Skólavarðan - 01.09.2012, Qupperneq 24

24
Skólavarðan 1. tbl. 2012ALþjóÐAsAmstARf
Ráðstefna Alþjóðasambands kennara (Education International, EI)
var haldin í New York í mars sl. undir heitinu „2012 International
summit on the teaching profession”. Ráðstefnan var sérstök að því
leyti að þarna komu saman ráðherrar menntamála, fulltrúar samtaka
fagmanna (einkum kennara) og fulltrúar kennaramenntunar til að
ræða efnislega skólastarf, starf kennara og þróun menntamála. Þetta
var önnur ráðstefnan um þetta efni og ráðgert er að halda þá þriðju að
ári í Hollandi. Jafnvel kemur til greina að Norðurlöndin haldi ámóta
ráðstefnu fyrir sig sérstaklega. Mér fannst athyglisvert að hlusta á
talsmenn ólíkra hagsmuna í menntamálum skiptast á skoðunum um
mjög mikilvæg málefni og að finna hve stjórnvöld ólíkra landa fengu
góða mynd af faglegum meginþráðum og átakamálum, hvert hjá öðru.
Bakgrunnur ráðstefnanna eru niðurstöður PISA kannana undanfarin ár
og vangaveltur um hvernig einstök ríki geti náð betri árangri. Það sem
var efnislega merkilegast að mínu mati er að umræðan er greinilega
komin upp úr hjólfari klisjukennds ásetnings um að bæta árangurinn
í PISA. Þetta þýðir þó ekki að verið sé að gera lítið úr því sem PISA
prófin mæla heldur er nú viðurkennt að þróun menntunar, skólakerfa
og skólastarfs krefst góðs skilnings á öllum þeim þáttum sem öflug og
kvik menntakerfi verða að rækta.
Hér dreg ég saman atriði sem mér fannst skipta mestu máli,
eins og ég skildi það sem fram kom, en bendi jafnframt á tvær
bakgrunnsskýrslur fyrir ráðstefnuna (eftir MacBeath á vegum EI og
Schleicher á vegum OECD), höfuðdrætti í inngangserindi Andreas
Schleicher og athugasemdir hans á ráðstefnunni, efni einstakra funda
ráðstefnunnar, samantekt Fernando Reimers, prófessors við Harvard
háskóla, í lok ráðstefnunnar og samantekt fundarstjórans Tony
Mackay á ráðstefnu sem haldin var í kjölfarið. Umræðan í upphafi
ráðstefnunnar og í lokin er til á upptöku (sjá tilvísanir um allt þetta í
ramma hér á eftir). Þau efnisatriði sem ég staldra við eru þessi:
Fagmennska (e. professionalism)
Á undanförnum áratugum hefur víða verið lögð sífellt ríkari áhersla
á mælingar, viðmið og síðan á ábyrgð á skólastarfi sem er tilgreind
með tilvísun í ýmsa mælikvarða. Nú er spurt, hvort ekki sé tilefni til
að horfa meira til fagmennsku kennarans sem birtist ekki ætíð í þeim
mælingum sem eru sýnilegastar, en felst í reynslu hans, faglegri sýn, í
því umhverfi sem hann hrærist og skilningi hans á verkefni sínu.
Texti: Jón Torfi Jónasson forseti menntavísindasviðs Háskóla Íslands
Myndir: JS og GG
Ráðstefna Alþjóðasambands kennara 2012.
Raunverulegt samtal stjórnmálamanna,
stéttarfélaga og fræðimanna
Bakgrunnur ráðstefnanna eru
niðurstöður PISA kannana undan-
farin ár og vangaveltur um hvernig
einstök ríki geti náð betri árangri.
Jón Torfi Jónasson