Morgunblaðið - 01.07.2015, Page 12
12 FRÉTTIRInnlent
MORGUNBLAÐIÐ MIÐVIKUDAGUR 1. JÚLÍ 2015
VIÐTAL
Jón Birgir Eiríksson
jbe@mbl.is
Jón Atli Benediktsson, nýr rektor
Háskóla Íslands, segir spennandi
tíma framundan í skólanum. Síðustu
ár hafi gengið með ágætum og þrátt
fyrir mögur ár í kjölfar efnahags-
hrunsins hafi skólinn náð markmiði
sínu um að komast í hóp bestu há-
skóla heims, samkvæmt Times
Higher Education-listanum.
Einna helst hefur rannsókna-
starfsemi háskólans eflst á síðustu
árum en Jón Atli segir auknar rann-
sóknir hafa veitt Háskóla Íslands
mikla athygli á alþjóðavettvangi.
Gengið til verks strax í haust
Alþjóðlegt gæðaráð háskóla skil-
aði nýlega skýrslu um Háskóla Ís-
lands þar sem skólinn hlaut góða
einkunn. Jón Atli segir að strax í
haust verði ráðist í aðgerðir innan
skólans með hliðsjón af gæðaúttekt-
inni. „Niðurstaða gæðaúttekt-
arinnar er líka góður efniviður fyrir
uppbygginguna. Margar ábendingar
koma þar fram um það sem betur
má fara,“ segir Jón Atli.
Hann segir komandi ár krefjandi
fyrir háskólann. „Ég tel mikilvægt
að við höldum áfram á þeirri braut
að byggja hér upp öflugan kennslu-
og rannsóknarháskóla.“ Skólinn hafi
náð góðum árangri á síðustu árum
þrátt fyrir erfið skilyrði en mörg
tækifæri séu enn ónýtt.
Kennslumálin í brennidepli
Jón Atli segir verkefnin fram-
undan að miklu leyti snúa að
kennslumálum, þar megi margt
bæta. Bágar fjárveitingar til háskól-
ans bitni ekki síst á námsaðstöðunni.
„Með fjölgun nemenda eftir hrun
þrengdi mjög að starfseminni. Nú
hafa fjárveitingar aukist en við erum
samt langt á eftir sambærilegum há-
skólum erlendis. Nú þegar hagur
landsins vænkast er gríðarlega mik-
ilvægt að setja háskólamenntun á
oddinn og fjármagna hana vel,“ seg-
ir hann. Jón Atli er áhugasamur um
tengingar háskólans út á við. Með
þeim geti háskólinn aukið þjónustu
við nemendur og ræktað samfélags-
legt hlutverk sitt um leið.
„Ég vil leggja áherslu á tengingu
háskólans við íslenskar stofnanir og
atvinnulíf. Þannig skapast miklir
möguleikar á raunhæfum verk-
efnum í samstarfi við fyrirtæki og
einnig á atvinnu fyrir nemendur í
framtíðinni,“ segir hann. Það sé þó
grundvallaratriði að standa vörð um
akademískt frelsi innan háskóla-
samfélagsins.
Jón Atli kveðst einnig vilja efla
skilyrði til nýsköpunar. „Ég tel mik-
ilvægt að efla nýsköpunarhugsun
innan háskólasamfélagsins, til dæm-
is með þverfræðilegu samstarfi. Á
mörkum fræðigreinanna eru oft
mikil sóknarfæri,“ segir hann.
Standist hæfnisviðmið
Eitt verkefna háskólans á næstu
árum er aukin aðsókn nemenda úr
framhaldsskólum vegna styttingar
skólastigsins í þrjú ár. Jón Atli segir
mikilvægt að gott samstarf takist
milli framhaldsskólanna, háskólans
og mennta- og menningamálaráðu-
neytisins um hvernig bregðast skuli
við en hefur ekki teljandi áhyggjur
af styttingunni. „Það er ljóst að
nemendum mun fjölga. Það verður
að tryggja að nemendur framhalds-
skólanna verði jafn vel undirbúnir
fyrir háskólanám og áður. Háskólinn
er vel í stakk búinn til að taka við
yngri nemendahóp. Aðalatriðið er að
þeir hafi kunnáttuna til að hefja há-
skólanám,“ segir Jón Atli.
Langtímafjárfesting í menntun
Hann segir mikilvægt að uppbygg-
ing síðustu ára haldi áfram. Nú hefj-
ist bataferli eftir niðurskurðartímabil
og framtíð skólans á alþjóðavettvangi
sé í brennidepli. Mikilvægt sé að há-
skólinn haldist samkeppnishæfur en
einnig þurfi hann að sinna samfélags-
legu hlutverki sínu vel á Íslandi. Þess
vegna sé brýnt að starfsemi hans sé
fjármögnuð með viðeigandi hætti og
vel sé haldið utan um kennslustarfið.
