Fregnir - 01.10.2009, Blaðsíða 6

FREGNIR. Fréttabréf Upplýsingar - Félag bókasafns- og upplýsingafræða
34. árg. - 2. tbl. 2009 
Á alþjóðlegum Degi læsis þann 8. september 2009 fengu allir nemendur 7. bekkjar Vallaskóla á
Selfossi afhentar lestrardagbækur, skemmtilega og áhugaverða gjöf. Aðrir sjöundubekkingar á
Suðurlandi fengu einnig slíkar bækur að gjöf næstu daga á eftir. Það voru nokkrar konur á Suðurlandi
sem eru áhugasamar um lestur og læsi og eiga það sameiginlegt að starfa á bókasöfnum sem gáfu
nemendum bækurnar.
Lestrardagbókin hentar í raun bæði börnum og fullorðnum. Gaman er að skrá í hana þær bækur sem
lesnar eru og skrifa nokkur orð eða hugleiðingar um bækurnar í leiðinni til að minna sig á. Tilvalið er
einnig að foreldrar nýti bókina til að halda utan um það sem þeir lesa með börnum sínum, nota hana til
að skrá hljóðbækur sem hlustað hefur verið á og svo framvegis. Lestrardagbókin hjálpar lesandanum
að rifja upp og njóta þess sem búið er að lesa.
Fyrsta útgáfa lestrardagbókarinnar kom út fyrir þremur árum og var til sölu á flestum
almenningsbókasöfnum landsins. Bókin seldist fljótt upp og hefur nýrrar útgáfu verið beðið með
eftirvæntingu. Í þessari útgáfu skrifar Kristín Helga Gunnarsdóttir rithöfundur formála og Björn
Heimir Önundarson, nemandi í Hvolsskóla, Hvolsvelli teiknaði skemmtilegar myndir í bókina.
Menningarráð Suðurlands styrkti útgáfu bókarinnar. Það gerir útgefendum kleift að færa öllum
nemendum 7. bekkjar á Suðurlandi eintak af bókinni, en það eru einmitt þeir nemendur sem taka þátt
í Stóru upplestrarkeppninni. Í þeim hópi eru um 380 nemendur á þessu ári, en næstu tvö ár verður
sjöundu bekkingum á Suðurlandi einnig gefin lestrardagbók.
Lestrardagbókin er til sölu í almenningsbókasöfnum. Pantanir fyrir bókasöfn bokasafn@arborg.is
Lestrardagbókarhópinn skipa Margrét Ásgeirs-
dóttir og Sigríður Matthíasdóttir sem starfa
við Bókasafn Árborgar, Selfossi, Barbara
Guðnadóttir menningarfulltrúi Ölfuss,
starfar fyrir Bæjarbókasafn Ölfuss, Elín K.
Guðbrandsdóttir sem starfar á Bókasafni FSU
Selfossi, Gunnhildur Kristjánsdóttir sem starfar
á Héraðsbókasafni Rangæinga á Hvolsvelli
og Hlíf S. Arndal sem starfar á Bókasafninu í
Hveragerði.
Börnin hvött til lesturs