Skólavarðan - 01.09.2006, Síða 12
12
SKÓLAVARÐAN 6.TBL. 6. ÁRG. 2006
að ná markmiðum aðferða og inntaks
annars vegar og hins vegar að rækta jákvæð
viðhorf. Niðurstöður námsmatsins eru
síðan hagnýttar til að leiðbeina nemanda
um hvernig hann ætti að haga starfi sínu,
kennara um vinnuaðferðir og skipulag og
stjórnendum skólans um námsskipan.“
Einnig er talað um mikilvægi þess að hafa
fjölbreytt verkefni, einstaklingsverkefni
og hópverkefni, og þar er m.a. nefnt
að verkefni gætu verið ritgerðir, stuttir
fyrirlestrar eða kynningar, greinargerðir
eða skýrslur og prófað skuli sem mest í
eðlilegu samhengi en ekki í sundurlausum
þekkingaratriðum. Enn fremur er mælt
með sjálfsmati og jafningjamati.
Gamaldags nemendur og kennarar
Það er því ekki námskráin sem leggur þá
kvöð á herðar okkar að leggja yfirlitspróf
fyrir nemendur úr öllu efninu í lok annar,
þvert á móti er í henni opnað fyrir annars
konar mat og jafnvel kveðið á um umsögn
kennara um hvað nemandi getur að námi
loknu. Við framhaldsskólakennarar getum
kannski sjálfum okkur um kennt hversu
föst við erum í gamaldags matsaðferðum
en getum þó nefnt okkur til afsökunar
að nemendur eru það líka. Ef við skilum
ritgerðum með athugasemdum en
engri einkunn hlaupa þeir gjarnan yfir
athugasemdir okkar og spyrja EN HVAÐA
EINKUNN FÉKK ÉG? því það er það sem
máli skiptir að þeirra mati. Hér að baki
liggur kannski mjög svo hefðbundið
viðhorf um að hlutverk skóla sé fyrst og
fremst það að flokka nemendur.
Við veltum því fyrir okkur hér áðan
hvers vegna við kennarar ríghöldum
svona í skrifleg lokapróf. Við þeirri
spurningu eru eflaust mörg svör. Kannski
treystum við ekki nemendum okkar til að
lesa nema yfir þeim vofi próf og kannski
finnst okkur þetta hlutlæg eða að minnsta
kosti hlutlægasta aðferðin við að meta
nemendur, allir standa frammi fyrir því að
svara sömu spurningum á sama tíma við
sömu aðstæður.
Við höfum gefið hér gróft og kannski
yfirborðskennt yfirlit yfir námsmatsaðferðir
í framhaldsskólunum en það sem er
kannski aðalumhugsunarefnið að lokinni
svona athugun er hvaða áhrif námsmat
hefur á kennsluaðferðir og skólastarf.
Þessi úttekt okkar er alls ekki tæmandi
og við gerum okkur alveg grein fyrir því
að námsáætlanir segja ekki alltaf allan
sannleikann. Við erum þess fullvissar
að í mörgum skólum stunda kennarar
fjölbreytt námsmat og eru sífellt að leita
nýrra leiða við að meta nemendur og þróa
nýjar aðferðir við það en námsáætlanirnar
sem við skoðuðum endurspegla það bara
ekki.
Rósa Maggý Grétarsdóttir og
Sigurbjörg Einarsdóttir
Höfundar eru íslenskukennarar við
Menntaskólann við Hamrahlíð
Einnig er talað um mikilvægi þess að hafa fjölbreytt verkefni,
einstaklingsverkefni og hópverkefni, og þar er m.a. nefnt að
verkefni gætu verið ritgerðir, stuttir fyrirlestrar eða kynningar,
greinargerðir eða skýrslur og prófað skuli sem mest í eðlilegu
samhengi en ekki í sundurlausum þekkingaratriðum.
NÁMSMAT