Fjármögnunin sé forsenda framþró-
unar í háskólanum.
Jón Atli segir kostnaðar-
útreikning mennta- og menningar-
málaráðuneytisins kominn til ára
sinna og endurspegli ekki raunveru-
legan kostnað við kennslu á há-
skólastigi. „Það er ljóst að það þarf
að leggjast í heildarendurskoðun á
reiknilíkani mennta- og menningar-
málaráðuneytisins,“ segir Jón Atli
og bætir við að fjárfesting í menntun
sé ein besta fjárfesting sem hið op-
inbera geti lagst í á tíma sem þess-
um. „Ef ekki tekst að tryggja fjár-
hagsgrundvöll skólans er árangri
hans stefnt í hættu og tækifæri hans
innan- og utanlands glatast,“ segir
Jón Atli Benediktsson, nýr rektor
Háskóla Íslands.
Framþróun háð fjárfestingu
Nýr rektor Háskóla Íslands vill endurskoða fjármögnun skólans Úrbætur í kjölfar úttektar
Tækifæri fólgin í samstarfi við atvinnulífið Hefur ekki áhyggjur af styttingu framhaldsskólans
Morgunblaðið/Kristinn
Rektor Jón Atli Benediktsson, rektor Háskóla Íslands, við rektorsskipti í hátíðarsal Háskóla Íslands í gær. Jón Atli
mun gegna embættinu í fimm ár en hann var áður aðstoðarrektor vísinda og kennslu við háskólann.
Jón Atli Benediktsson fæddist árið 1960 í Reykjavík og
lauk stúdentsprófi frá Menntaskólanum í Reykjavík árið
1980. Hann lauk prófi í rafmagnsverkfræði frá HÍ árið
1984 og Ph.D.-prófi frá Purdue-háskóla í Indiana í
Bandaríkjunum árið 1990. Jón Atli hefur kennt við raf-
magns- og tölvuverkfræðideild HÍ síðan 1991 og hlaut
prófessorsstöðu 1996. Eftir Jón Atla liggja yfir 300
fræðigreinar og bókarkaflar en Jón Atli hefur sérhæft
sig á sviði fjarkönnunar. Einnig hefur Jón Atli fengist
við nýsköpun á sviði augnlækninga með fyrirtækinu
Oxymap. Jón Atli er kvæntur Stefaníu Óskarsdóttur, dósent við stjórn-
málafræðideild HÍ. Þau eiga tvo syni, Benedikt Atla og Friðrik.
Afkastamikill fræðimaður
TEKUR VIÐ EMBÆTTI REKTORS
Jón Atli
Benediktsson
Jón Atli Benediktsson, prófessor í
rafmagns- og tölvuverkfræði, tók við
embætti rektors Háskóla Íslands af
Kristínu Ingólfsdóttur í gær. Jón
Atli var áður aðstoðarrektor vísinda
og kennslu en hefur meðfram starf-
inu kennt í Rafmagns- og tölvuverk-
fræðideild skólans.
Jón Atli hlaut kjör með 54,8%
greiddra atkvæða í síðari umferð
rektorskjörs sem fram fór hinn 20.
apríl sl. Kjörsókn var 52,7% en
kennarar, starfsfólk og nemendur
háskólans höfðu kosningarétt.
Í ræðu sinni þakkaði Jón Atli
Kristínu Ingólfsdóttur fyrir vel unn-
in störf og stiklaði á helstu verk-
efnum háskólans síðustu ár. Hann
vakti einnig athygli á fjárhags-
málum skólans síðustu ár og kynnti
meginsjónarmið stefnumörkunar
fyrir tímabilið 2016-2021 en meðal
annars nefndi hann að brýnt væri að
draga úr álagi á starfsfólk háskól-
ans, efla nýliðun á fræðasviðum
skólans, styrkja rannsóknarinnviði
skólans og bæta námsaðstöðu nem-
enda. Ennfremur benti Jón Atli á
þörf háskólans á aukinni fjár-
mögnun í framtíðinni. jbe@mbl.is
Morgunblaðið/Kristinn
Athöfnin Kristín Ingólfsdóttir, fráfarandi rektor, afhendir Jóni Atla tákn
rektorsembættisins við athöfn í hátíðarsal Háskóla Íslands.
Rektorsskipti í HÍ
Nýr rektor þakkaði Kristínu Ingólfs-
dóttur fyrir vel unnin störf við skólann