Fréttablaðið - 16.05.2015, Blaðsíða 30

16. maí 2015 LAUGARDAGUR| HELGIN | 30
Tökur standa yfir á þriðju seríu sakamálaþáttanna Réttar. Baldvin Z sér um leikstjórn og handrits-höfundar eru Þorleifur Örn Arnarsson og Andri
Óttarsson. Serían er frumraun
þeirra í handritsgerð fyrir sjón-
varp. Þorleif kannast margir við
úr leikhúsgeiranum þar sem hann
hefur leikstýrt fjölda verka, meðal
annars Sjálfstæðu fólki og Englum
alheimsins, og starfað í leikhúsum
í Þýskalandi.
Aðkoma Andra er óhefðbundnari,
hann kemur úr heimi lögfræði og
pólitíkur en ákvað fyrir um fimm
árum að láta drauminn rætast og
einbeita sér að skrifum.
Skrifin veita lífsánægju
„Þetta hefur alltaf blundað í mér
og á einhverjum tímapunkti fór ég
að gera mér betur og betur grein
fyrir því að þetta var það sem veitti
mér mesta lífsánægju. Það leiddi til
þess að ég fór að þreifa mig áfram
og fikta við skáldskapinn,“ segir
Andri og bætir við að hann hafi í
kjölfarið komist að því að honum
þóttu skáldskaparskrifin skemmti-
leg. „Lífið er einhvern veginn allt
of stutt og skemmtilegt til þess að
vera að gera eitthvað annað en það
sem maður hefur mesta ánægju af
því að gera.“
Áralöng vinátta
Andri og Þorleifur hafa verið vinir
lengi, raunar svo lengi að þeir eiga
í erfiðleikum með að rifja upp ára-
fjöldann. Andri hefur aðstoðað Þor-
leif á bak við tjöldin í hans verk-
efnum, lesið yfir efni og jafnvel
ferðast á milli landa til að rétta
hjálparhönd.
Þorleifur var því fljótur að stinga
upp á að þeir skrifuðu handritið að
Rétti 3 saman þegar honum bauðst
verkefnið. „Það meikaði sens að við
tveir myndum skrifa þetta, annar úr
leikhúsinu og svo Andri úr lögfræð-
inni sem hafði líka þessa hæfileika,“
segir Þorleifur og bætir við:
„Samtalið við SagaFilm um að fá
Andra um borð tók í alvöru þrjár
mínútur,“ segir Þorleifur og hælir
hugrekki SagaFilm, að þora að veðja
á nýja höfunda og gefa þeim frelsi
til að enduruppgötva seríuna.
Feikilega gott teymi
Þeir eru ólíkir í fasi og framkomu
en augljóst er að þarna er eitthvað
sem virkar. Einhvers konar jin-jang
orka þar sem þeir vega hvor annan
upp. Þeir eru sammála um að þeir
skipi gott teymi, samvinnan hefur
gengið vel og jafnvel styrkt vinátt-
una.
„Okkur gengur rosalega vel að
vinna saman. Ég held að reynsla
Dodda sem leikstjóra hjálpi okkur
mikið. Hann getur alltaf hámarkað
möguleikana sem hver sena hefur
og er algjörlega óhræddur við að
benda á að senan gæti verið betri.
Þó að þetta sé eitthvað sem aðrir
myndu segja að væri mjög gott, þá
sér hann alltaf það sem hægt er að
bæta ofan á hana í gæðum. Sem er
ómetanlegt. Ég held að þetta komi
að einhverju leyti úr leikstjórninni,“
segir Andri og beinir þessum vanga-
veltum að vini sínum sem fellst á
það.
Þorleifur segir markið hafa verið
sett hátt, enda þýði ekkert annað.
„Við ákváðum að skrifa besta hand-
rit sem hefur komið í íslensku sjón-
varpi og sögðum að það yrði enginn
afsláttur gefinn,“ segir Þorleifur á
meðan Andri brosir út í annað yfir
ákefðinni.
Þorleifur heldur hlæjandi áfram.
„Já, eða ég er alltaf búinn að vera
að tala um það og ég bara trúi því.
Það hvort manni tekst það eða ekki
er ekki endilega aðalatriðið, en
maður verður að stefna á það.“
Að handritinu hafa þeir unnið í
rúm tvö ár og kastað því á milli.
Minna úr réttarsalnum
Réttur fjallar um lögfræðistofuna
Lög og rétt og þær flækjur sem
upp koma. Fyrri handrit skrif-
uðu Sigur jón Kjartansson og Mar-
grét Örnólfsdóttur og aðalhlutverk
eru í höndum Magnúsar Jónsson-
ar sem Loga og Jóhönnu Vigdísar
Arnardóttur í hlutverki Brynhildar.
Verkefnið var því spennandi að tak-
ast á við, sér í lagi þar sem um er
að ræða frumraun þeirra beggja í
sjónvarpi. Sögusviðinu breyttu þeir
að því leyti að minna er í réttarsaln-
um og meiri áhersla á íslenskan
veruleika.
„Ég var ofboðslega fljótur að
útskýra fyrir fólki að íslensk-
ir réttar salir eru svona sirkabát
leiðin legasta sjónvarpsefni sem til
er í heiminum,“ segir Andri sposk-
ur á svip.
