Dagblaðið Vísir - DV - 30.06.2017, Blaðsíða 2

2 Helgarblað 30. júní 2017fréttir
K
lofningur innan Fram­
sóknarflokksins er ekki leng­
ur helsta fyrirstaðan í því
að stjórnarandstaðan gæti
tekið við stjórnartaumunum, félli
ríkis stjórn Bjarna Benediktssonar.
Það er ósamstaða, skipulagsleysi
og klofningur innan raða Pírata
sem stendur í vegi fyrir því. Þetta er
skoðun fjölda þingmanna stjórnar­
andstöðunnar sem DV hefur rætt
við. Innanmein Pírata eru sögð slík
að þingmenn annarra stjórnarand­
stöðuflokka þakka fyrir að ekki hafi
tekist að setja saman fimm flokka
stjórn, svo sem reynt var. Sú stjórn
væri vísast sprungin margsinnis,
sökum þessa. Líkt og greint var frá
í DV um síðustu helgi er Ásta Guð­
rún Helgadóttir, þingkona Pírata,
einangruð frá hinum í þingflokkn­
um. Þá hefur því verið haldið fram
að persónulegar deilur og lausatök
í stjórnun valdi erjum, bæði innan
flokksins en einnig í samstarfi við
aðra stjórnarandstöðuflokka. Þing­
menn annarra stjórnarandstöðu­
flokka eru þessu sammála.
Hafnar ekki Framsókn
Smári McCarthy, þingmaður Pírata,
segir ekki ríkja neinn málefna­
ágreining innan þingflokks Pírata
en deilt sé um vinnulag. Unnið sé
að því að leysa þau mál og hann
er bjartsýnn á að það muni takast.
Hann segir enn fremur að hann geti
ekki kvartað undan samvinnunni
innan stjórnarandstöðunnar, hann
hafi verið býsna ánægður með hana.
Ef sitjandi stjórn hins vegar félli seg­
ir Smári ekki sjálfgefið að stjórnar­
andstaðan í heild, og þá með stuðn­
ingi einhvers flokkanna í núverandi
ríkis stjórn eða í það minnsta ein­
hverra þingmanna hennar, ætti
að taka við. „Ef stjórnin félli þyrfti
að skoða allar stöður upp á nýtt.
Stjórnarandstaðan hefur, eins og
ég segi, verið að vinna ágætlega
saman og það þyrfti bara að skoða
þá möguleika sem upp væru komn­
ir. Ég get hins vegar ekki sagt hér og
nú að þessi 31 manns hópur þing­
manna væri lausnin. Vandinn ligg­
ur í því hvernig þingmannafjöldinn
dreifðist í síðustu kosningum, þess
vegna er flókið að mynda stjórn.
Ég útiloka svo sem ekkert á þessum
tímapunkti.“
Píratar höfnuðu því algjörlega
í stjórnarmyndunarviðræðum að
vinna með Framsóknarflokknum.
Er afstaða flokksmanna breytt frá
því þá?
„Það hefur ekki komið til um­
ræðu en ef ég svara fyrir mig sjálf­
an, en ekki fyrir Pírata sem heild,
að ef til kæmi myndi ég horfa á alla
valkosti. Ég myndi hins vegar úti­
loka þá valkosti sem alls ekki kæmu
til greina frekar hratt.“
Og hvaða valkostir væru það?
„Ég veit það ekki, það þyrfti að
koma í ljós.“
Þvertaka fyrir að samvinnu
Innan Framsóknarflokksins ríkir
veruleg tortryggni í garð Pírata og
afstaða þeirra eftir kosningar, þegar
þingmenn Pírata lýstu því ítrekað
yfir að það kæmi ekki til greina að
vinna með Framsókn, hefur ekki
hjálpað. Þó er nokkur munur á því
eftir því við hvern er talað innan
þingflokksins hvort talið sé mögu­
legt að flokkarnir geti unnið saman.
Nokkur hópur þingmanna Fram­
sóknarflokksins þvertekur þannig
fyrir að hægt að sé að vinna með
Pírötum, ekki sé hægt að treysta
þeim þrátt fyrir að ákveðið hafi
verið að ganga í takt. Sömu þing­
menn taka einnig undir þá skoðun
að ríkis stjórnin geti setið í þægind­
um sökum þess hversu sundruð
stjórnar andstaðan er. Aðrir þing­
menn Framsóknarflokksins eru ekki
jafn afdráttarlausir í þessum efnum
og telja að mögulegt sé að stjórnar­
andstaðan gæti unnið saman en til
þess þyrfti verulegar málamiðlanir.
Þreyta í VG
Innan Vinstri grænna ríkir talsverð
þreyta í garð Pírata. Þar er tilfinn­
ingin sú að þingmenn séu umboðs­
lausir að því marki að þeir búi ekki
við fastmótaða stefnu, alla hluti
þurfi að fara með til umræðu inn­
an þingflokksins og þar af leiðandi
taki allar viðræður milli stjórnar­
andstöðuflokkanna mjög langan
tíma og ekki hægt að taka ákvarð­
anir nema eftir dúk og disk.
