Skessuhorn - 13.07.2016, Blaðsíða 11
MIÐVIKUDAGUR 13. JÚLÍ 2016 11
UNGLINGALANDSMÓT UMFÍ
Í BORGARNESI 28 - 31. JÚLÍ
Frá því um síðasta vetur hefur stað-
ið yfir bygging tveggja viðbygginga
við Gistiheimilið Langaholt á Snæ-
fellsnesi. Þorkell Sigurmon Símon-
arson, eða Keli vert eins og hann er
betur þekktur, vill ekki fullyrða um
hvenær viðbyggingarnar verði opn-
aðar. „Þær verða opnaðar sem fyrst.
Maður þorir ekki að segja meira;
það virðist nefnilega alltaf bætast
við verkið frekar en hitt. Ég held
að það sé samt ekki alltof langt í að
við getum farið að nýta þær. Með
viðbyggingunum erum við að tvö-
falda fjöldan sem getur gist hjá okk-
ur. Eins og staðan er núna þá erum
við með 20 herbergi en þegar fram-
kvæmdum lýkur verða hér 40 her-
bergi,“ segir Keli.
Færa sig til nútímans
Keli hefur rekið Langaholt í rúman
áratug. „Ég tók við þessu af foreldr-
um mínum fyrir rúmum áratug síð-
an. Fljótlega eftir að ég tók við skall
hér á hrun og þetta hefur því verið
bras en nú erum við loksins komin
á skrið aftur. Með þessum herbergj-
um sem við erum að bæta við erum
við ekki bara að auka plássið held-
ur einnig að færa okkur inn í nú-
tímann. Aðalbyggingin er frá árinu
1985 og á þeim tíma voru allt aðrar
kröfur bæði frá gestum sem og eftir-
litsstofnunum. Þetta er fyrsta stóra
framkvæmdin sem farið hefur ver-
ið í síðan ég byrjaði. Ég hef öðlast
reynslu á þeim tíma sem ég hef stýrt
þessu og veit hvað það er sem fólk
vill og eitt það helsta sem við höfum
hér er útsýnið á Snæfellsjökul. Ég
tók því þá ákvörðun að öll herberg-
in í nýju byggingunum skyldu snúa
að Jöklinum.
Önnur ástæðan af hverju við erum
að þessu núna er sú staðreynd að það
er erfitt að reka litla staði. Við viljum
bjóða upp á ákveðin gæði og eitt af
því er að bjóða upp á góðan mat. Við
getum ekki haldið uppi góðum veit-
ingastað með 20 herbergja gististað
svo ef við ætlum að gera það þurft-
um við að stækka. Gott útsýni, góð-
ur matur og þægindi er grunnurinn
í þeim rekstri sem við erum í svo það
verður að vera í lagi,“ segir Keli.
Tölur um aukin ferða-
mannastraum villandi
Keli segist hafa fundið vel fyrir aukn-
ingu á gistiheimilinu undanfarin ár.
„Ísland er í tísku og ferðaþjónustan
blómstrar á meðan. Það er aukning
hvert sem litið er í þessum bransa.
Við sjáum það að síðustu fjögur ár
höfum við rekið þetta gistiheimili
allt árið um kring. Samt sem áður
eru tölurnar um þessa sprengju
í ferðaþjónustunni villandi. Það
hefur vissulega verið aukning í því
hversu margir koma en það hefur
ekki verið eins mikil sprenging og
menn vilja vera láta. Dvölin hefur
t.d. styst hjá fólki. Gistinæturn-
ar eru því orðnar færri hjá hverj-
um einstaklingi. Fólk er núna oft á
tíðum bara að koma í fáeina daga,“
segir Keli.
„Ferðamannabransinn er orðinn
nýja gullæðið. Það þarf samt ekki
mikið að gerast svo að upp komi
áföll í bransanum. Við búum við
hagstæða tíma eins og er. Fólk vill
koma og skoða þetta litla dular-
fulla land núna en það getur alltaf
breyst. Það er mikil óvissa í þess-
um bransa og hann er ungur hér
á landi. Fólk er enn að fóta sig og
ekki síst yfirvöld. Yfirvöld virð-
ast ekki alveg vera með puttann á
púlsinum; við höfum séð það marg
ítrekað undanfarið eins og með
vegi, klósettaðstöðu og annað.“
Keli segir erfitt að átta sig á
þeim bransa sem ferðaþjónustan
er. „Fólk bjóst ekki við því þegar
þetta gistiheimili var opnað 1985
að fólk færi að fljúga yfir hálfan
hnöttinn til þess eins að sjá norð-
urljós. Fólk bjóst reyndar ekki við
því að ferðaþjónusta væri eitthvað
sem Íslendingar gætu grætt á árið
1985 ef út í það er farið. Fólk hristi
bara hausinn þegar foreldrar mínir
byggðu þetta en á sama tíma voru
allir að byggja yfir refi og stunda
þann iðnað. Ég held að foreldr-
ar mínir hafi veðjað á réttan hest
þar. Það sem maður hefur lært um
þennan bransa eftir öll þessi ár er
að maður veit ekkert um hann,“
segir Keli.
Vill búa á Snæfellsnesi
Keli segir að aðal ástæðan fyr-
ir því að hann reki Langaholt sé
sú að hann vill búa á Snæfells-
nesi. „Flesta daga er þetta mjög
skemmtilegt starf en stundum
hugsar maður hvers vegna maður
er í þessu, sérstaklega þegar mað-
ur stendur í svona framkvæmdum.
Ég vinn bara sem bóndi á annan
hátt en þeir sem eru hérna í kring.
Ég sel ekki uppskeru eða dýrafurð-
ir, ég sel minningar. Þetta er mín
leið til að búa hérna á Snæfellsnesi
og því ég vil hvergi annars staðar
vera,“ segir Keli að endingu.
bþb
„Ég vinn við að selja fólki minningar“
Spjallað við Kela Vert, ferðaþjónustubónda í Langaholti í Staðarsveit
Keli fyrir framan aðra viðbygginguna en gistirými í Langaholti verður nú tvöfaldað.
Í viðbyggingunni sem snýr til norðurs verður meðal annars nýtt lobbý.