Eftir þá ákvörðun kviknuðu
spurningar um umfjöllunarefni
þáttanna en þeir félagar áttuðu sig
fljótt á að starf lögmanna snert-
ir marga fleti íslensks samfélags.
Afraksturinn er samfelld saka-
málasaga úr íslenskum raunveru-
leika þar sem dregin er upp yfirlits-
mynd af ofbeldismálum.
Umfjöllunarefnið er kynferðis-
ofbeldi gagnvart ungum einstak-
lingum í neyslu og hinn duldi
heimur internetsins þar sem sam-
félagsmiðlar koma við sögu.
Þeir sönkuðu að sér upplýsing-
um um málaflokkinn, þó ekki um
einstakt mál, og lögðu upp með að
þættirnir væru raunverulegir og
drægju ekkert undan.
„Það er varla að það komi þarna
inn sena eða atvik sem á sér ekki
hliðstæðu eða jafnvel enn öfgafyllri
útgáfu í íslenskum raunveruleika í
dag. Ekki í LA eða einhvers stað-
ar í Simbabve, heldur hér,“ bætir
Þorleifur við ákveðinn og segir
sjónvarpsseríuformið henta vel til
þessa en í handritinu eru margar
sögur fléttaðar saman yfir langan
tíma.
„Við vorum ákveðnir í því eigin-
lega frá fyrstu mínútunni að það
væri vannýtt tækifæri ef við
færum að skrifa þessa seríu ein-
göngu út frá skemmtanagildi, það
yrði að vera einhver þjóðfélagsleg
skírskotun,“ segir Andri og bætir
við að ánægjulegt sé að vilji sé til
að skapa efni með sterkum skila-
boðum og skírskotun í raunveru-
leg og aðkallandi málefni.
Kjarni vináttunnar
Þarna tekur Þorleifur til máls og
segir að það sé einmitt þessi köllun
þeirra beggja sem sé kjarni vinátt-
unnar.
„Við viljum báðir hafa áhrif á
samfélagið. Andri áður í gegnum
pólitískt starf og lögmennsku og ég
í gegnum leikhúsið,“ segir Þorleifur.
„Við fórum í gegnum sameigin-
legt ferli og ég held að við höfum
báðir komist að því að í listinni hafi
maður að mörgu leyti tækifæri til,
þó að þú sjáir það ekki alveg svart
á hvítu, að hafa djúpstæðari aðgang
að fólki. Þetta eru níu þættir sem
munu kannski rúlla í gegnum þrjá
mánuði. Ef okkur tekst vel upp þá
geta þessi málefni verið á milli
tannanna á fólki í fleiri mánuði,“
segir Þorleifur og það er augljóst
að umfjöllunarefnið er þeim hjart-
ans mál.
Tökur á þáttunum standa yfir
fram í júlí en stefnt er á að sýning-
ar hefjist á Stöð 2 í október.
„Við erum búnir að sjá svolítið
úr tökunum, fáum sendar senur og
senur, og þetta lítur alveg svaka-
lega vel út. Við erum mjög spenntir,
alveg eins og krakkar í dótakassa,“
segir Þorleifur ánægður og bætir
við að það sé magnað að sjá tveggja
ára vinnu vakna til lífsins.
Andri er sammála og bætir við:
„Það er alltaf erfitt að afhenda sköp-
unarverkið í hendurnar á einhverj-
um öðrum en eftir fyrsta fundinn
með Baldvin Z vissum við að hand-
ritin gætu ekki verið í betri höndum,
hann deilir sömu sýn á verkefnið og
er í raun eins og hugur okkar á setti.
Við erum búnir að mæta nokkrum
sinnum á settið og sjá þessar fyrstu
tökur. Það sem við erum búnir að sjá
er enn þá betra en það sem maður
þorði að vona,“ segir hann. Þegar
þeir eru inntir eftir því hvort þetta
verkefni sé upphafið að frekara
samstarfi þeirra eru svörin skýr:
„Það er ljóst að við munum halda
þessu áfram,“ segir Andri ákveð-
inn og Þorleifur tekur í sama streng:
„Þetta var bara upphitun.“
Gyða Lóa
Ólafsdóttir
gydaloa@frettabladid.is
Tilvísun í hræðilegan veruleika
Þorleifur Örn Arnarsson og Andri Óttarsson, gamlir vinir sem gætu virst ólíkir en skipa gott teymi, skrifuðu handritið
að Rétti 3, sakamálaþætti. Serían verður talsvert ólík þeim sem á undan hafa komið og er sögusviðið fært úr réttarsalnum.
SAMEINA KRAFTA SÍNA Andri Óttarsson og Þorleifur Örn Arnarsson hafa unnið að handritinu að Rétti 3 í rúm tvö ár. Þeir eru gamlir vinir og segja handritið upphafið að frekara samstarfi. FRÉTTABLAÐIÐ/ERNIR
Lífið er einhvern
veginn allt of stutt og
skemmtilegt til þess að vera
að gera eitthvað annað en
það sem maður hefur mesta
ánægju af því að gera.
Andri Óttarsson
Við erum búnir að sjá
svolítið úr tökunum, fáum
sendar senur og senur, og
þetta lítur alveg svakalega
vel út. Við erum mjög
spenntir, alveg eins og
krakkar í dótakassa.
Þorleifur Örn Arnarsson