Lögmannablaðið - 01.09.2004, Síða 23
23L Ö G M A N N A B L A Ð I Ð
varð þriðji í röð þeirra sem luku prófi um leið og hann. Mörður hefur ekki farið í eiginlegt
framhaldsnám, en fór þó skömmu eftir námslok við lagadeildina á Osló á Institut for sörett í nokkra
mánuði að stúdera niðurjöfnun sjótjóna. Dómarastörf hefur Mörður aldrei reynt, en hefur sem
lögmaður eytt nokkrum mánuðum í réttarsölum. Lögmannsstörf hefur Mörður hinsvegar stundað
óslitið í yfir 30 ár og hefur flest árin flutt þetta 10 til 20 mál á ári, nú orðið lang mest fyrir
Hæstarétti, en fulltrúar hans sjá um hin einfaldari mál fyrir héraðsdómstólum. Það er ekki hægt að
segja annað en að málin hafi spannað allan sprengisand lögfræðinnar, þótt óneitanlega hafi sjó- og
flutningarétturinn verið hans stóra fag.
Mörður var stundum fenginn til að kenna við lagadeildina í gamla daga, m.a skaðabótarétt
og sjórétt, en fljótlega komst hann að þeirri niðurstöðu að hann hefði hvorki tíma né efni á slíku og
hætti, þrátt fyrir að nokkuð væri gengið á eftir honum af hálfu deildarinnar. Þessu næst voru talin
upp ritstörf umsækjendanna og í þeim samanburði varð Mörður að viðurkenna að hann stóð þeim
hæfustu langt að baki, þótt svo að honum finnist að margar greinargerðir hans fyrir dómstólum hafi
verið býsna góðar. En það telur ekki í þessum samanburði. Mörður hefur rekið mörg mál fyrir
hinum ýmsu stjórnsýslunefndum og úrskurðarnefndum fyrir skjólstæðinga sína, en aldrei setið í
slíkri nefnd, en þetta var næsta atriðið sem upp var talið að skipti máli varðandi hæfnismatið. Fyrir
einum tuttugu árum sat Mörður í einhverri norrænni laganefnd varðandi sjórétt, en sagði af sér
eftir ágreining við samgönguráðuneytið um þóknun til hans. Reynsla hans varðandi lagasmíð er því
nánast engin. Eftir að stjórnsýslulög nr. 37/1993 tóku gildi tók Mörður sér leyfi frá störfum í tvo
mánuði með samþykki félaganna á stofunni og dvaldi í sumarbústað sínum í Borgarfiði og kynnti
sér lögin og rit Páls Hreinssonar um þetta efni sérstaklega. Telur Mörður sig hafa haft mikið gagn
af þessari pælingu í störfum sínum.
Mörður var farinn að nálgast Reykjavík þegar vikið var að stjórnunarstörfum og reynslu á
því sviði. Mörður hefur rekið lögmannsstofu um árabil í félagi við aðra þar sem milli 10 og 15
manns starfa að jafnaði. Hann hefur aldrei litið á sig sem stjórnanda og er ekki viss um að hvort
hægt sé að segja að hann hafi stjórnunarreynslu.
Mörður fann til vanmáttar eftir þessa umfjöllun alla og mundi þá allt í einu eftir því að hann
á að flytja stórt mál í Hæstarétti í næstu viku, hringdi heim til sín og sagði konunni sinni að hann
yrði lítið heima næstu daga vegna þess að hann þyrfti að undirbúa málflutninginn. Mörður er
sannfærður um að hann hefði orðið aftastur í röðinni ef hann hefði sótt um stöðuna að þessu sinni.
Þegar hann kom á stofuna hitti hann einn meðeiganda sinn og fóru þeir að ræða þá punkta sem
dómararnir í Hæstarétti setja fram sem áhersluatriði varðandi hæfni. Voru þeir sammála um að þeir
þyrftu að taka sig á ef þeir ætluðu einhvern tíma að ná sér í laun til æviloka.
Verðmat og skipting dánar- og þrotabúa
Áratuga reynsla við verðmat, sölu og skiptingu dánar- og þrotabúa.
Svið þekkingar og þjónustu okkar nær yfir antik, listmuni, bækur,
frímerki, húsbúnað, nytjamuni, tæki og tól.
SANNGJARNT VERÐ.
•
Jónas Ragnar Halldórsson, antik- og listmunasali.
Laugavegi 101, GSM 867 5117 – Bréfasími 552 8222 og sími 551 5222
Netfang: goco@simnet.is