Lögmannablaðið - 01.07.1998, Page 26

26 Lögmannablaðið
Í Hæstarétti Noregs
Ekki var frítt við að ég fyndi fyrir
fiðringi í maganum að morgni 13. júní
s.l., þegar fyrri ræðumaður „kæranda”
stóð upp og gekk að málflutningspúlt-
inu í aðaldómsalnum í nýlega endur-
nýjuðu húsi Hæstaréttar Noregs, til
þess að hefja keppni norrænna laga-
nema. Fyrir varnaraðila, „Kalmarsam-
bandið”, voru málflutningsmenn frá
Bergen og í dómnum sátu dómarar við
dómstóla Norðurlandanna.
Málflutningskeppni í 13. sinn
Norræna málflutningskeppnin, eins
og hún hefur verið kölluð hér á landi,
er löngu orðin vel þekkt meðal lög-
manna og annarra lögfræðinga.
Grunninn að þátttöku Íslendinga lögðu
hæstaréttarlögmennirnir Gunnar
Helgason og Garðar Garðarsson fyrir
nærri þrettán árum. Síðan hafa líkast til
um 80 laganemar skipað það íslenska
lið sem staðið hefur að málflutningi í
dómsölum Norðurlandanna til skiptis.
Góður árangur íslenska liðsins
Kvíði minn reyndist auðvitað
ástæðulaus, keppnin fór vel af stað og
þegar leið á morguninn kom í ljós að
keppendurnir sex í íslenska málflutn-
ingsliðinu sem kennt er við Lögberg,
stóðu vel að vígi gagnvart norsku- og
sænskumælandi mótherjum sínum.
„Club Lögberg” sigldi inn í undanúrslit-
in með glæsilegri frammistöðu og ör-
uggum sigri á báðum andstæðingun-
um í sínum riðli, sem kenndur er við
Þór Vilhjálmsson, einn dómenda í
keppninni.
Eins og endranær tóku tólf lið þátt í
keppninni frá lagadeildum norrænu
háskólanna. Hvert lið teflir fram sex
þátttakendum. Liðin útbúa hvert um
sig greinargerðir sóknar og varnar í
máli þar sem einstaklingur hefur kært
meint brot „Kalmarsambandsins” gegn
ákvæðum Mannréttindasáttmála Evr-
ópu.
Lögberg náði þriðja sæti í keppninni
og auk þess fékk einn ræðumanna
okkar, Guðmundur Óli Björgvinsson,
verðlaun sem besti málflytjandi í okkar
riðli. Aðrir keppendur voru þau Anna
Kristín Úlfarsdóttir, Eva Bryndís Helga-
dóttir, Guðríður Kristjánsdóttir, Kristín
Benediktsdóttir og Sigþór Guðmunds-
son. Metnaður keppenda var mikill og
keppnisandi góður og var árangur liðs-
ins í samræmi við það. Af samtölum
við dómarana eftir keppnina ræð ég að
þeim fannst okkar lið hafa staðið sig
sérstaklega vel að þessu sinni. Í ár
voru óvenjumargir eldri keppendur
liðinu til aðstoðar og víst er að kepp-
endur hafa fundið fyrir miklum vænt-
ingum. Óhætt er að segja að þeir hafi
svo sannarlega staðið undir þeim
væntingum. Laganemarnir hafa líka
öðlast dýrmæta þekkingu á reglum
Mannréttindasáttmálans og ómetanlega
reynslu í málflutningi, og munu að
námi loknu hafa óumdeilanlegt forskot
á skólafélaga sína, er kemur að undir-
búningi og flutningi dómsmála.
Hæstiréttur Íslands 1999
Gestgjafarnir að þessu sinni, Club
Meltvedt frá Ósló, fóru með sigur af
hólmi í úrslitum. Við lokaathöfnina í
Hæstarétti Noregs bauð Guðrún Er-
lendsdóttir hæstaréttardómari formlega
til keppninnar á Íslandi á næsta ári,
fyrir hönd Hæstaréttar Íslands.
Fyrir hönd þátttakendanna, og sem
fyrirsvarsmaður íslenska liðsins, vil ég
færa þakkir öllum þeim lögmönnum
og öðrum sem með framlögum sínum
og annarri aðstoð gerðu okkur kleyft
að taka þátt í keppninni. Lögmannafé-
lagi Íslands eru færðar þakkir fyrir sinn
trygga stuðning. Á næsta ári mun enn
frekar reyna á stuðning velvildar-
manna, en undirbúningur er þegar haf-
inn að keppninni í Hæstarétti Íslands
að ári.
Guðmundur Óli Björgvinsson, Krist-
ín Benediktsdóttir og Anna Kristín
Úlfarsdóttir.
Sif Konráðsdóttir hdl.
Íslenska liðið í þriðja sæti í
Norrænu málflutningskeppninni
Guðríður Kristjánsdóttir, Sigþór
Guðmundsson og Eva Bryndís
Helgadóttir.
Íslenskir málflytjendur
í fullum skrúða
í Hæstarétti Noregs.