Morgunblaðið - 16.05.2020, Blaðsíða 5

FRÉTTIR 5Innlent
MORGUNBLAÐIÐ LAUGARDAGUR 16. MAÍ 2020
Ómar Friðriksson
omfr@mbl.is
Forsvarsmenn námsmanna halda
áfram fast við þá kröfu að stúdentar
fái rétt til atvinnuleysisbóta þrátt
fyrir boðaðar aðgerðir stjórnvalda
til að tryggja námsmönnum tíma-
bundin sumarstörf. Sigrún Jóns-
dóttir, forseti Landssamtaka ís-
lenskra stúdenta, segir aðgerðirnar
sem félagsmálaráðherra og mennta-
málaráðherra kynntu sl. miðvikudag
ekki leysa vanda allra.
Vel á þriðja þúsund höfðu í gær
undirritað ákall Landssamtaka ís-
lenskra stúdenta eftir stuðningi við
þá kröfu að námsmenn fái rétt til at-
vinnuleysisbóta.
Sigrún segir að búið sé að kort-
leggja stöðuna ágætlega með þrem-
ur könnunum sem voru lagðar fyrir
stúdenta í apríl, sem bentu til að ríf-
lega sjö þúsund stúdentar væru
ekki komnir með sumarvinnu. Með
átaksverkefni stjórnvalda eiga að
verða til 3.400 tímabundin störf fyr-
ir námsmenn. Segir Sigrún að það
blasi því við að þessi úrræði dugi
ekki fyrir stóran hóp stúdenta, sem
eigi ekki heldur rétt á atvinnuleys-
isbótum. Áfram verði barist fyrir
þeirri kröfu og undirskriftasöfn-
uninni haldið áfram næstu eina til
tvær vikurnar.
Telst ekki í virkri atvinnuleit
Kannanir á liðnum árum hafa leitt
í ljós að um 70% stúdenta vinna með
námi og 87% í námshléum. Margir
eru því í mikilli óvissu um fram-
færslu og fjárhagsöryggi sitt á kom-
andi vikum og mánuðum. Nína Eck
er í þeim hópi. Hún er að ljúka
fyrsta námsárinu í félagsráðgjöf við
Háskóla Íslands og samhliða fullu
námi hefur Nína verið í 80% vinnu.
Að undanförnu hefur hún hins vegar
verið í veikindaleyfi frá vinnu og
fékk svo þær fregnir að ráðning-
arsamningurinn við hana verði ekki
endurnýjaður. ,,Ég sé fram á að
þurfa að lifa á barnabótum og orlofi
sem ég fékk útborgað í byrjun maí
af því að ég á ekki rétt á atvinnu-
leysisbótum. Maður telst ekki vera í
virkri atvinnuleit ef maður er skráð-
ur í nám á næstu önn, sem mér
finnst mjög skrýtið vegna þess að ég
var alltaf í vinnu með skóla og borga
skatta og önnur gjöld,“ segir hún.
Skv. reglum Atvinnuleysistrygg-
ingasjóðs teljast þeir sem hyggjast
halda námi áfram á næstu námsönn
ekki vera í virkri atvinnuleit og eiga
því ekki rétt á atvinnuleysisbótum.
Nína er einstæð móðir og leigir á
opnum leigumarkað. ,,Að með-
töldum hita, rafmagni og interneti
er ég að borga um það bil 200 þús-
und krónur á mánuði og það myndi
ekki duga mér að vera bara í helg-
arvinnu með náminu. Þær greiðslur
sem ég fæ frá LÍN duga mér varla
fyrir leigunni,“ segir hún.
Nína á von á greiðslum frá LÍN í
lok vorannarinnar en hafði hugsað
sér að geyma þær til hausts þegar
hún heldur náminu áfram en sér
núna ekki fram á annað en að hún
þurfi að ganga á þennan pening frá
LÍN. Hún segist hafa hugsað sér að
vinna ekki eins mikið með námi
næsta haust en á liðnum vetri vann
Nína sjö næturvaktir í röð aðra
hverja viku samhliða náminu. Nú er
alls óvíst hvernig ganga mun að ná
endum saman á næstu mánuðum.
Spurð hvort hún gæti nýtt sér
sumarnámið sem bjóða á upp á í
sumar segir Nína að komið hafi
fram í umræðu meðal nema í fé-
lagsráðgjöf að það nám sem stendur
til boða í sumar virðist ekki geta
hentað þeim.
Ráðið í störf í tvo mánuði
Sumarstörfin fyrir námsmenn
sem ríkið og sveitarfélögin ætla að
bjóða upp á eru miðuð við ráðning-
artímabilið frá 1. júní til 31. ágúst.
Sigrún bendir hins vegar á að fram
hafi komið í kynningu ráðherra að
eingöngu verði ráðið í einstök störf í
mesta lagi tvo mánuði. ,,Sumarið er
einfaldlega ekki svo stutt og þá er
spurningin sú hvernig stúdentar
eiga að framfleyta sér mánuðinn
sem eftir stendur og þær vikur sem
þeir hafa ekki tryggt starf,“ segir
hún.
Á þriðja þúsund krefjast bótaréttar
 Aðgerðir stjórnvalda grípa ekki alla námsmenn  Nemandi við HÍ segist sjá fram á að þurfa að
lifa á barnabótum og orlofsgreiðslu  Á ekki rétt á bótum þrátt fyrir 80% starf með fullu námi
Ljósmynd/LÍS
Á Háskólatorgi Margir stúdentar hafa unnið með námi og greiða í Atvinnu-
leysistryggingasjóð eða tryggingagjald en eiga samt ekki rétt á bótum.
Sigrún
Jónsdóttir
Nína
Eck
Þegar þú velur íslenskt tekur
atvinnulífið við sér!