Dagblaðið Vísir - DV - 13.12.2019, Page 46

46 FÓKUS 13. desember 2019
Hvar líður þér best?
Á Catalinu í Kópavogi eða í sófanum heima með bók og kisanum mínum. Undanfarið hef ég
gert rispu í að kynna mér sportbari í Reykjavík þrátt fyrir almennt áhugaleysi á íþróttum. Ég
er alltaf að reyna að halda með einhverjum liðum en gleymi jafnóðum hvaða lið er mitt og fer
að halda með „línudómurunum“ eða þeim sem eru í fyndnustu búningunum.
Hvert er þitt mesta afrek?
Það var að ganga skítþunn upp og niður eitthvert fjall sem heitir Stóra Jarlhetta. Ég hélt því
fram að mér þætti fjallgöngur skemmtilegar, en það var bara vegna þess að ég hafði aldrei
farið í neina. Hálfa leið upp fjallið mundi ég að ég er lofthrædd kyrrsetumanneskja sem hef
álíka gaman af því að vera úti í náttúrunni og að fá alvarlegar sýkingar. Það var ekkert síma-
samband svo það þýddi ekkert að panta þyrlu svo ég varð bara að klára þetta. Eftir þetta læt
ég duga að kíkja á Youtube eða Netflix ef mig langar í einhverja náttúru.
Hver væri titillinn á ævisögu þinni?
Mamma grét, myndi hún heita. Það hefur oft átt við og svo er það bara svo gott lag að ég
og systir mín, Júlía Margrét, og frænku-vinkona okkar, hún Kristín Svava, fórum og létum
stoltar tattúvera það á okkur. Fáir utan Hafnarfjarðar deila þessari aðdáun með okkur en
boðskapurinn er mjög fallegur.
Hvernig væri bjórinn Kamilla?
Hann þyrfti að vera frekar glær og ókeypis til að ég myndi fíla hann, en taugatrekkjandi og
óútreiknanlegur ef hann ætti að vera í stíl við mig.
Besta ráð sem þú hefur fengið?
Það er úr ljóðabók Óskars Árna Óskarssonar, Fjörtíu ný og gömul ráð við hversdagslegum
uppákomum, og er svona: „Stundum kemur fjarskyldur ættingi frá Kanada óvænt í heim-
sókn. Þá er ráð að hjóla suður í Hafnarfjörð“.
Hvert er leiðinlegasta húsverkið?
Ég hef svo lítið kynnt mér það hobbí, ég læt þetta meira bara svona reka á reiðanum heima
hjá mér. Þegar ég fer að sinna húsverkum af einhverri alvöru skal mynda ég mér skoðun á
þeim.
Besta bíómynd allra tíma?
Terminator 2 verður aldrei toppuð.
Hvaða hæfileika myndir þú vilja búa yfir?
Mér þætti æðislegt að geta ferðast meira út í geim og um tímann. Ég er vitlaus í geimverur,
kastala og risaeðlur. Af praktískari hæfileikum þá væri fínt að kunna að elda eitthvað. Ég
kann varla að rista brauð, en sem betur fer finnst mér fullt af morgunkorni mjög gott.
Hver er mesta áhætta sem þú hefur tekið?
Ef ég er feimin og lítil í mér þá rennsvitna ég við að heilsa fólki og efast á meðan um hvort ég
muni lifa það af. En oft er ég samt svo hvatvís að ég gæti gengið skjálfandi frá því að segja
hæ við einhvern beint inn í næsta herbergi og framið þar afbrot eða hræðilegt glæfratafl án
þess að finnast það vera nokkur áhætta. Ég hef gert margt heimskulegt, en tóri enn.
Hvaða frasi eða orð fer mest í taugarnar á þér?
Það er mjög breytilegt. Í augnablikinu hef ég algjöran ímigust á því þegar stjórnmálamenn
tala um „vegferð“.
Hvaða geturðu sjaldnast staðist eða ert góð í að réttlæta að veita þér?
Mér er frekar sama um flesta dauða hluti eins og föt, græjur og mublur. En ég læt oft eftir
mér alls konar upplifun eins og mat, tónleika og ferðalög. Ég geri þetta jafnvel oftar en ég
ætti að gera svona miðað við fjárhag og skyldur í lífinu. Mun samt halda því áfram.
Hvað er á döfinni hjá þér?
Núna í desember ætla ég að halda áfram að
njóta þess að lesa allar nýju, skemmtilegu
bækurnar sem eru að koma út núna. Í
janúar ætla ég að halda upp á afmælið
mitt í bænum Bruges í Belgíu, því Elín,
vinkona mín, sagði að þar væri ekkert
nema miðaldaleg hús, síki og bjórar.
Svo í mars verður frumsýnt leikrit í
Þjóðleikhúsinu sem er byggt á bókinni
minni: Kópavogskróniku, sem Silja
Hauksdóttir mun leikstýra, Ilmur
Kristjánsdóttir leika aðalhlutverkið
í og tónlistarmaðurinn Auður sjá um
tónlistina. Ég hlakka mikið til að sjá
það og mæta í frumsýningar-
partíið.
Ég er 25 ára gaur sem vill
kynnast konu á svipuðum
aldri. Er með blæti fyrir
fallegri hönnun og útiveru.
Trúnaður í fyrirrúmi og stóla
á það sé gagnkvæmt.
YFIRHEYRSLAN
Kamilla
Einarsdóttir
Rithöfundurinn og bókavörðurinn Kamilla Einarsdóttir
býr í Hlíðunum og elskar að eigin sögn ókeypis bjór, sæt dýr og
Hamraborgina í Kópavogi. Kamilla gaf út sína fyrstu skáldsögu
um síðustu jól en leikrit byggt á bókinni, Kópavogskrónika,
verður sýnt í Þjóðleikhúsinu eftir áramót. Kamilla er í yfir-
heyrslu helgarinnar.
M
Y
N
D
: E
Y
Þ
Ó
R
Á
R
N
A
S
O
N
Íris Hauksdóttir
iris@dv.is