færi frá félaginu í janúar.
Manchester Evening News hefur sagt að
áhugi sé fyrir því að leikmaðurinn fari til
Spánar í skiptum fyrir Isco. Þá hefur Sky
Sports orðað leikmanninn við Barcelona.
Agüero virðist þó sjálfur vilja vera áfram
hjá City.
Edinson Cavani
Aldur: 26 ára
Þjóð: Úrúgvæ
Orðaður við: Arsenal, Barcelona,
Real Madrid
n Cavani hefur verið mjög góður á tímabil-
inu og skorað 10 mörk í 14 leikjum fyrir
stjörnum prýtt lið Paris Saint-Germain, þar
sem hann leikur ásamt Zlatan Ibrahimovic.
Express gerir því skóna að Arsenal ætli
sér að berjast við Spánarrisana tvo um
þjónustu leikmannsins. Cavani ku vera óá-
nægður með að vera númer tvö í goggunar-
röðinni, á eftir Zlatan. Það er ljóst að Cavani
er eftirsóttur leikmaður en það sem gæti
ráðið úrslitum, kjósi hann að færa sig um
set, er sú upphæð sem félögin eru tilbúin að
borga honum í laun.
Radamel Falcao
Aldur: 27 ára
Þjóð: Kolumbía
Orðaður við: Real Madrid,
Manchester United, Chelsea
n Falcao hefur aðeins leikið í búningi
Monaco í nokkra mánuði. Þegar hafa komist
á kreik sögusagnir um að hann vilji komast
annað. Yfirmaður knattspyrnumála hjá
félaginu hefur verið í hálfu starfi við að vísa
á bug orðrómi um að hann sé á förum. Mirror
hefur leitt að því líkur að leikmaðurinn
kunni að vera á leið til Stamford Bridge að
láni í janúar – áður en samið verði við hann
í sumar. Þá hefur Daily Mail greint frá því að
Manchester United og Real Madrid renni
hýru auga til leikmannsins. Félagaskipti
hans í janúar kæmu á óvart.
Marco Reus
Aldur: 24 ára
Þjóð: Þýskaland
Orðaður við: Manchester United
n Dortmund greindi frá því nýlega
að Reus væri eini byrjunarliðsmaðurinn sem
væri með samningsákvæði um að ef annað
félag bjóði tiltekna upphæð í leikmann-
inn, megi hann fara. Verðið er þó um 30
milljónir punda, að sögn. Miðjumaðurinn er
þess vegna sagður á óskalista nokkurra af
stærstu liðunum í Evrópu. Reus hefur skorað
11 mörk og lagt upp 10 í öllum keppnum í
vetur. Times bendlar hann við Manchester
United í skiptum fyrir Shinji Kagawa. United
vantar skapandi miðjumann. Reus gæti
verið tilvalinn í þá stöðu.
Ramires
Aldur: 26 ára
Þjóð: Brasilía
Orðaður við: Barcelona
n ESPN greinir frá því að
Barcelona renni hýru auga til Brasilíu-
mannsins auk þess sem Express hefur sagt
að Real Madrid hafi sýnt áhuga. Ramires
er einn fárra fastamanna í liði Chelsea og
það kæmi þess vegna mjög á óvart ef hann
færði sig um set. Ef til vill vill Real Madrid
sýna José Mourinho mátt sinn með því að
vængstýfa lið hans. Brotthvarf Ramires
myndi skilja eftir stórt skarð á miðjunni hjá
Chelsea. Ramires hefur sjálfur dregið úr
sögusögnum þess efnis að hann sé á förum
frá London.
Diego Forlán
Aldur: 34 ára
Þjóð: Úrúgvæ
Orðaður við: West Ham
n Þessi magnaði framherji sem í
dag spilar með Internacional í Brasilíu hefur
verið orðaður við West Ham að undanförnu.
Breska blaðið Mirror greindi frá þessu á
dögunum. West Ham þarf sárlega á reynslu-
miklum framherja að halda og gæti Forlán
eflaust reynst liðinu frábærlega. Þó að farið
sé að síga á seinni hlutann á ferli Forláns
hefur hann skorað 16 mörk í 21 leik með
Internacional á þessu ári. Sem kunnugt er
lék Forlán um tíma með Manchester United
þar sem hann átti erfitt uppdráttar.
Mario Balotelli
Aldur: 23 ára
Þjóð: Ítalía
Orðaður við: Chelsea
n Það kemur kannski örlítið á
óvart að Balotelli sé orðaður við endurkomu
í ensku úrvalsdeildina. Balotelli yfirgaf
Manchester City í janúar í fyrra og gekk í
raðir Milan. Óhætt er að segja að vera hans í
Englandi hafi ekki verið neinn dans á rósum
en þó stóð hann sig ágætlega á köflum.
Daily Mail greindi frá því á dögunum að
Balotelli gæti yfirgefið Milan-liðið og var
Chelsea nefnt sem mögulegur áfangastað-
ur. Chelsea þarf á alvöru framherja að halda
enda hafa þeir Fernando Torres, Samuel
Eto'o og Demba Ba ekki beint verið í fluggír
að undanförnu.
Alexandre Pato
Aldur: 24 ára
Þjóð: Brasilía
Orðaður við: Arsenal og
Tottenham
n Arsenal þarf á framherja að halda enda
er Olivier Giroud sá eini hjá félaginu í hæsta
gæðaflokki. Pato sló í gegn sem ungur
strákur hjá Milan en hann fór til Brasilíu í
janúar síðastliðnum eftir nokkur mögur ár,
meðal annars vegna meiðsla. Daily Star
greindi frá því á dögunum að nokkur félög
hafi áhuga á Pato, þar á meðal Tottenham
sem bar víurnar í hann í sumar. Pato hefur
skorað 17 mörk í 56 leikjum fyrir Corinthians
á þessu ári og miðað við gengi hans undan-
farin ár gæti ákveðin áhætta verið fólgin í
því að kaupa leikmanninn.
Luis Suárez
Aldur: 26
Þjóð: Úrúgvæ
Orðaður við: Real Madrid
n Suárez hefur verið besti
leikmaður ensku úrvalsdeildarinnar í vetur
og líklega aðeins Real Madrid sem hefur
efni á að kaupa hann. Það er ekki spurning
hvort heldur hvenær stórt tilboð berst í
Suárez. Afar ólíklegt þykir að Liverpool vilji
selja þennan ómótstæðilega leikmann þar
sem liðið er í harðri baráttu um Meistara-
deildarsæti. En ótrúlegri hlutir hafa gerst
og forráðamenn Real Madrid virðast alltaf
fá það sem þeir vilja. Kaupin á Cristiano
Ronaldo og Gareth Bale sýna það og sanna.
Hvort af mögulegu tilboði verður í janúar
skal þó ósagt látið.
Robert
Lewandowski
Aldur: 25
Þjóð: Pólland
Orðaður við: Chelsea og FC Bayern
n Pólverjinn hefur verið ómetanlegur fyrir
Borussia Dortmund undanfarin misseri en
samningur hans rennur út næsta sumar.
Sjálfur hefur Lewandowski gefið til kynna
að hann muni yfirgefa Dortmund og því þarf
félagið að selja hann strax í janúar ef það
ætlar sér að fá eitthvað fyrir hann. Forráða-
menn Chelsea eru sagðir fylgjast með gangi
mála með það fyrir augum að fá hann strax
í janúar en auk þess hefur FC Bayern áhuga
á þessum magnaða leikmanni sem hefur
skorað 15 mörk í 22 leikjum á tímabilinu.
baldur@dv.is / einar@dv.is