Ágæt reynsla af samstarfinu
Logi Már Einarsson, formaður
Samfylkingarinnar, segir að sín
reynsla af samstarfinu við Pírata sé
ágæt. „Það að þau eru nýr og óhefð­
bundinn stjórnmálaflokkur getur
vissulega valdið því að sum þeirra
útspil geta verið óvænt en ég get
ekki tekið undir að ekki sé hægt að
vinna með þeim, ég treysti mér vel
til þess. Mér finnst þetta vera, heilt
yfir, áhugaverðir stjórnmálamenn.
Stjórnarandstaðan hins vegar
glímir við það, eðlilega, að þetta
eru ólíkir flokkar. Það er líka þannig
að félli stjórnin er ekki sjálfgefið að
eini valkosturinn væri að stjórnar­
andstaðan tæki við, heimurinn er
ekki þannig svarthvítur.“
Ósættið stendur
flokknum fyrir þrifum
Eiríkur Bergmann, stjórnmála­
fræðiprófessor við Háskólann á Bif­
röst, segir merkilegt hversu vel Pírat­
ar hafi haldið flugi, flokkur sem í eðli
sínu sé andstöðu­ og jaðarflokk­
ur en hafi þrátt fyrir það notið mik­
ils fylgis og það lengi. „Öll skapalón
í stjórnmálafræði segja að flokkur
sem þessi ætti að vera sprunginn
í loft upp en hann hefur ekki gert
það, þrátt fyrir að fregnir berist af
erfiðleikum innan hans. Ósætti inn­
an Pírata stendur samt flokknum
fyrir þrifum, þetta er flokkur sem má
ekki við neinu slíku. Til þess að virka
þurfa Píratar að vera, eða alla vega
líta út fyrir að vera, samstíga því þeir
eru andstaðan við, og því valkostur
við, hinn hefðbundna stjórnmála­
flokk. Sýni þeir ekki fram á að vera
samstíga innan flokks þá er hætt við
að þeir tapi trúverðugleika sínum.“
Stjórnin stendur sterk
Eiríkur segir augljóst að meira en
lítill krytur sé milli Pírata og Fram­
sóknarflokksins, sem meðal annars
valdi því að óraunhæft sé að ætla að
stilla stjórnarandstöðunni upp sem
valkosti til að taka við stjórnartau­
munum. „Hinir stjórnarandstöðu­
flokkarnir hafa ekki treyst Pírötum,
eða í það minnsta hefur ríkt tor­
tryggni í þeirra garð um hvort þeir
séu stjórntækir. Það er þó að ég tel
ansi mismunandi milli flokka. Það
er auðvitað langlengst á milli Pírata
og Framsóknarflokks af þessum
stjórnarandstöðuflokkum og hæpið
að þessir tveir flokkar geti undir
nokkrum kringumstæðum unnið
saman.
Stjórnarandstaðan sem heild er
því algjörlega ótrúverðugur valkostur
til að taka við stjórnar taumunum.
Það er helsti styrkur ríkisstjórnar­
innar, að stjórnarandstaðan sem
heild er óstjórntæk. Þingmenn ríkis­
stjórnarinnar gera sér glögga grein
fyrir þessu og leyfa sér því meiri deil­
ur en oftast hefur verið, bæði milli
óbreyttra þingmanna en einnig inn­
an ráðherraliðsins. Það virðist ekki
valda henni umtalsverðum vand­
ræðum, þó að það séu auðvitað
mál sem þeim mun aldrei takast að
hrinda í framkvæmd vegna þess að
það er ósætti milli flokkanna um þau.
En það hversu ósamstíga stjórnar­
andstaðan er gerir það að stjórnin
stendur í raun sterkum fótum, sterk­
ari en í raun mætti ætla af öllum ytri
merkjum.“ n
Fallegir að innan sem utan
Gluggagerðin framleiðir fyrsta flokks tréglugga og hurðir þar sem
saman fer fallegt útlit, góð ending og vandaður frágangur.
Gluggagerðin | Súðarvogi 3–5 | 104 Reykjavík | Sími 566 6630 | gluggagerdin.is
SÉRSMÍÐAÐIR ÍSLENSKIR GLUGGAR
Vandaðir
gluggar sem hannaðir
eru til að þola
íslenska veðráttu
Píratar eru fyrirstaðan
n Stjórnarandstaðan er óraunhæfur valkostur n Stjórnin í þægilegri stöðu
Freyr Rögnvaldsson
freyr@dv.is
Segir engan málefnaágreining Smári
McCarthy, þingmaður Pírata, neitar að
málefnaágreiningur ríki innan þingflokksins
en segir að deilt sé um vinnulag.
Reynslan ágæt Logi Már Einarsson, for-
maður Samfylkingarinnar, segir að reynsla
hans af samstarfi við Pírata sé ágæt.
Mega ekki við ósætti Eiríkur Bergmann
stjórnmálafræðiprófessor segir Pírata ekki
mega við ósætti innan sinna raða, annars sé
hætt við að þeir tapi trúverðugleika sínum.
Kátir þá Píratar voru kátir
á kosninganótt. Ýmislegt
bendir til að kætin sé eitt-
hvað í rénun. Mynd SiGtRyGGuR ARi